Daw Kăba 13

Teng Man Ai Naw Ku Htung Hpe Nang Găra Hku Mu Lu Na Rai Ni?

Naw ku htung yawng Kărai Kăsang a myit hte hkrum ma ni, shing n rai, lăngai sha myit hkrum a ni? (1)

Hkristan amying hkam ai naw ku htung, ndai dram hpa măjaw law nga ma ni? (2)

Teng man ai Hkristan ni hpe, nang găra hku ginhka chyē lu na a ni? (3-7)

1. Yēsu gaw teng man ai Hkristan naw ku htung lăngai hpe sha, dè hpang da ai. Dai măjaw, dai ni Yehowa Kărai Kăsang hpe, teng man ai hku naw ku ai măsha ni a ginjaw, shing n rai, rudi hpung lăngai sha nga ra ai. (Yawhan 4:​23, 24; Ehpesu 4:​4, 5) Chyum laika gaw, gyip ai asak hkrung lam hta, hkawm sa ai măsha ni n law ma ai, nga nna shărin achyin ya nga ai.​—⁠Mahte 7:​13, 14.

2. Yēsu a kăsa ni si mat ai hpang, shut shai ai shărin shăga lam ni hte, Hkristan ­arawn alai hte nhtan shai ai lam ni, Hkristan hpung kăta de angwi ngwi sha shang wa na rē, nga ai lam Chyum laika tau tsun da sai. Măsha ni gaw kam sham ai ni hpe, Hkristu a hpang hkan shăngun na a mălai, tinang ni a hpang hkan na mătu, gang agaw hkălem mat na rē. (Mahte 7:​15, 21-23; Kăsa 20:​29, 30) Dai măjaw, Hkristan ngu amging mying nna, hka bra nga ai naw ku htung law law hpe, anhtē mu lu nga ga ai. Teng man ai Hkristan ni hpe, anhtē găra hku ginhka chyē lu na rai ni?

3. Teng man ai Hkristan ni a dan leng ai măsat kumla gaw, shanhtē shăda da kăja wa tsaw ra hkat ai lam rē. (Yawhan 13:​34, 35) Shanhtē gaw kăga amyu măsha ni, shing n rai, kăga shanhpraw shanchyang nsam rawng ai ni hta, grau kăja ai ni rē nga nna, myit na mătu, n shărin ya ma ai. Kăga mungdan na măsha ni hpe, n ju n dawng na lam mung, n shărin ya ma ai. (Kăsa 10:​34, 35)Dai măjaw măjan ni hta shanhtē n lawm ma ai. Teng man ai Hkristan ni gaw, langai hte lă­ngai kăhpu, kănau, kăna ni zawn, kănawn măzum nga ma ai.​—⁠1 Yawhan 4:​20, 21.

4. Teng man ai naw ku htung a mă­sat kumla kăga lăngai mi gaw, de a hpung măsha ni gaw, Chyum laika hpe grai hkungga lara nga ma ai. Dai hpe Kărai Kăsang a Mungga rē ngu, shanhtē hkap la nna kam sham nga ma ai. (Yawhan 17:17;  2 Timohti 3:​16, 17) Kărai Kăsang a Mungga hpe, shinggyim măsha ni a myit mang lam, shing n rai, htunghking lailen ni hta grau ahkyak ai ngu shanhtē a myit hta tawn da ma ai. (Mahte 15:​1-3, 7-9) Shanhtē a shăni shănang na asak hkrung lam hta, Chyum laika na hte ­măren shăkut nga ma ai. Dai măjaw shanhtē gaw, hkaw tsun ai gaw amyu mi, gălaw ai gaw amyu mi n rai ma ai.​—⁠Titu 1:​15, 16.

5. Teng man ai naw ku htung gaw, Kărai Kăsang a amying ningsang hpe shăgrau ra ai. (Mahte 6:⁠9) Yēsu gaw, Yehowa ngu ai, Kărai Kăsang a amying ningsang hpe, kăga măsha ni chyē na mătu, tsun găra ma ai. Teng man ai Hkristan ni mung, dai hku gă­law ra ai. (Yawhan 17:​6, 26; Roma 10:​13, 14) Kărai Kăsang a mying ningsang a lam, kăga măsha ni hpe hkaw tsun dan ai, na a măre kaw nga ai măsha ni gaw, kădai ni rai ma ta?

6. Teng man ai Hkristan ni gaw, Kărai Kăsang a Mungdan lam hpe hkaw tsun na rē ai. Yēsu gaw dai zawn gălaw wu ai. Kă­rai Kăsang a Mumgdan lam hpe Yēsu tut nawng ē ahkaw tsun nga ai. (Luka 8:⁠1) Mungkan ting ē, ndai kăbu găra shi ga hpe hkaw tsun na mătu, săpe ni hpe, Mădu htet da ai. (Mahte 24:14; 28:​19, 20) Kărai Kăsang a Mungdan sha, ndai ginding aga ntsa ē, teng man ai simsa lam hte shim lam hpe, byin tai wa shăngun na rē lam, teng man ai Hkristan ni kam sham nga ma ai.​—⁠Shă­kawn Kungdawn 146:​3-5.

7. Yēsu a săpe ni gaw ndai n hkru ai mungkan a adaw achyen n byin n tai ma ai. ­(Yawhan 17:16) Shanhtē gaw mungkan a mung măsa ni hte măsha ni a ndang kălang lam ni hta, n lawm ma ai. Mungkan ē byin tai nga ai shoihpa tsin-yam jaw ai nga pra lam, arawn alai lam ni hte myit mang lam ni hpe, shanhtē koi gam ma ai. (Yaku 1:27; 4:⁠4) Na a măre ē, teng man ai Hkristan naw ku htung a ndai măsat kumla ni rawng ai naw ku htung hpung lă­ngai hpe, nang ginhka mu chyē na n ni?

[Pictures on page 26, 27]

Teng man ai Hkristan ni gaw, lăngai hte lăngai tsaw ra nna, Chyum laika hpe hkungga lara ma ai; Kărai Kăsang a Mungdan lam hpe hkaw tsun ma ai