Daw Kăba 7
Akyu Hpyi Let Kărai Kăsang Kaw Sit Shănu Wa Ai Lam
Aten man man akyu hpyi na mătu, hpa măjaw ahkyak a ni? (1)
Kădai kaw akyu hpyi ging nna, găra hku hpyi ra a ni? (2, 3)
Akyu hpyi na mătu, htap htuk ai lam ni gaw hpa rai ta? (4)
Găra aten ē akyu hpyi mai a ni? (5, 6)
Akyu hpyi ai ga yawng hpe, Kărai Kăsang mădat ya a ni? (7)
1. Akyu hpyi ngu ai gaw, Kărai Kăsang hpe myit shăgrit shănem let, ga shăga ai lam rē. Kărai Kăsang kaw aten man man akyu hpyi ra ai. Shing rai yang, nang gaw grai tsaw ra ai mănang lăngai hpe zawn, Mădu hte hku hkau na rin dai. Yehowa gaw grai gălu kăba ai n-gun atsam Mădu rai ti mung, anhtē akyu hpyi ai lam ni hpe, mădat măra ya na n rai hka! Kărai Kăsang kaw nang aten man man akyu hpyi nga n ni?—Shăkawn Kungdawn 65:2; 1 Htesaloni 5:17.
2. Akyu hpyi ai lam gaw, naw ku ai a adaw lam lăngai rē ai. Dai măjaw Kărai Kăsang Yehowa hpe chyu sha, anhtē akyu hpyi ging nga ai. Ginding aga ntsa Yēsu naw nga ai aten hta, shi a Kăwa kaw tut nawng akyu hpyi nga ai; kăga kădai kaw mung, shi akyu hpyi ai n rai. Anhtē mung dai zawn gălaw ra ga ai. (Mahte 4:10; 6:9) Rai ti mung, anhtē a akyu hpyi ai ga yawng gaw, Yēsu a amying gang let hpyi ra ai. Dai gaw Yēsu a arawng aya hpe hkungga lara ai hte Mădu a gawng mălai jăhpu shăgu hkungga hpe, kam sham lam mădun ai rē.—Yawhan 14:6; 1 Yawhan 2:1, 2.
3. Akyu hpyi ai shăloi anhtē a măsin sălum kaw nna, Kărai Kăsang hpe ga shăga ra ai. Mătsing sumhting la ai shăgawp ga hku nna, shing n rai, akyu hpyi laika buk kaw na hti nna akyu n mai hpyi ai. (Mahte 6:7, 8) Anhtē gaw hkungga lara ai măsat hte găra hku mi rai rai, găra aten, găra shăra kaw mi rai rai, akyu hpyi lu ai. Kărai Kăsang gaw, anhtē a măsin sălum kăta kaw nna, nsen n pru ai akyu hpyi ga hpe pyi na lu ai. (1 Samuela 1:12, 13) Tinang nang a mătu akyu hpyi măyu yang, kăga măsha ni hte tsan nna, simsa ai shăra tam yang kăja ai.—Marku 1:35.
4. Kăning rē lam ni hpyi lu a ni? Kărai Kăsang hte na a hku hkau lam hpe, akyu gălaw ya ai hpa lam rai rai hpyi mai ai. (Hpilipi 4:6, 7) Kăsi ningli akyu hpyi ga hta, Kărai Kăsang a mying ningsang hte yaw shăda lam a mătu, anhtē akyu hpyi ra ai nga nna, mădun ai. Anhtē a hkum hkrang hta ra ai lam ni hpe, kărum ya na mătu, anhtē a yubak mara ni hpe raw dat ya na mătu, agung alau lam ni hpe mănga kau lu u ga, kărum ya na mătu mung, hpyi lu ai. (Mahte 6:9-13) Anhtē a akyu hpyi ai lam ni gaw, tinang a akyu n mai tam ai. Kărai Kăsang ra ai hte bung pre ai hku sha, akyu hpyi mai ai. —1 Yawhan 5:14.
5. Kărai Kăsang hpe chyēju dum na, shing n rai, shăkawn shăgrau na mătu, na a măsin sălum nang hpe shădut ai, găra aten ē raitim akyu hpyi lu ai. (1 Hkawhkam Lăbau 29:10-13) Nang hta manghkang byin ai shăloi, na a kam sham myit dinglik hkrum ai shăloi, akyu hpyi mai ai. (Shăkawn Kungdawn 55:22; 120:1) Shat gărai n sha yang akyu hpyi mai ai. (Mahte 14:19) Yehowa gaw anhtē hpe “aten shăgu” akyu hpyi na mătu, saw shăga nga ai.—Ehpesu 6:18.
6. Lăja lăna rē ai măra lăngai mi hpe, anhtē tawt lai shut ga ai rai yang, laksan akyu hpyi na ra ga ai. Dai zawn rē aten hta ē, Yehowa a mătsam dum ai myit hte măra raw dat ya na lam hpe lu la na mătu, hpyi nem ra ga ai. Mădu kaw anhtē a măra hpe tawngban nna, dai hpe kăhtap nna bai n gălaw hkrup na mătu, dang lu ai măde shăkut galaw sa wa yang, Kărai Kăsang gaw măra raw ya na mătu, jin jin rai nga ai.—Shăkawn Kungdawn 86:5; Ga shăgawp 28:13.
7. Ding hpring ai măsha ni a akyu hpyi ai ga hpe sha, Yehowa mădat ya nga ai. Na a akyu hpyi ga hpe Kărai Kăsang mădat ya na mătu, Mădu a tăra ni hte măren, asak hkrung na mătu, dang lu ai măde shăkut ra ai. (Ga shăgawp 15:29; 28:9) Akyu hpyi ai shăloi, shăgrit shănem myit nga ra ai. (Luka 18:9-14) Nang akyu hpyi ai lam hte măren gălaw ra ai. Shing rai, nang hta ē măkam măsham nga ai lam, nang akyu hpyi ai hte măren teng tup hkrang leng tsun ai lam sakse mădun lu na rē. Dai shăloi she, na a akyu hpyi ga ni hpe, Yehowa măhtai jaw ya na rē.—Hebre 11:6.