DAW 21
Behtela Ngu Ai Gaw Hpa Rai Ta?
Shingni hpaji dap, U.S.A.
Germany
Kenya
Colombia
Hebre hku Behtela ngu ai gaw “Karai Kasang a nta” ngu lachyum nga ai. (Ningpawt 28:17, 19) Ndai mying gaw, hkaw tsun bungli hpe lam matsun na hte madi shadaw na matu, mungkan ting hta gawgap da ai nta ni a matu htap htuk ai amying re. Uphkang hpung gaw U.S.A., New York mung daw hta nga ai ginjaw rung e magam gun nna, mungdan law law kaw nga ai, ginjaw garan rung ni a bungli ni hpe woi awn ya ai. Ginjaw garan rung ni hta magam gun nga ai ni hpe Behtela kun dinghku ngu shaga ai. Shanhte gaw kun dinghku langai zawn kahkyin gumdin nna rau nga, rau sha, rau bungli galaw nna Chyum Laika arau hkaja ma ai.—Shakawn 133:1.
Tinang akyu ntam ai myit hte dum nta masha ni zawn magam gun ai laksan shara re. Behtela nta shagu hta, Karai a amu hpe aten tup gun hpai na matu ap nawng da ai Hkristan num, la ni nga ma ai. (Mahte 6:33) Shanhte gaw shabrai nlu tim, nga na gawk, lu sha hte jailang na matu madi shadaw gumhpraw loi mi lu ma ai. Behtela nta masha yawng hta bungli nga nna, rung, shat shadu gawk, shat sha gawk hta bungli galaw ma ai. Nkau mi gaw laika dip shapraw ai, laika buk chywi ai, nta yu lajang ai, rai hkrut ai, gram lajang ai hte kaga shara ni hta bungli galaw ai.
Hkaw tsun bungli hpe madi shadaw ya na matu amu grai law ai shara re. Behtela shagu a yaw shada lam gaw, Chyum Laika a teng man ai lam hpe, masha law law hpang de, du lu na matu re. Ndai laika buk gaw ga shadawn langai re. Ndai laika buk hpe uphkang hpung a woi awn ai npu hta ka lajang nna, mungkan ting hta nga ai tsa lam hku law ai ga gale hpung ni de, computer ladat hte sa ya ai. Behtela nta nkau hta nga ai grai lawan ai laika dip shapraw jak hte dip shapraw nna, hpung 110,000 jan de sa ya ai. Ndai hku galaw ai lam shagu hta, Behtela nta masha ni shang lawm nna, shanhte gaw ahkyak htum bungli re ai, kabu gara shiga hkaw tsun ai bungli hpe, madi shadaw ya taw ai re.—Marku 13:10.
Behtela hta kadai ni magam gun nga a ta? Shanhte a matu hpa ni madi shadaw da ya ai kun?
Behtela shagu hta galaw nga ai bungli ni gaw, grai ahkyak ai gara bungli hpe madi shadaw ya nga a ta?