DAW 13

Lam Woi Ningshawng Ngu Ai Gaw Hpa Rai Ta?

Hkaw tsun bungli hta shang lawm nga ai aten hpring magam gun marai langai — Canada

Hkaw tsun bungli hta shang lawm nga ai aten hpring magam gun ni — Nta langai hpang langai

Lam woi ningshawng ni Chyum Laika hpe sharin ya nga — Chyum Laika hkaja lamang

Lam woi ningshawng langai Chyum Laika hkaja nga — Tinang hkrai hkaja ai lam

Yesu gaw, asak jaw ai magam bungli hpe galaw na matu hte, hkye hkrang ai lam hpaw ya na matu, mungkan ga de sa dat hkrum ai. (Mahte 20:28) Ya aten hta mung, Yesu a sape ni gaw, “sape shatai” ai bungli hta, dang di lu ai daram aten law law shang lawm nna, shi a kasi hpe hkan shatup ma ai. (Mahte 28:19, 20) Masha nkau mi gaw, lam woi ningshawng magam bungli hta shang lawm ma ai.

Lam woi ningshawng ngu ai gaw kabu gara shiga hpe aten tup hkaw tsun ai wa re. Yehowa Sakse Ni yawng gaw, kabu gara shiga htawn tsun ai ni re. Raitim, masha nkau mi gaw, hkaw tsun bungli hta ten galu ningshawng ni hku nna, shata mi hkying hkum 70 shang lawm ma ai. Dai hku galaw na matu, shanhte a bungli ni hpe aten masat nna, aten kadun bungli ni galaw ma ai. Nkau mi gaw, mungdan shiga htawn tsun ai ni grau ra nga ai shara ni kaw, amu gun na matu laksan ningshawng ni hku nna lata hkrum ai. Shanhte gaw shata mi hta, hkying hkum 130 hte dai hta n-ga shang lawm ma ai. Lam woi ningshawng ni gaw, asak hkrung na matu ra kadawn ai lam ni hpe, Yehowa madi shadaw ya na ngu kamsham nna, ram daw lu ai hte myit dik ma ai. (Mahte 6:31-33; 1 Timohti 6:6-8) Aten tup n lu shang lawm ai ni gaw, shata mi hta hkying hkum 30 shing nrai, 50 du hkra shang lawm ai ten kadun ningshawng hku nna amu gun ma ai.

Karai Kasang hte masha ni hpe tsawra ai myit gaw lam woi ningshawng galaw na matu shadut ya ai. Masha law law gaw Karai Kasang hte shi a yaw shada lam hpe, chye na matu ra nga ai hpe Yesu zawn, anhte mung mu ga ai. (Marku 6:34) Shanhte hpe ya aten hta akyu jaw lu nna, htawm hpang prat a matu mung, myit mada lam jaw lu ai machye machyang anhte hta nga ai. Dai majaw, tinang a n-gun atsam hte ahkying aten hpe jailang nna, kaga masha ni hpe kabu gara shiga hkaw tsun ma ai. Masha shada da tsawra ai myit gaw, dai hku galaw na matu lam woi ningshawng ni hpe shadut ya ai. (Mahte 22:39; 1 Htesaloni 2:8) Dai hku galaw ai majaw, shanhte ni a makam masham grau ngang kang wa ai. Karai Kasang hte grau hku hkau ni htep wa nna, ngwi pyaw simsa ai lam mung hkamsha lu ai.—⁠Kasa 20:35.

Lam woi ningshawng ngu ai gaw kadai ni hpe tsun a ta?
Masha nkau mi hpe, ten tup ningshawng bungli hta shang lawm na matu, hpa gaw shadut ya a ni?