Daw Kăba 8
Kărai Kăsang Ra Shărawng Ai Hku Asak Hkrung Ai Dinghku
Dinghku kăta ē mădu wa a ahkang aya gaw hpa rai ta? (1)
Mădu wa langai mi gaw, shi a mădu jan hpe găra hku kănawn măzum ra a ni? (2)
Kăwa lăngai hta ē, kăning rē lit nga a ni? (3)
Dingku kăta ē mădu jan a lit lămang gaw hpa rai ta? (4)
Kănu kăwa hte kăsha ni kaw na, Kărai Kăsang hpa lam ni hpyi tawn a ni? (5)
Kăran nga ai, hka bra ai lam hte seng ai, Chyum laika a mu măda ai gaw găra hku rai ta? (6, 7)
1. Mădu wa gaw, kun dinghku a baw rē ai, nga nna Chyum laika tsun ai. (1 Korinhtu 11:3) Mădu wa lăngai mi gaw, mădu jan lăngai sha lu mai ai. Shan gaw tăra upăde htap htuk tsawm hkra, hkungran ra ai.—1 Timohti 3:2; Titu 3:1.
2. Mădu wa gaw, tinang a hkum hpe tsaw ra ai zawn, mădu jan hpe tsaw ra ra ai. Tinang a hpang hkan ni hpe Yēsu kănawn măzum ai zawn, shi gaw tinang a num hpe kănawn măzum ra ai. (Ehpesu 5:25, 28, 29) Shi a mădu jan hpe kăyat anu ai, shing n rai, lam lăma ma hte shi hpe n tăra ai hku zingri ai, găloi mung gălaw lu na n rai. De a mălai, shi hpe shăgrau hkungga ra ai.—Kolose 3:19; 1 Petru 3:7.
3. Kăwa lăngai mi gaw, kun dinghku hpe bau măka yu lăjang na shăkut shăja amu gălaw ra ai. Shi a mădu jan hte kăsha ni a mătu, lu na, sha na, bu na, hpun na hte dum nta ni hpe lăjang ya ra ai. Kăwa lăngai mi gaw, shi a kun dinghku a wenyi hte seng ai ra ai lam ni hpe mung lăjang ya ra ai. (1 Timohti 5:8) Kărai Kăsang hte shi a yaw shăda ai lam ni hpe chyē na hkra, kun dinghku hpe kărum ya ai hte, ningbaw ningla gălaw ya ra ai.—Tăra Jăhprang 6:4-9; Ehpesu 6:4.
4. mădu jan gaw shi mădu wa a kăja ai ningrum ningtau rai ra ai. (Ningpawt Ninghpang 2:18) Ma ni hpe shărin achyin ya ai, hpaji shăkut ya ai hta, mădu wa hpe kărum ya ra ai. (Ga shăgawp 1:8) Mădu jan gaw, shi a kun dinghku hpe tsaw ra ai myit hte yu lăjang na mătu, Yehowa hpyi nga ai. (Ga shăgawp 31:10, 15, 26, 27; Titu 2:4, 5) Shi gaw tinang a mădu wa hpe, grai hkungga ra ai.—Ehpesu 5:22, 23, 33.
5. Kăsha ni gaw, shanhtē a kănu kăwa ni hpe mădat măra na mătu, Kărai Kăsang hpyi nga ai. (Ehpesu 6:1-3) Kănu kăwa ni mung tinang a kăsha ni hpe shărin achyin ya na mătu, Mădu myit măda nga ai. Kănu kăwa ni gaw kăsha ni hpe aten jaw nhtawm, shanhtē hte rau, Chyum laika sawk săgawn let, shanhtē a wenyi hte myit măsin ra ai lam ni hpe, bau măka yu lăjang ya ra ai. (Tăra Jăhprang 11:18, 19; Ga shăgawp 22:6, 15) Kănu kăwa ni gaw kăsha ni hpe kăjet kăjau ga, mătsan dum myit n rawng ai gumshem myit hte găloi mung, hkum shărin shăga ēt.—Kolose 3:21.
6. Mădu wa hte Mădu jan gaw, hku hku hkau hkau nga na mătu, manghkang hkrum nga ma yang gaw, Chyum laika shărin shăding ai lam hpe, shăkut hkan sa ra ai. Tsaw ra ai myit mădun na hte, măra raw dat kau ya na mătu, anhtē hpe Chyum laika shădut tawn ai. (Kolose 3:12-14) Manghkang kaji ni hpe lăchyum hpyan yan ai lam hku nna, kăran nga ai hpe Kărai Kăsang a Mungga n-gun n jaw ai. Rai ti mung, mădu jan lăngai mi gaw, shi a mădu wa hpe, (1) shi a dinghku hpe mădi shădaw na mătu, myit ja, baw ja, hte nyet kau nga yang; (2) num jan a hkamja lam asak hte seng nna tsang ra hkra, lăja lăna rai lădu lai gumshem nga yang; (3) num jan gaw Yehowa hpe naw ku na mătu, n mai byin ai dăram jehpre nga ai rai yang, kăran nga mat na lăta la mai ai. —1 Korinhtu 7:12, 13.
7. Mădu wa hte mădu jan yan gaw, lăngai hte lăngai sădi dung ra ai. Kăga măsha a dinghku hpe shut ai gaw, Kărai Kăsang hte tinang a hkungran mănang wa hpe shut ai sha rai nga ai. (Hebre 13:4) Hkungran num hte la n rē ai sha, ndaw liknga kăsawt ai lam gaw, dinghku bai dè lu na hte hka bra lu ai lam lăngai sha rē. Dai gaw Chyum laika hta npawt dè ai lam rē. (Mahte 19:6-9; Roma 7:2, 3) Chyum laika hta npawt dè ai lam n nga ai sha, num hte la hka bra nna, kăga lăngai hte hkungran ai lam hpe, Yehowa grai nju ndawng ai.—Malahki 2:14-16.
[Pictures on page 16, 17]
Kănu kăwa ni shanhtē a kăsha ni hpe shăding shărai shărin achyin na mătu, Kărai Kăsang myit măda nga ai
[Pictures on page 17]
Tsaw ra myit rawng ai kăwa gaw, tinang a dinghku ra ai hkum hkrang lam hte wenyi lam hpe lăjang ya na rē