Daw Kăba 9

Kărai Kăsang A Shăngun Ma Ni Gaw, San Seng Ra Ai

Anhtē gaw, lam shăgu hta hpa măjaw san seng ra a ni? (1)

Wenyi hta san seng ai lam, (2)Kyang lailen hta san seng ai lam, (3)Myit măsin hta san seng ai lam, (4)Hkum hkrang hta san seng ai lam ni gaw, hpa ngu măyu ai rai ta? (5)

Kăning rē mătsat shăbat ga tsun shăga ai hpe, koi ra a ni? (6)

1. Yehowa Kărai Kăsang gaw, san seng ai hte chyoi pra nga ai. Shi hpe naw ku ai ni mung, wenyi hta, kyang lailen hta, myit mă­sin hta, hkum hkrang hta san seng nga na mătu, shi myit măda nga ai. (1 Petru 1:16) Kărai Kăsang a man ē san seng hkra nga na mătu, grai shăkut shăja ra ai. Anhtē gaw n san n seng ai mungkan ga ē nga nga ga ai. Anhtē a hkum hkrang kăta hta na, shut shai lam gălaw măyu ai myit măsin hpe mung, găsat mănga kau ra ai. Rai ti mung, anhtē myit n mai htum ai.

2. Wenyi hta san seng ai lam: Yehowa hpe anhtē daw jau măyu yang, shut ai măkam măsham a găra shărin achyin lam hte, găra htunghking lailen măsa hpe mung, lang taw nga n mai ai. Anhtē gaw shut ai măkam mă­sham kaw na pru wa nna, dai hpe găra lam hku raitim, mădi shădaw n-gun jaw n mai ai. (2 Korinhtu 6:​14-18; Shingran 18:⁠4) Kă­rai Kăsang a teng man ai tăra hpe, anhtē chyē la săga ai rai yang, măsu măgaw lam hpe shă­rin achyin ai ni a lam shădam ai hpe n hkrum u ga, sădi ra ai.​—⁠2 Yawhan 10, 11.

3. Kyang lailen hta san seng ai lam: Yehowa gaw shi hpe naw ku ai ni hpe aten shăgu hta, Hkristan măjing ni hku, hkan sa gălaw shăngun măyu ai. (1 Petru 2:12) Mădu gaw anhtē gălaw ai lam măgup sha n-ga, măkoi măgap gălaw ai hpe mung mu lu ai. (Hebre 4:13) Anhtē gaw ngang kăyut ai lam hta kyang lailen hten ai lam hte ndai mungkan ga a n san n seng ai arawn alai ni hpe koi gam ra ai.​—⁠1 Korinhtu 6:​9-11.

4. Myit măsin hta san seng ai lam: Anhtē a myit măsin hpe san seng chyoi pra ai myit jăsat lam ni hte hpring nga yang gaw, anhtē a kyang lailen hta mung san seng na rē. (Hpi­lipi 4:⁠8) Rai ti mung, n san n seng ai lam ni hpe myit sumru dung nga yang, n hkru n shawp ai lam sha byin pru wa shăngun chyē ai. (Mahte 15:​18-20) Anhtē a myit masin hpe jăhten kau ya lu ai shăngwi shăpyaw lam ni hpe anhtē koi kau ra ai. Kărai Kăsang a Mungga hpe sawk hka ja ai hku nna, anhtē a myit măsin hta san seng ai myit mang lam ni hpe jăpring da lu ai.

5. Hkum hkrang hta san seng ai lam: Hkristan ni gaw Kărai Kăsang a hkum mălai gălaw gunhpai ai ni rē măjaw, anhtē a hkum hkrang hte buhpun pălawng ni gaw, san seng ra ai. Anhtē gaw namdum lung ngut ai hpang, lăta kăshin kau ra ai. Shat gărai n sha yang, shing n rai, shat lusha ni hpe rai n jum yang, lăta kăshin kau ra ai. Htap htuk ai namdam shăra n nga yang, namdam măza ni hpe, ga de htu lup kau ra ai. (Tăra Jăhprang 23:​12, 13) Hkum hkrang hta san seng nga yang, hkam ja shăngun nga ai. Hkristan lăngai a nta gaw, kăta hte shinggan zeng rai, san seng ra ai. Rau nga ai măre hta, kăsi kăja lăngai hku nna dan dawng ra ai.

6. San seng ai ga shăga lam: Kărai Kăsang a shăngun ma ni gaw, găloi mung teng man ai ga hpe sha, tsun shăga ra ai. Măsu măgaw ai ni gaw, Kărai Kăsang a Mungdan de shan lu na n rai. (Ehpesu 4:25; Shingran 21:⁠8) Hkristan ni gaw mătsat shăbat ga hpe, koi kau ra ai. Shanhtē gaw mătsat shăbat ai măni hpa hte n san n seng ai ga byin tai na lam ni hpe, tsun mung n tsun, mădat mung n mădat ma ai. Shanhtē gaw san seng ai ga tsun shăga ai măjaw, jawng, shing n rai, amu bungli hte htingbu ni hkan ē, kăga măsha ni hte n bung ai lam, dan leng nga ai.​—⁠Ehpesu 4:​29, 31; 5:⁠3.

[Pictures on page 18, 19]

Kărai Kăsang a shăngun ma ni gaw, lămang jăhpan shăgu hta san seng nga ra ai