Nang Chyum Laika A Lam Grau Chyē Na Măyu A Ni?

Hpa Măjaw Chyum Laika Hti A Ta?

CHYUM LAIKA gaw kăga laika shăjē ni hte n bung ai. Dai hta ē Kărai Kăsang kaw nna tsaw ra ga mătsun ni rawng ai. (1 Htesaloni 2:13) Chyum laika shărin achyin ya ai lam ni hpe nang lăta tut jai lang ai rai yang, nang akyu law law hkam sha lu na rè. Nang Kă­rai Kăsang hpe grau tsaw ra wa nna, “kăja ai kumhpaw nlang htē hte hkum hkum rē ai kumhpa” ni hpe jaw ya lu ai Mădu hte kă­htep ni wa lu na ra ai. (Yaku 1:17) Akyu hpyi let Kărai Kăsang kaw sit shang ai lam ni hpe nang chyē wa na rè. Jam jau hkrum ai aten hta Kărai Kăsang kaw na kărum la ai lam nang hkam la lu na rè. La ma wa na aprat hkrun lam hpe Chyum laika kaw mătsun da ai mădang hte hkrak tup hkan sa ai rai yang, Kărai Kăsang nang hpe htani htana asak jaw na rè.—Roma 6:23.

Chyum laika hta myit nyan jăhtoi ya ai teng man tăra ni rawng nga ai. Chyum laika măchyē măchyang lu la ai ni gaw măsha wan law law aprat asak chyē na shut nna dip kăup ai ni kaw na lawt lu ma ai. Ga shădawn, anhtē si mat ai hpang, hpa baw byin tai mat na lam hte seng nna teng man ai hpe chyē na jang si mat sai ni, anhtē hpe dingbai dingna n jaw lu ai hte si mat sai, anhtē a jinghku hte mănang ni gaw tsinyam tsindam chyum sha hkrum nga ma ai ngu ai anhtē a myit tsang lam kaw nna shălawt ya nga ai. (Ezekela 18:4) Chyum laika a shărin achyin ya ai lam gaw tsaw ra ai ni, si lam hta sum mat ai ni hpe bai hkrung shărawt ya na nga nna, myit shălan ya nga ai. (Yawhan 11:25) Nat mătsē ni a lam teng ai hku chyē tawn ai gaw, nat hpaji a hkrit hpa lam hpe anhtē hpe măja shăngun nna, ginding aga ntsa ē hpa măjaw jam jau law taw nga ai lam anhtē hpe chyē na shăngun nga ai.

Chyum laika kaw anhtē hpe găra hku nga sa na lam mădun da ai jaw jau tăra ni gaw, hkumhkrang hta akyu chyēju lu la shăngu nga ai. Ga shădawn, “sădi săhka ai” gaw hkam kăja shăngun nga ai. (1 Timohti 3:2) Hkum hkrang hte wēnyi hpe awu asin rē ai lam ni hpe jăsan jăseng kau ai hku nna anhtē a hkam kăja lam htenza mat na hpe koi yen lu nga ai. (1 Korinhtu 7:1) Chyum laika kaw Kărai Kăsang a hpaji ga hpe lăta tut jai lang yang, dinghku hpe ngwi pyaw shăngun nna tinang a hkum hpe mung grau hkungga chyē shăngun nga ai.—1 Korinhtu 6:18.

Lăma wa nang Kărai Kăsang a mungga hpe lăta tut jai lang yang, grau ngwi pyaw ai măsha wa lăngai mi byin tai wa lu na rè. Chyum laika măchyē măchyang gaw anhtē hpe myit kăta ē simsa lam, myitdik lam hte myit măda lam ni hpe mu chyē shăngun ai. Chyum laika gaw mătsan dum ai, tsaw ra ai, kăbu găra ai, ngwi pyaw ai hte măkam măsham hpring ai, ndai zawn rē ai kăja ai kăsi ningja rawng wa lu na mătu mung kărum ya ai. (Galati 5:22, 23; Ehpesu 4:24, 32) Ndai zawn rē ai atsam lu ai ni gaw grau kăja ai mădu wa, mădu jan, kăwa, kănu, shing n rai kăshu kăsha ni tai wa shăngun nga ai.

Htawm hpang prat a lam hpe nang myit sumru yu a ni? Chyum laika a myihtoi ga ni gaw aprat hka shi hka yan a găra aten hta ē anhtē asak hkrung nga ai hpe mădun da nga ai. Dai myihtoi ga ni gaw dai ni na mungkan a lai măsa lam ni sha n ga, kădē n na yang Kărai Kăsang gaw ndai ginding aga hpe hparadisu byin hkra gă­law ya na lam mung tsun da nga ai.—Shingran 21:3, 4.

