Daw Kăba 3
Yēsu Hkristu Gaw Kădai Rai Ta?
Yēsu hpe Kărai Kăsang a Kăsha “alat” ngu, hpa măjaw tsun a ni? (1)
Mădu hpe “Mungga” ngu, hpa măjaw tsun a ni? (1)
Shinggyim măsha lăngai hku nna ginding aga de, hpa măjaw Yēsu du sa wa a ni? (2-4)
Mau hpa kumla ni hpe, shi hpa măjaw gălaw a ni? (5)
Du ni ai hpang prat hta, Yēsu hpa amu ni gălaw na a ni? (6)
1. Yēsu gaw ginding aga de gărai n sa yang, wenyi mărai lăngai hku nna, sumsing lămu ē nga nga ai. Shi gaw Kărai Kăsang hpan tawn da ai ni a npawt nhpang rē ai măjaw, shi hpe Kărai Kăsang a Kăsha “alat” nga nna tsun ai. (Kolose 1:15; Shingran 3:14) Yēsu gaw Kărai Kăsang nan hpan tawn da ai kăsha shingtai rē ai. Yehowa gaw, sumsing lămu hte ginding aga hta nga ai, kăga arai yawng hpe hpan da ai shăloi, shinggyim măsha gărai ntai ai Yēsu hpe, shi a “hpăawn wa” hku nna lang wu ai. (Ga shăgawp 8:22-31; Kolose 1:16, 17) Kărai Kăsang gaw, shi hpe tinang a mălai tsun shăga lu ai ningbaw ningla hku nna mung lang wu ai. Dai măjaw Yēsu hpe “Mungga” nga nna tsun ai.—Yawhan 1:1-3; Shingran 19:13.
2. Kărai Kăsang gaw, shi Kăsha a asak hpe, Mari a hkritung de htawt bang ya ai hku nna, shi hpe ginding aga de shăngun dat wu ai. Dai măjaw Yēsu hta, shinggyim măsha kăwa n nga ai. Dai rē măjaw, shi gaw, hpa yubak măra, shing n rai, n hkum n tsup ai lam, hpa săli wunnli mung, n hkam la wu ai. Măsa lam măsum a măjaw, ginding aga de Yēsu hpe Kărai Kăsang shăngun dat ai rē: (1) anhtē hpe Kărai Kăsang hte seng ai teng man tăra shărin ya na mătu (Yawhan 18:37), (2) anhtē hkan sa na mătu, kăsi ningli hku nna, hkum tsup ai hte kangka rē ai sădi dung lam hpe mădi shădaw na mătu (1 Petru 2:21), hte (3) anhtē hpe yubak măra hte si hkrung si htan kaw na lawt lu na mătu, shi a asak hpe shăgu hkungga nawng ya na mătu rē ai. Hpa măjaw dai ra a ni?—Mahte 20:28.
3. Kărai Kăsang hkang da ai hpe n mădat ai măjaw, shawng na măsha Adam gaw, Chyum laika hta “Yubak măra” nga nna tsun da ai lam hpe tawt lai wu ai. Dai măjaw, shi hpe Kărai Kăsang si ari jaw wu ai. (Ningpawt Ninghpang 3:17-19) Shi gaw Kărai Kăsang a shădawn hpunda ni hpe, ndep lu sai rē măjaw, shi hta hkum tsup ai lam n nga sai. Angwi ngwi sha, asak kăba wa nna, si mat wa sai. Adam gaw shi a shăyi shădang sha ni yawng hpang de yubak măra hpe shălen mătut bang dat wu ai. Dai măjaw, anhtē mung asak kăba wa nna, măchyi măkaw hkrum let, si mat wa ga ai. Shinggyim măsha ni găra hku hkyē hkrang la hkrum na i? —Roma 3:23; 5:12.
4. Yēsu gaw Adam zawn hkum tsup ai shinggyim măsha lăngai rē ai. Rai ti mung, Yēsu gaw Adam hte n bung ai sha, kăba la ai chyam dinglik ai npu ē pyi, Kărai Kăsang hpe hkum tsup hkra, mădat hkam la ai. Dai măjaw, Adam a yubak măra a mătu, shi a hkum tsup ai shinggyim măsha asak hpe, shăgu hkungga nawng ya lu ai rē. Dai hpe “gawng mălai jăhpu” nga nna Chyum laika mădun da ai. Ndai hku nna, Adam a shăyi shădang sha ni gaw, si ari jēyang ai kaw na lawt lu ma ai. Yēsu hpe kam sham ai ni yawng htē gaw, yubak măra ni raw dat kau hkrum ai hte, htani htana asak lu la na ra ai.—1 Timohti 2:5, 6; Yawhan 3:16; Roma 5:18, 19.
5. Yēsu gaw ginding aga ntsa nga ai aten hta, măchyi ai ni hpe shămai ya nna, kawsi hpang găra ai ni hpe bau măka ai, nbung laru ni hpe jăsim ya ai. Si ai ni hpe pyi bai sharawt ya ai. Mădu gaw hpa măjaw mauhpa kumla ni gălaw a ni? (1) Jam jau hkrum ai ni hpe shi mătsan dum nna, shanhtē hpe kărum ya măyu ai. (2) Shi a mauhpa amu ni gaw, shi gaw Kărai Kăsang a Kăsha rē ai lam sakse mădun ai. (3) Shi hkawhkam tai nna ginding aga hpe up hkang ai aten hta ē, mădat măra ai măsha ni a mătu, shi gălaw ya na amu ni hpe madun dan ai.—Mahte 14:14; Marku 2:10-12; Yawhan 5:28, 29.
6. Yēsu si mat wa ai raitim, shi hpe wenyi hkum lăngai hku nna, Kărai Kăsang bai hkrung rawt shangun dat ai hpan, sumsing lămu de bai lung mat wa ai. (1 Petru 3:18) Dai aten kaw nna hpang nhtawm, Kărai Kăsang gaw, shi hpe hkawhkam dang da wu ai. Yēsu gaw ndai ginding aga kaw na n hkru n shawp ai lam ni hte ruyak jam jau lam ni yawng hpe, kăde n na yang, yeng seng kau na ra ai.—Shăkawn Kungdawn 37:9-11; Ga shăgawp 2:21, 22.
[Pictures on page 7]
Yēsu a sasăna amu bungli hta shărin achyin ai lam, mauhpa amu ni gălaw ai lam sha n-ga anhtē a mătu, tinang a asak hpe shăgu hkungga nawng ya ai lam pyi, lawm nga ai