Simsa Ai Mungkan Nnan Hta Nga Pra Lam

Ndai shi htawn laika na sumla hpe yu dat yang, nang kăning nga hkam sha nni? Na a myit măsin gaw, dai hta mu lu nga ai, simsa lam, ngwi pyaw lam hte ntaw ntsang rē lam hpe nmărit a ni? Teng sha mărit na ndai. Raitimung, ga ntsa hta ndai măsa ni byin wa na rē, ngu kam ai lam gaw, yupmang shing nrai, myit yu ai (shing ran) sha rai kun?

Law mălawng gaw dai hku myit la ma ai. Dai ni byin nga ai măsa ni hta na nkau mi hpe tsun ga nga yang, măjan ni, ruhka ni, kawsi ai ni, ana zingli ni, hte gumgai dingla ai lam ni rai nga ai. Du wa na aten hpe yu yang, Chyum laika hta, “Dinghpring rawng ai Sumsing lămu nnan hte ginding aga nnan hpe, shi a ga ndat a măjaw, anhtē myit măda nga ga ai,” nga nna tsun da ai.​—⁠2 Petru 3:13; Esaia 65:17.

Ndai “Sumsing lămu nnan” the “Ginding aga nnan” gaw Chyum laika hku nga yang, Sumsing lămu măjing hte ginding aga măjing hpe tsun ai n rai; ndai myi hte mu lu ai ginding aga hte lămu hpe, hkum tsup hkra gălaw da sai rai nna, Chyum laika hta htani htana agrin nga na lam hpe mădun da ai. (Shă­kawn Kungdawn 89:​36, 37; 104:5) “Ginding aga nnan” gaw ga ntsa hta nga na, dinghpring ai măsha ni rē. “Sumsing lămu nnan” gaw ga ntsa na dinghpring ai ni hpe uphkang na, hkum tsup ai, Sumsing lămu mungdan, shing n rai uphkang hpung rē ai. Raitimung “Ginding aga nnan” shing nrai danhkung ai mungkan nnan ngu kam yang, mai byin na nrai ni?

Myit yu u; dai zawn re hkrang măsa gaw, ndai ginding aga a mătu Kărai Kăsang a shawng ningpawt na yaw shăda ai hta, daw chyen mi lawm nga ai. Shi gaw shawng na num yan la hpe ginding aga Edin ngu ai Hparadisu hta nga shăngun nhtawm, shan hpe mai kăja ai măgam lit ap ya mu ai. “Nan kăshu kăsha shăprat nna, măyat măya wa mu; aga ting hpe jăhpring nna, dai hpe up nga mu” (Ningpawt Ninghpang 1:28) Teng ai Kărai Kăsang yaw shăda ai gaw, shan gaw shăyi shădang măyat wa nna, hpang jăhtum e, shan a Hparadisu hpe ginding aga ting, măden jat wa na mătu rē ai. Htawm hpang ē shan Kărai Kăsang hpe, n mădat na lam lăta la ai hku nna, htani htana nga na mătu n-ging dan ai lam mădun ma timung, Kărai Kăsang a shawng ningpawt na yaw shăda ai lam gaw, n gălai mat ai. Dai gaw mungkan nnan hta hkum tsup na rai nga ai.​—⁠Esaia 55:11.

Teng sha nga yang, Kărai Kăsang a mungdan du na mătu, mădu a akyu hpyi ga, shing nrai anhtē a Kăwa hpe nang akyu hpyi yang, nang gaw, shi a Sumsing lămu uphkang dap gaw, ginding aga ntsa na, ntăra ai amu ni hpe yeng seng kau nna, mungkan nnan hpe uphkang na mătu, kyu hpyi ai rai ndai. (Mahte 6:9, 10) Kărai Kăsang gaw, dai akyu hpyi ga hpe, mădat ya na rē, ngu kam lu ai. Mădu a Mungga hta ga sădi jaw da ai. “Dinghpring ai ni gaw, dai mungdan hpe mădu lu nna, dai hta e nan nawng e nga lu na măra ai.”—⁠Shăkawn Kungdawn 37:29.

Kărai Kăsang A Mungkan Nnan Hta Nga Pra Lam

Kărai Kăsang a mungdan gaw, shădawn n dang ai Ginding aga a akyu ara ni hpe la sa wa na rē; shi a măsha ni ga ntsa hta, pyaw lu na mătu, Kărai Kăsang a shawng ningpawt kaw nna, yaw shăda tawn ai; mai kăja lam mahkra hpe shăbyin shătai ya na rē; n ju n dawng ai hte nsu nnawn rawng ai myit nnga ai sha, hpang jăhtum ē ga ntsa na măsha hkum shăgu gaw kăga măsha hkum shăgu a jinghku măjing tai wa na ma ai. Chyum laika hta, Kărai Kăsang gaw, shi hkum nan, ‘ga ting hta na hpyen măjan shi jasim kau wu ai’ “Amyu mi gaw amyu mi hpe, nhtu nshaw ai hte, htawm hpang e hpyen măjan shărin săna nrai”​—⁠Shăkawn Kungdawn 46:9; Esaia 2:4.

