Yehowa Sakse Ni A Kam Sham Ai Lam Hpa Rai Ni?

“Ndai măkam măsham hpe shăra shăgu hkan jăhpoi asawng măra shăgun ai hpe, anhtē chyē ga ai măjaw, nang hkap la kam sham lam hpe anhtē na măyu ga ai.” (Kăsa 28:22) Jaw prat lăngai hta nga ai Roma măsha ningbaw ni gaw, kăsi kăja mădun da mi ai. Shanhtē gaw shinggan de na sawn sumru yu ai ni a ga hta, grau nna npawt mădung kaw na, na măyu ma ai.

Dai hte măren, dai ni Yehowa Sakse ni gaw, chyăhkring hkring jăhpoi asawng ai hkrum ma ai. Shanhtē hte seng nna, teng man ai tăra hpe nsu nnawn ai myit rawng ai ni kaw tam săgawn yang, shut na rè. Dai măjaw anhtē a kam sham ai lam mădung nkau mi hpe, nang hpe shăleng dan na ra shărawng ga ai.

Chyum Laika, Yēsu Hkristu hte Kărai Kăsang

“Chyum Laika shăgu gaw, Kărai Kăsang ē shung ya ai rai nna, akyu jaw ai” ngu nna, anhtē kam ga ai. (2 Timohti 3:16, 17) Nkau mi gaw anhtē hpe kăja wa nga yang, ​Hkristan n rè, nga nna tsun shăjang ma ai. Dai gaw loi mi mung n teng ai. Yēsu Hkristu hte seng nna, Kăsa Petru sakse hkam ai hpe, anhtē myit mă-sin mahkra hte hkap la ga ai. “Dai Mădu a mying ningsang hta shăje, anhtē hpe hkyē la lu ai amying shăje, ​sumsing lămu a npu, shinggyim măsha ni hta, kăga n nga sai.”—Kăsa 4:12.

Dai rai tim, Yēsu gaw shi hkum nan “Kărai Kăsang a Kăsha” rè, “Wa gaw ngai hpe shăngun dat ai” nga nna tsun ai măjaw, Kărai Kăsang gaw Yēsu hta grau kăba ai ngu, Yehowa Sakse ni kam ma ai. (Yawhan 10:36; 6:57) Yēsu shi hkum nan “Wa gaw ngai hta grau kăba ai” nga nna hkam la ai. (Yawhan 14:28; 8:28) Dai măjaw Măsum rai tim lăngai măkam măsham tsun ai hte măren, Yēsu gaw Kăwa hte mădang lăngai sha rè nga ai hpe, anhtē n kam sham ma ai. Yēsu gaw hpan da hkrum ai wa rai nna, Kărai Kăsang a npu grit ai wa rai nga ai hpe anhtē kam sham ga ai. —Kolose 1:15; 1 Korinhtu 11: 3.

Kărai Kăsang a mying ningsang gaw, “Yehowa” rai nga ai. ​“Yehowa nga nna amying lu ai, dai Mădu lăngai sha ga ningtsa ting hta, tsaw htum nga ai, shanhtē chyē mu ga.” ​(Shăkawn Kungdawn 83:17) Ndai ndau ga hte măren, Yēsu gaw ​Kărai ​Kăsang a mying hpe hpungtang sung ai hku nna mădun da ai. Shi a hpang hkan ai ni hpe akyu hpyi na mătu, ning nga nna shărin ai: “Sumsing lămu na anhtē a Wa è, Na a amying nsang chyoi pra nga lit ga.” Shi hkum nan mung Kărai Kăsang hpang de, “Ngai hpe ap ya ai măsha ni hpe na a amying ningsang ngai shădan ya se ai.” nga nna akyu hpyi ai.—Mahte 6:9; Yawhan 17:6.

Tinang ni mung Yēsu zawn, Kărai Kăsang a amying hte yaw shăda ai lam ni hpe, măsha kăga wa hpang de shădan shăleng na nga, Yehowa Sakse ni yin la ma ai. Dai rai nna anhtē gaw, “Kangka rē ai sakse wa Yēsu hpe kăsi la ai măjaw, Yehowa Sakse ni, ngu ai amying hpe hkam la ga ai. (Shingran 1:5; 3:14) Grai htap htuk ai hte Esaia 43:10 hta, Kărai Kăsang a amyu măsha ni hpe ning nga tsum wu ai gaw, “Nanhtē nye a sakse ni hte ngai lăta la ai shăngun ma ni rai nga myit dai, nga nna Yehowa tsun ai.”