Chyum Laika Chyē Na Na Mătu Kărum Ai

Kăja wa nang gaw Chyum laika hpe shăkut hti yu ai raitim chyē na na mătu yak la nga na rai ndai. Na a ga san ni a măhtai hpe Chyum laika găra shăra ē tam yu na mung n chyē rai, byin chyē ai. Shingrai byin ai lam nang chyu sha n rè ai. Kărai Kăsang a mungga hpe chyē na na mătu anhtē yawng nang hpe kărum ya na rai nga ga ai. Mungdan 236 hta nga ai Yehowa a Saksē ni gaw măsha wan law law hpe mănu shăbrai n la ai sha Chyum laika shărin ya nga ai. Shanhtē gaw nang hpe mung kăbu găra let kărum ya na rè.

Law mălawng nga yang, Chyum laika hpe ningpawt kaw nna shărin hka ja hpang let tsang hte tsang shărin hka ja jat mat wa yang kăja htum rai nga ai. (Hebre 6:1) Mătut nna shărin hka ja mat wa ai hte măren, lăchyum sung ai teng man tăra rai nga ai “ja ai sha hpa” hpe grau nna sha lu wa na rè. (Hebre 5:14) Chyum laika gaw hkan sa ra ai laika rai nga ai. Anhtē kaw na Kărai Kăsang hpa lam hpyi nga a ni? nga ai zawn rē Chyum laika hta rudi gaw da ai laika buk kăji ni gaw Chyum mungga hte seng ai ga mădin baw sumhpa ni hpe chyē na lu shăngun ya nga ai.

Chyum Laika Hpe Chyē Na Lu Na Mătu Nang Bat Shăgu Aten Jaw Lu Na Kun?

Na a mătu htap htuk ai aten hte shăra hta ē Chyum laika shărin hka ja na lăjang yang mai ai. Măsha law law gaw shanhtē a nta kaw nan shărin hka ja la ma ai. Nkau mi gaw telephone hte shărin ma ai. Shărin hka ja ai măsing jăhpan gaw măsha law law hte rau shă­rin hpawng n rè ai sha na a măchyē măchyang hpaji mădang sat măsa hte htap htuk ai hku laksan shărin ya ai dinghkrai măsing rai nga ai. San poi san jep ai lam n nga ai. Nang hpe hkrit agam shă­ngun na n rai. Chyum laika hte seng ai na a ga san ni hpe htai ya nna, Kărai Kăsang hpang de găra hku kăhtep nyi wa na lam hpe nang chyē wa na ra ai.

Ndai zawn rē ai Chyum laika shărin achyin ai lam a mătu nang mănu shăbrai jaw n ra ai. (Mahte 10:8) Naw ku htung yawng kaw na măsha ni, găra naw ku htung hta ē mung n hkan sa ai raitim, Kărai Kăsang a mungga hpe myit mălang ai hte grau nna chyē na măyu ai măsha nlang htē hpe mănu jăhpu n la ai sha saw shăga da nga ai.

Ndai bawng ban ai lam hta kădai ni shang lawm mai nga a ta? Na a nta măsha yawng shang lawm mai nga ai. Nang saw shăga măyu ai, na a jinghku kădai rai ti mung shang lawm mai ai. Shing n rai nang ra shărawng a yang gaw nang hkrai hte sha mung bawng ban lu nga ai.

Chyum laika hka ja na mătu lăban bat shăgu aten hta ē hkying hkum mi san da ai măsha ni law law nga ma ai. Nang mung ahkying aten grau jaw lu na, shing n rai a bat mi hta aten loi mi sha jaw lu na nga ti mung, Saksē ni gaw nang hpe kărum na mătu jin jin sha rai nga ai.

Shărin Hka Ja La Na Mătu Saw Shăga Ai Lam

Yehowa a Saksē ni hte mătut măhkai na mătu nang hpe anhtē saw shăga ga ai. Dai hpe gălaw mai ai lam lăngai mi gaw lăwu na hkring dat de laika hte ka tim mai ai. Shăloi nang hpe mănu shăbrai n la ai, nta ē Chyum laika shărin lămang hpe gălaw ya na mătu mă­rai lăngai ngai hpe dat ya na ga ai.

□ Anhtē Kaw Na Kărai Kăsang Hpa Lam Hpyi Nga A Ni? laika buk kăji lăngai mi ngai hpang de sa ya rit.

□ Chyēju hte mănu shăbrai n ra ai nta ē Chyum Laika shărin lămang a mătu ngai hpe mătut măhkai rit.

Măsat dingsat n lawm ai, la kap tawn ai Ja Chyum ga ni yawng gaw, Dr. O. Hanson laika gălè da ai (Jinghpaw) Chyum Laika kaw na rè.