Ginjaw Garan Rung Hta Hpa Ni Galaw A Ta?

Dap shagu hta amu gun nga ai behtela nta masha ni gaw, mungdan langai shing nrai, mungdan nkau mi hta nga ai hkaw tsun bungli hpe, karum shingtau ya ai. Shanhte gaw ga gale ai, laika dip shapraw ai, laika buk chywi ai, laika zing dum, nsen rim ai video dem ai shing nrai kaga bungli ni hpe galaw ma ai.

Ginjaw Garan Komiti gaw bungli ni hpe woi awn ai. Uphkang Hpung gaw, Ginjaw Garan Rung ni hta galaw nga ai bungli ni hpe woi awn na matu, marai rawng ai myitsu salang masum, shing nrai, dai hta grau lawm ai Ginjaw Garan Komiti hpe lit jaw da ai. Ginjaw Garan Komiti gaw, tinang woi awn ai buga langai hpra a galu kaba lam hte, byin pru wa ai manghkang ni hpe Uphkang Hpung hpang de shana ya ai. Dai majaw Uphkang Hpung gaw, hpang na laika ni, du wa na zuphpawng hte zuphpawng kaba ni hta, gara lam ni bang ra na hpe daw dan lu ai. Uphkang Hpung a dat kasa ni gaw, ginjaw garan rung ni hpe ayan kawan nna, Ginjaw Garan Komiti hpe, galaw ra na bungli ni hte seng ai lam matsun ni jaw ai. (Ga Shagawp 11:14) Dat kasa ni kawan ai aten hta, Ginjaw Garan Rung woi awn ai buga hpung ni hpe n-gun jaw na matu, mungga langai lawm ai laksan lamang langai hpe hkyen lajang ma ai.

Buga hpung ni hpe karum shingtau ya ai. Ginjaw garan rung kaw na lit nga ai hpunau ni gaw, hpung nnan ni hpe hpawng de ai lam ni hta woi awn ai. Ginjaw garan rung a woi awn ai buga hta amu gun nga ai lam woi ningshawng ni, sasana amu gun ni, hpung kawan salang ni a bungli ni hpe mung lam matsun ya ai. Zuphpawng ni, zuphpawng kaba ni hpe hkyen lajang ya nna, Nawku Htingnu nnan gawgap ai lam ni hpe lajang ya ai. Hpung ni hta ra rawng ai laili laika ni sa ya ai hta mung woi awn ya ai. Ginjaw garan rung hta galaw ai bungli yawng gaw, hkaw tsun bungli hpe atsawm sha ngut kre na matu karum ya ai.​—⁠1 Korinhtu 14:33, 40.

• Ginjaw Garan Komiti gaw Uphkang Hpung hpe gara hku karum ya a ta?

• Ginjaw garan rung hta gara bungli ni hpe galaw nga a ta?