Kărai Kăsang a Mungdan

Yēsu gaw shi a hpang hkan nang ai ni hpe, “Na a mungdan du wa ru ga,” nga nna akyu hpyi shărin ya ai hta n-ga, shi a shărin shăga ai hta, Kărai Kăsang a mungdan lam hpe, mădung shătai wu ai. (Mahte 6:10; Luka 4:43) Kărai Kăsang a mungdan gaw, ga ntsa up hkang na rè. Hkristu gaw hkawhkam rai nna, sumsing lămu de na up hkang hpung măjing rè lam Yehowa Sakse ni kam ma ai. Chyum Laika gaw, “Shi a lăhpa ntsa ē up ai ahkang măra nga na rai nna,” “Shi a ahkang aya hte shi tawn da ai ngwi pyaw lam gaw, law htam wa nna htum ngu ai n nga na sai,” nga nna tsun da ai.—Esaia 9:5, 6.

Rai ti mung Yēsu Hkristu gaw, Kărai Kăsang a mungdan hta shi hkrai sha, hkawhkam tai na n rai. Shi hte rau sumsing lămu hta, kăpyawn nna up hkang na ni law law nga na ma ai. Kăsa Pawlu tsun ai: “Anhtē shăkut shărang ga yang gaw, shi hte rau up hkang lu na răga ai.” (2 Timohti 2:12) Chyum Laika gaw Hkristu hte rau sumsing lămu ē up hkang na, bai hkrung rawt ai măsha ni gaw, “Ga ningtsa na mări la hkrum sai ni, ngu ai, măsha sen mi mun măli ē hkying măli” sha, măsat da ai lam mădun da ai.—Shingran 14:1, 3.

Găra up hkang hpung rai ti mung, up hkang ai npu ē, nga ai măsha ni nga ma ai hte măren, sumsing lămu ē up hkang ai ni hta kăga, ri, wan, law law rè ai măsha ni mung, htani htana asak lu na ngu nna, Yehowa Sakse ni kam ai. Hpang jăhtum hta ​ginding aga gaw, tsawm htap ai Hparadisu ngu ai shăra byin wa nna, Hkristu hte shi a up hkang ningrum ningtau ni a npu ē hkam la ai, Kărai Kăsang a mungdan hte gingdan ai mungchying sha ni hte hpring nga na măra ai. Dai măjaw Yehowa Sakse ni gaw, ginding aga găloi mung jăhten kau n hkrum ai sha, Chyum Laika a ga sădi gaw, hkum tsup wa na hpe ngang ngang kang kang kam ma ai: “Ding hpring ai ni gaw ginding aga hpe mădu lu nna, dai hta ē nan nawng ē nga nga lu na măra ai.”—Shăkawn Kungdawn 37:29; 104:5.

Dai rai yang Kărai Kăsang a mungdan gaw, kăning rai du wa na kun? Shinggyim măsha yawng, Kărai Kăsang a up hkang npu, ​tinang dai up hkang hkam la ai hku nna kun? Dai hku n rè ai sha, Kărai Kăsang a mungdan du wa na mătu, ginding aga hte seng ai lam hta, Kărai Kăsang nan shang lawm ra ai lam, Chyum Laika hta teng sha mădun da ai. “Sumsing lămu na Kărai Kasang gaw, prat dingsa ē n hten n mat ai mungdan dē da nna, . . . dai gaw, . . . ya tsun ai mungdan ni yawng hpe, agrawp shămyit kau nna, dai nan htani htana agrin nga na ra ai.”—Daniela 2:44.

Kărai Kăsang a mungdan găloi du na a ni? Ya hkum tsup nga sai Chyum Laika myihtoi ga ni hta npawt shătai let, kădè n na ai aten hta, du wa na rè ngu, Yehowa Sakse ni kam ma ai. Ndai n hkru ai lailen măsa a, “hpang jăhtum na nhtoi” a lam myihtoi ga nkau mi hpe, myit mang yu na mătu, nang hpe saw shăga ga ai. Dai lam ni hpe Mahte 24:3-14; Luka 21:7-13, 25-31 hte 2 Timohti 3:1-5 hta, ka mătsing da ai.

