Daw Kăba 10

Kărai Kăsang Nju Ndawng Ai Arawn Alai Ni

N kăja ai lam nga nna, Kărai Kăsang hkang da ai ni hpe, nang găra hku myit la ra a ta? (1)

Kăning rē ai ngang kăyut ai laikyang ni gaw shut a ni? (2)

Măsu ai lam, (3) hpai ginsup ai lam, (3) lăgu ai lam, (3) kăshun kăshe ai lam, (4) nat hpaji lam, (5) chyăru lu lai ai lam ni hpe, Hkristan lăngai găra hku mu măda ra a ni? (6)

N kăja ai arawn alai ni kaw na, măsha lăngai mi găra hku lawt lu na a ta? (7)

1. Kărai Kăsang a shăngun ma ni gaw, kăja ai lam ni hpe tsaw ra ma ai. Rai ti mung, n kăja ai lam hpe nju ndawng chyē na mătu mung, shărin hka ja la ra ai. (Shăkawn Kungdawn 97:10) Dai gaw, Kărai Kăsang nju ndawng ai arawn alai nkau mi hpe koi gam lu na nga nna, tsun măyu ai rē. Dai arawn alai nkau mi gaw hpa rai ta?

2. Ndaw liknga lam: Rai n hkung­ran yang, num la kănawn ai lam, num shaw la shaw ai lam, dusat hte kănawn ai lam, sai ni ai shăda num la kănawn ai lam hte la shăda, num shăda kănawn ai lam ni yawng gaw, Kărai Kăsang hpe grai shut ai lam rē. (Jaw Jau 18:6; Roma 1:​26, 27; 1 Korinhtu 6:​9, 10) Măyaw htinggaw lă­ngai mi gaw, n hkungran ai sha rau nga nga yang, shan gaw hka bra ra ai; shing n rai, tăra shang ai hku hkung­ran ra ai.​—⁠Hebre 13:⁠4.

3. Măsu ai lam, hpai ginsup ai lam hte lăgu ai lam: Yehowa Kărai Kăsang gaw, măsu n chyē ai. (Titu 1:⁠2) Mădu a myit hte hkrum măyu ai ni gaw, măsu ga ni hpe koi kau ra ai. (Ga shăgawp 6:​16-19; Kolose 3:​9, 10) Hpai ginsup ai lam yawng gaw, lawhpa ai lam hte mătut nga ai. Dai măjaw Hkristan ni gaw, . . . kă­ning rē jap ginsup amyu myu hta mung, n lawm ma ai. (Ehpesu 5:​3-5) Dai sha n-ga, Hkristan ni gaw lăgu na mung n rai. Shanhtē gaw lăgu ai arai ni hpe, chyē ninglen mări na n rē ai zawn, ahkang n lu ai arai ni hpe la na ma ai n rai.​—⁠Pru mat wa ai 20:15; Ehpesu 4:⁠28.

4. Măsin pawt ai lam hte kăshun kăshe lam: Pawt sindawng ai lam hpe n hkang lu a yang gaw, kăshun kăshe lam hpe byin shăngun wa ai. (Ningpawt Ninghpang 4:​5-8) Kăshun kăshe rē ai măsha lăngai mi gaw, Kărai Kăsang a jinghku n byin mai ai. (Shă­kawn Kungdawn 11:5; Ga shăgawp 22:​24, 25) Anhtē hpe kăga măsha ni gălaw yang gălaw na, n kăja ai lam hpe mătai htang ai, shing n rai, nhkru ai hku bai htang ai gaw shut nga ai.​—⁠Ga shăgawp 24:29; Roma 12:​17-21.

5. Mhaw hpaji hte seng ai mandan ga hte nat hpaji lam: Măsha nkau mi gaw, măchyi măkaw hkrum ai ni hpe shămai ya na mătu, wenyi ni a atsam n-gun hpe hpyi ma ai. Kăga măsha ni gaw, shanhtē a hpyen ni hpe măchyi măkaw hkrum shăngun na mătu, shing n rai, si shăngun na mătu, mandan ga hte kăwut ai lam gălaw chyē ma ai. Shing rē ai ­arawn alai yawng a hpang ē nga ai atsam dăju gaw, Satan rai nga ai. Dai măjaw, Hkristan ni dai zawn rē ai lam lăngai hte pyi n mai kăsawt ai. (Tăra Jăhprang 18:​9-13) Anhtē hpe kăga măsha ni gălaw yang gălaw na, mandan ga hte kăwut ai lam ni kaw na, kăja htum ai măkawp măga lam gaw, Yehowa hte hku hkau hkra shămyet shănat nga na lam rē.​—⁠Ga shagawp 18:⁠10.

6. Chyăru lu lai ai lam: Tsăbyi jăhku, beer, shing n rai, kăga mălum tsa ntsin ni loi li lu ai lam gaw n shut ai. (Shăkawn Kungdawn 104:15; 1 Timohti 5:23) Rai ti mung, chyăru lu lai ai lam hte chyăru nang ai lam gaw, Kărai Kăsang a man ē shut nga ai. (1 Korinhtu 5:​11-13; 1 Timohti 3:8) Chyăru lu lai ai lam gaw, na a hkamja lam hpe htenza shăngun nna, na a dum nta hpe hka bra shăngun chyē ai. Kăga gunglau ai lam ni hpe mung, lăwan ai hte aloi sha, asum jaw kau chyē nga ai.​—⁠Ga shăgawp 23:​20, 21, 29-35.

7. N kăja ai ngu, Kărai Kăsang hkang da ai lam ni hpe, hkan sa gălaw ai ni gaw, “Kă­rai Kăsang a mungdan a săli wunli hkam la lu na n rai.” (Galati 5:​19-21) Kărai Kăsang hpe nang kăja wa tsaw ra nna, Mădu a myit hte hkrum măyu a yang, ndai arawn alai ni kaw na, nang lawt lu na rai ndai. (1 Yawhan 5:⁠3) N kăja ai lam ngu, Kărai Kăsang hkang da ai lam ni hpe, nju ndawng na mătu, shărin la u. (Roma 12:⁠9) Kărai Kăsang a lai nsam kap ai ni hte kănawn măzum u. (Ga shăgawp 13:20) Măchyē măchyang kunghpan ai Hkristan kănawn mănang ni gaw, kărum shingtau lam byin lu na ma ai. (Yaku 5:14) Dai ni yawng htē hta, akyu hpyi let Kărai Kăsang a kărum shingtau ai hpe shămyet shănat nga u.​—⁠Hpilipi 4:​6, 7, 13.

[Pictures on page 20, 21]

Kărai Kăsang gaw, chyăru lu lai ai lam, lăgu ai lam, hpai ginsup ai lam hte kăshun kăshe adip arip rē ai lai kyang ni hpe, nju ndawng ai