Ginding aga ting gaw, hpang jăhtum hta, nampan sun zawn Hparadisu măsa de du săna rē, nga nna Chyum laika hta mungga tsun da ai. Nam măli hte hkraw hkun ai shăra gaw, kăbu găra na ra ai; zaibru jang mung awng shărawng nna, mări pan zawn ... hkraw hkun ai shăra ē, hkahpawk hpaw nna, zaibru jang ē, hka lwi na ra ai. Kăhtet ai zaibru jang hta hkalawng, hkraw hkun ai ga hta hkahpawk hpaw na ra ai.”​—⁠Esaia 35:​1, 6, 7.

Hparadisu ginding aga ntsa e ngwi pyaw hkum sumhpa nga nga ai. Măsha gaw găloi mung, shat lusha nlu nna, kawsi hkrum săna n rai. “Aga gaw shi a nsi naisi dik hkra shăpraw ya na,” nga nna Chyum laika hta tsun ai. (Shăkawn Kungdawn 67:6; 72:16) Tinang a bungli shăbrai hpe tinang nan hkam sha lu na, anhtē a hpan mădu gaw, ga sădi jaw da sai. “Shanhtē gaw ti­nang hkai ai săbyi sun na asi sha na măra ai, ... shanhtē săbyi sun hkai nna măsha kăga sha lu na n rai.”​—⁠Esaia 65:​21, 22.

Kărai Kăsang a mungkan nnan hta, măsha ni gaw Wahpang nta na gawk ni hta, shing nrai hten run nga ai, chyăhpung lam lăpran hkan na nta ni hta, mătsut nga săna n rai. Hpa măjaw nga yang, Kărai Kăsang gaw, “Shanhtē gaw tinang gălaw ai nta hta, shănu nga na ma ai. ... shanhtē nta gălaw nna, măsha kăga wa rawng na n rai,” nga nna ga sădi jaw da ai.

Chyum laika mung “Shanhtē gaw be be kăman sha amu gă­law na n rai,” nga nna mung, ga sădi jaw tawn ai. (Esaia 65:​21-23) Shing rai măsha ni gaw, awng dang myit dik ai măgam bungli ni lu la săna rai nna, aprat gaw aput angun lam byin săna n rai.

Aten ram jang, Kărai Kăsang a mungdan gaw, Edin sun hta nga lai sai dusat ni a lăpran, shinggyim măsha hte dusat ni a lăpran, sim sa ai mătut măhkai lam hpe pyi, bai gaw ya na re. Chyum laika gaw, chyăhkyawn gaw săgu kăsha hte rau shănu nga na re; rawnggawk gaw bainam hte, rau hpum nga na ra ai; Dumsu kăsha gaw hkanghkyi hkalung hte, hpum sau ai yam nga gaw rau hkawm sa nna, ma kăji shanhtē hpe dun woi na ra ai.”​—⁠Esaia 11:​6-9; Hosea 2:18.

Sumru yu u, gingdin aga Hparadisu hta ē, măchyi măkaw hte hkum hkrang nkung npan ai lam yawng, hkoi mat săna rai. Kărai Kăsang a mungga gaw, “Dai hta, shănu nga ai wa gaw, ngai măchyi nga n ngai nga nna ntsun na ra ai.” (Esaia 33:24) “(Kărai Kăsang) shi gaw shanhtē a myi hta na myi prwi pru măpru kă­tsut kau ya na ra ai; htawn hpang e, si­hkrung sihtan n nga lu na sai; shărung shăyawt ai, hkrap ngu hkrap ngoi ai, hki si ba si ai mung, nnga lu na sai; shawng na lam nga mănga hte gaw, lai mat wa sai.”—⁠Shingran 21:4.

Na A Mătu Kăning Rai Byin Lu Ai Lam

Shi a dinghpring ai mungkan nnan hta nga pra lam hte seng nna, Kărai Kăsang a ga sădi a măjaw, na a sălum teng sha, gumlawt na rin dai. Nkau mi gw shingrē shăman chyeju ni byin wa na, kăja la nga ai ngu myit nawn na, raitimung, tsawra myit rawng ai Hpan mădu a lăta kaw nna, yak ai n rai.—Shăkawn Kungdawn 145:16; Mihka 4:4.

Du na ra ai ginding aga Hparadisu hta, anhtē htani htana nga na rai yang, shădik shătup na mătu, hpyi tawn ai lam nga ai. Yēsu gaw ra mădung lăngai mi mădun ai; Kărai Kăsang hpang de akyu hpyi yang, htani htana asak ngu ai chyawm gaw, lăngai sha rai nga ai hte, tengman rē ai, nang Kărai Kăsang hpe mung, nang shăngun dat ai wa Yēsu Hkristu hpe mung, shanhtē chyē chyang lu ai hpe, ngu ai rai nga​ai.—⁠Yawhan 17:3.

Dai măjaw anhtē gaw, Kărai Kăsang a mungkan nnan hta, teng teng nga măyu yang, anhtē shawng ningnan ē, Kărai Kăsang a ra shărawng ai hpe shărin la nna dai hpe hkan shătup ra ai. Hpa măjaw nga yang, dai dinghta ga hte de a mărin ai lam chyawn gaw, lai mat lu ai raitimung, Kărai Kăsang a myit ai hku hpe hkan gălaw ai wa gaw, htani htana e, anga nga ai.​—⁠1 Yawhan 2:17.

Kăga măsat n lawm ai htē lăkap ai Ja Chyum ga yawng gaw, Yudatan ka găle tawn da ai Chyum laika kaw na rē ai.