Anhtē gaw ‘anhtē a Kărai Kăsang Yehowa hpe, myit kraw lăwang mahkra hte, myit măsin mahkra hte, myit mang mahkra hte, n-gun lăgaw mahkra hte tsaw ra’ nna, anhtē a htingbu wa hpe tinang na a hkum hte măren tsaw ra ai măjaw, anhtē hta măsha amyu, rusai, hte ngasat ngasa lam hta lăchyen lăhka ai lam n nga ga ai. (Marku 12:30, 31) Mungdan shăgu hta na, anhtē a Hkristan kăhpu kănau ni a lăpran, dan dawng ai tsaw ra myit a măjaw, măsha ni law mălawng anhtē hpe chyē shăjang ma ai. (Yawhan 13:35; ​1 Yawhan 3:10-12) Dai rai nna anhtē gaw, mungdan ni a mung măsa lam hta, kăang gran tsap ga ai. “Ngai gaw mungkan ga na n rai n ngai hte măren, n dai ni mung, mungkan ga na n rai ma ai,” nga nna Yēsu tsun ai moi na săpe ni zawn, anhtē shăkut ga ai. (Yawhan 17:16) Mungkan hte kăga san san nga ai ngu ai gaw, măsu ai, lăgu lăgut ai, hpye ai amu ​gălaw ai, num shaw la shaw ai, num shăda la shăda tam ai, sai hpe lam n-ang ai hku lang ai, gawngngu sumla naw ku ai ni hte Chyum Laika hta, măra mădun da ai, kăga lam ni yawng, dai ni măsha ni len nga ai, n kăja ai laikyang ni hpe koi gam na ngu, anhtē kam ga ai.—1 Korinhtu 6:9-11; Ehpesu 5:3-5; Kăsa 15:28, 29.

Du na ra ai prat a myit măda shăra

Ndai mungkan ga hta nga nga ai anhtē a asak aprat gaw, ndai dăram sha rè ngu, Yehowa Sakse ni n kam ma ai. Shigngyim măsha ni gaw, Kărai Kăsang hte dinghpring ai hku nga pra lu na mătu hte, lailen nnan hta ē htani htana asak lu la na mătu, ​Yehowa Kărai Kăsang gaw, Yēsu hpe gawng mălai jăhpu hku nna, shi a asak asai hpe ru hkaw kau na mătu, mungkan ga de shăngun dat ai ngu anhtē kam ai. Yēsu a kăsa lăngai tsun ai hte măren, “Shi a asai hta, ya [anhtē] dinghpring lu săga ai.” (Roma 5:9; Mahte 20:28) Yehowa Sakse ni gaw, du na ra ai ban prat hpe shăbyin shătai ya na mătu, ndai gawng mălai jăhpu lăjang ya ai a măjaw, Kărai Kăsang hte shi a Kăsha hpe laksan chyēju dum ga ai.

Yehowa Sakse ni gaw, si mat wa sai ni Kărai Kăsang a mungdan npu ē, bai hkrung rawt wa na lam hpe mădung dat nhtawm, du na ra ai ban prat hpe tup hkrak kam ma ai. Chyum Laika shărin ai hte măren, anhtē kam sham ai gaw măsha lăngai si mat ai shăloi, shi mat nan mat sai, “Dai shăni jang, shi maw mawn ai hku yawng hten mat wa ai.” (Shăkawn Kungdawn 146:3, 4; Ezekela 18:4; Hpaji Ningli 9:5) Teng ai; si mat ai ni a htawm hpang prat gaw hkrung rawt na shăloi, Kărai Kăsang a myit dum la ai hta mădung tai nga ai.—Yawhan 5:28, 29.

Rai ti mung Yehowa Sakse ni gaw, Kărai Kăsang a mungdan gaw ya nga nga ai up hkang lam măsa mahkra hpe, jăhtum ​jeyang ai shăloi, Noa hte shi a dum nta măsha ni Shă-u ing ai kaw na tawt lai ai zawn ya asak hkrung nga ai măsha ni law law mung, tawt lai nna, jăsan jăseng da ai ga ntsa ē, htani htana asak hkrung nga na rè, ngu ai hpe kam ga ai. (Mahte 24:36-39; 2 Petru 3:5-7, 13) Rai ti mung Chyum Laika hta tsun ai hte măren, tawt lai lu ai lam gaw, Yehowa Kărai Kăsang a hpyi lăjin ai lam ni hpe mădang dep ai hta mădung rè ngu, anhtē kam ga ai. “Dinghta ga . . . gaw lai mat lu ai rai ti mung . . . Kărai Kăsang a myit ai hku hpe hkan gălaw ai wa gaw, htani htana ē a nga nga ai.”—1 Yawhan 2:17; Shăkawn Kungdawn 37:11; Shingran 7:9, 13-15; 21:1-5.

Yehowa Sakse ni a kam sham ai lam ni hpe, ndai hta mahkra tang mădun yang n mai byin ai; rai ti mung mătut nna tam săgawn na mătu nang hpe anhtē saw shăga dat ga ai.

Măsat dingsat n lawm ai, la kap tawn ai Ja Chyum ga ni yawng gaw, Dr. O. Hanson laika gălè da ai (Jinghpaw) Chyum Laika kaw na rè.

[Blurb on page 4]

Yēsu hpe kăsi la nna, Yehowa Sakse ni ngu ai amying hpe, anhtē hkam la ai rai ga ai