DAW 5
Anhte Ni A Zuphpawng Kaw Na Nang Hpa Akyu Lu Na Ta?
Argentina
Sierra Leone
Belgium
Malaysia
Masha law law gaw nawku zuphpawng ni hta nshang lawm mat sai. Wenyi n-gun, lam matsun hte, myit shalan ai lam nlu ai majaw re. Raitim Yehowa Sakse Ni a zuphpawng hta hpa majaw sa lung ging ai kun? Dai kaw hpa ni hpe mu lu na kun?
Tsawra myit hpring nna matsan dum chye ai ni a lapran hta hkam sha lu ai ngwi pyaw lam. Tsa ban langai hta Hkristan ni gaw hpung ni hpe hpawng de nna, Karai Kasang hpe nawku na matu, Chyum Laika hpe hkaja na matu hte, shada da n-gun jaw na matu hkrum zup ma ai. (Hebre 10:24, 25) Tsawra myit hte shinggrup da ai Hkristan hpunau nauna ni hte hkrum zup ai shaloi, jet ai jinghku ni a lapran du taw nga ai ngu shanhte hkam sha ma ai. (2 Htesaloni 1:3;3 Yawhan 1:14-15) Anhte mung shanhte hpe kasi la nna hkan sa ai majaw, shanhte zawn ngwi pyaw nga ai.
Chyum Laika tara ni hpe gara hku hkan sa na hpe sharin la ai kaw na lu ai akyu. Chyum Laika prat hta numsha, lasha, ma kaji kaba yawng arau hkrum zup ma ai. Atsam marai rawng ai ni gaw Chyum Laika tara ni hpe, asak hkrung hkawm sa lam shagu hta, gara hku jailang na hpe, chye wa hkra Chyum laika hte karum ya ai. (Tara Jahprang 31:12; Nehemia 8:8) Shawa hpawng shang lawm hkaja ai lamang hte, mahkawn hkawn ai hta yawng shang lawm nna Karai Kasang hpe shakawn shagrau mai ai. —Shakawn 35:18.
Karai Kasang a ntsa anhte a makam masham grau ngang kang wa ai akyu. Kasa Pawlu gaw shi prat hta na hpung langai hpe: “nanhte hte hkrum na ngai katu nga nngai: . . . nanhte hte nye a kam sham ai lam a marang e, nanhte hte ngai, shangwi shapyaw ai hkam la lu n ga” ngu tsun ai. (Roma 1:11, 12) Zuphpawng ni hta, makam masham bung ai ni hte ayan hkrum zup ai gaw, anhte a makam masham hpe ngangkang shangun ya nna, Chyum Laika tara hte maren asak hkrung na matu karum ya ai.
Anhte a zuphpawng ni hta shang lawm nna, lahta kaw tsun da ai akyu ni hpe hkam sha yu u. Nang hpe kabu gara hkap tau la ga ai. Zuphpawng lung na matu manu jahpu njaw ra ai. Alu mung n hta ai.
Anhte a zuphpawng ni gaw hpa hpe kasi la nna galaw ai kun?
Zuphpawng hta shang lawm yang gara akyu ara hkam sha lu na ta?