Myitsu Salang Ni Gaw Hpung Hpe Gara Hku Madi Shadaw Ya A Ta?

Anhte a hpung hta shabrai sha ai hpung sara ngu ai n nga ai. De a malai, Hkristan hpung n nan de hpang ai kaw na “Hpung hpe yu lahku na matu” atsam marai rawng ai salang ni hpe aya tang da ai. (Kasa 20:28) Wenyi lam hta kung hpan ai myitsu salang ni gaw, hpung hpe woi awn ai shaloi, “adip ahkrip re ai hku zawn n nawn ai sha, dingsa myit hte galaw nga” ai. “Nsan n seng ai amyat majaw n re ai sha, htauli htaula myit hte galaw” nga ai. (1 Petru 5:1-3) Anhte a matu shanhte hpa ni galaw ya a ta?

Anhte hpe lanu lahku nna makawp maga ya ai. Myitsu salang ni gaw Chyum Laika lam matsun ni hpe tsun dan nna, wenyi lam hta makawp maga ya ai. Karai Kasang gaw ndai ahkyak ai lit ap da ai majaw, hpung masha ni hpe adip arip n di ai sha, anhte a akyu hte ngwi pyaw lam hpe shalaw ya ai. (2 Korinhtu 1:24) Sagu rem ai wa gaw, shi a sagu langai hpra hpe atsawm sha lanu lahku ai zawn, myitsu salang ni mung hpung masha langai hpra hpe chye hkra shakut ai.​—⁠Ga Shagawp 27:23.

Karai Kasang ra sharawng ai hpe gara hku galaw mai ai lam sharin ya ai. Myitsu salang ni gaw anhte a makam masham ngang kang nga na matu, zuphpawng ni hpe bat shagu woi awn nna galaw ya ai. (Kasa 15:32) Ap nawng da ai ndai myitu salang ni gaw, hkaw tsun bungli hta mung woi awn ya ai. Karai a magam bungli hte seng ai lam shagu hta, anhte hte rau galaw nna, shaman ya ai.

Hpung masha langai hpra hpe n-gun jaw ai. Buga hpung myitsu salang ni gaw, anhte wenyi lam hta matut nna kaja nga hkra karum ya na matu, nta de sa na raitim, Nawku Htingnu hta raitim, Chyum Laika hte n-gun jaw ya ai.​—⁠Yaku 5:14, 15.

Myitsu salang law malawng gaw, kanbau bungli hte dinghku lit ni nga tim, hpung lit hpe mung shakut nna gun hpai ai. Bungli shakut ai ndai myitsu salang ni gaw, anhte a hkungga la ra ai lam hpe lu ging ai.​—⁠1 Htesaloni 5:12, 13.

• Hpung myitsu salang ni a lit gaw hpa rai ta?

• Myitsu salang ni gaw hpung masha langai hpra hpe lanu lahku ai lam gara hku madun ma a ta?