Daw Kăba 4
Nat Gaw Kădai Rai Ta?
Satan Nat—shi găra kaw na byin wa a ni? (1, 2)
Măsha ni hpe Satan găra hku hkălem nga a ni? (3-7)
Nat hpe hpa măjaw hkap shădaw ra a ta? (7)
1. “Nat” ngu ai ga hkum a lăchyum gaw, kăga măsha wa a lam măsu hkălem nna, n kăja ai hku tsun ai wa hpe, ngu ai. “Satan” ngu ai gaw, hpyen wa, shing n rai, nhtan shai ai wa, ngu ai rē. Dai ni gaw Kărai Kăsang a hpyen ningbaw kăba wa hpe jaw tawn ai amying ni rē ai. Shawng nnan ē, shi gaw, hkum tsup ai lămu kăsa lăngai rai nna, Kărai Kăsang hte rau sumsing lămu hta nga ai. Rai ti mung, dai hpang shi hkum shi nan myit tsaw myit dap kăba wa nna, Kărai Kăsang chyu sha, hkam la ging ai naw ku lam hpe, ra mărin wa wu ai.—Mahte 4:8-10.
2. Satan rai nga ai ndai lămu kăsa gaw, lăpu lăngai mi hku nna, Ewa hpe ga shăga wu ai. Shi hpe măsu hkălem ga tsun nna, Kărai Kăsang a ga hpe n mădat hkra, gălaw lu ai. Shing rai Satan gaw, Kărai Kăsang a “Awmdawm up hkang lam” shing n rai, Tsaw Htum Mădu a arawng aya hpe găsat wu ai. Kărai Kăsang a up hkang lam gaw, ging dan nna shi a npu na ama ni a kăja ai lam byin n byin hte seng nna, n tsen ai ga san Satan byin pru shăngun ai. Shinggyim măsha yawng Kărai Kăsang hpe sădi dung na n dung na hpe mung, n tsen ai myit byin pru shăngun ai. Ndai zawn gălaw nna, Satan gaw shi hkum hpe Kărai Kăsang a hpyen wa tai wa shăngun wu ai. Dai lam a măjaw, Satan Nat ngu amying hpe hkam la wu ai.—Ningpawt Ninghpang 3:1-5; Yoba 1:8-11; Shingran 12:9.
3. Măsha ni shi hpe naw ku wa u ga, Satan măsu hkălem nga ai. (2 Korinhtu 11:3, 14) Măsha ni hpe shi hkălem ai lam lăngai gaw shut shai ai naw ku htung hku na rē. Naw ku htung lăngai mi gaw Kărai Kăsang hte seng nna, măsu măgaw ai hku shărin achyin ya yang, Satan a yaw shăda lam hpe teng sha awng dang shăngun nu ai. (Yawhan 8:44) Shut shai ai naw ku htung ni a hpung măsha ni gaw, teng man ai Kărai Kăsang hpe, tinang ni naw ku nga ga ai ngu, myit mălang ai hku kam sham na ma ai. Rai ti mung, kăja nga yang, shanhtē gaw Satan hpe naw ku nga ma ai. Shi gaw ‘ndai mungkan ga na hpăra’ rē nga ai.—2 Korinhtu 4:4.
4. Nat hpaji gaw, măsha ni hpe shi a atsam shingwang npu ē debang la na mătu, Nat asung jăshawn ai lam kăga lăngai mi bai rē. Shanhtē gaw wenyi ni hpe shăga la nna, shanhtē hpe măkawp măga na mătu mung, kăga măsha ni hpe jam jau shoihpa jăhkrum na mătu mung, htawm hpang prat a lam tau hkaw tsun lu na mătu mung, mauhpa amu ni hpe gălaw lu na mătu mung, shăngun nga ma ai. Satan gaw ndai bungli yawng a shingdu ē nga nga ai, n hkru ai atsam dăju mădu rē. Kărai Kăsang a myit hte hkrum măyu yang, anhtē gaw nat hpaji hte loi mi mung n mai seng ai.—Tăra Jăhprang 1:10-12; Kăsa 19:18, 19.
5. Satan gaw lădu shălai myu tsaw myit hte mung măsa hpung ni hpe shăgrau shă-a ai lam ni hku nna mung, măsha ni hpe hkălem nga ai. Măsha nkau mi gaw tinang a mungdan, shing n rai, tinang a amyu ru sai gaw, kăga ni hta grau ai ngu myit la ma ai. Rai ti mung, dai gaw n teng ai. (Kăsa 10:34, 35) Bai nkau mi gaw, măsha a manghkang lam ni hpe hpăran ya na mătu, mung măsa hpung ni hpe kam hpa ma ai. shing rai gălaw ma ai măjaw, Kărai Kăsang a Mungdan hpe Shanhtē nyet kau nga ma ai. Dai Mungdan gaw anhtē a manghkang lam ni a mătu, lăngai sha rai nga ai hpăran lam rē.—Daniela 2:44.
6. Bai nna, măsha ni hpe Satan hkălem ai lam kăga lăngai mi gaw, yubak hte seng ai ra mărin lam ni hte shanhtē hpe chyam dinglik ai hku rē. Yubak hte seng ai laikyang ni gaw, anhtē hpe hkrit hpa jam jau jaw na lam chyē tawn ai măjaw, dai ni hpe koi gam na mătu, anhtē hpe Yehowa htet da ai. (Galati 6:7, 8) Măsha nkau mi gaw, ndai zawn rē laikyang ni hta shanhtē hte rau, nang hpe shang lawm shăngun măyu nga ma ai. Rai ti mung, dai zawn rē lam ni, nang hpe gălaw shăngun măyu ai wa gaw, Satan nan rē ai lam myit dum u.—1 Korinhtu 6:9, 10; 15:33.
7. Satan gaw, zingri zingrat jaw ai lam, shing n rai, nhtan shai ai lam hku gălaw nhtawm, Yehowa hpe tawn kau da na mătu, nang hpe shădut na rē. Nang Chyum laika shărin hka ja nga ai măjaw, nang tsaw ra ai măsha nkau mi gaw, grai măsin pawt na rē. Kăga măsha ni gaw, nang hpe jăhpoi asawng na ma ai. Rai ti mung, na asak a mătu, kădai kaw hka kap nga a ni? Yehowa a lam mătut nna hka ja n lu u ga, nang hpe Satan jăhkrit shăma măyu na rē. Satan hpe hkum dang shăngun ēt. (Mahte 10:34-39; 1 Petru 5:8, 9) Nang gaw Nat hpe hkap shădaw ai hku nna, Yehowa hpe myit shăpyaw ya lu ai hte, shi a awmdawm up hkang lam hpe mădi shădaw nga ai lam mădun dan lu na rin dai.—Ga shăgawp 27:11.
[Pictures on page 9]
Shut shai ai naw ku htung, Nat hpaji hte myu tsaw myit ni gaw, măsha ni hpe hkălem ai
[Pictures on page 9]
Yehowa a lam mătut hka ja ai hku nna, Satan hpe hkap shădaw u