Zuphpawng Ni A Matu Gara Hku Shajin Ai Gaw Kaja Htum Rai A Ta?

Nang gaw Yehowa Sakse langai ngai hte Chyum Laika hkaja nga yang, hkaja na lam hpe tau hkrau hti da na re. Dai zawn, zuphpawng a matu tau hkrau shajin da yang, akyu lu na re. Dai hku galaw ai akyang nga yang, akyu kaba lu la na re.

Shajin na matu aten hte shara hpe masat da u. Gara aten hta nang grau myit lawm a ta? Jahpawt jau jau bungli n hpang shi yang kun? Shing nrai, shana ma ni yup ai hpang hta kun? Aten law law nlu jaw yang, aten kade daram galaw na hpe daw dan da u. Dai aten hpe hpa a majaw mung asum hkum hkam u. Simsa ai shara hta galaw u. TV, radio, phone ni zawn dingbai dingna jaw chye ai arai ni hpe pat da u. Shajin ai lam n galaw shi yang akyu hpyi ai gaw, shani ting na myit tsang hpa ni hpe shayawm ya nna, Karai Kasang a Mungga hpe, myit maju jung lu hkra karum ya ai.​—⁠Hpilipi 4:6, 7.

Hkaja na lam hpe matsing da nna mahtai jaw na matu Shajin u. Hkaja na lam yawng hpe atsawm sha chye na hkra galaw u. Madung ga baw hpe myit yu u. Ga baw kaji ni gaw, madung ga baw hte gara hku matut mahkai ai, sumla ni, bai myit yu na ga san ni gaw, madung lam hpe gara hku madi shadaw ai hpe myit yu u. Dai hpang laika daw ni hpe hti nna ga san ni a mahtai hpe tam u. Lakap da ai chyum daw hpe hti nna, dai gaw hkaja nga ai lam hpe, gara hku madi shadaw ai hpe myit yu u. (Kasa 17:11) Mahtai lu sai nga yang, madung ga si, ga yan ni hpe mahkret, matsing da u. Dai gaw zuphpawng hta mahtai hpe bai myit dum hkra karum ya na re. Zuphpawng hta mahtai jaw mayu yang, lata sharawt nna na a ga hte, mahtai kadun jaw mai ai.

Bat shagu zuphpawng hta hkaja ai lam ni hpe, atsawm sha dinglik yang, na a Chyum Laika machye machyang “sut dek” hta, hpaji nnan ni jat wa na re.​—⁠Mahte 13:51, 52.

• Zuphpawng a matu shajin ai hta gara akyang hpe nang shalat la mai a ta?

• Zuphpawng hta mahtai jaw na matu nang gara hku shajin mai na ta?