Karai Kasang Hte Gara Hku Ni Htep Lu Na Ta?

1. Akyu hpyi ga yawng hpe Karai Kasang madat ya ai kun?

Karai Kasang gaw, masha amyu baw shagu hpe, akyu hpyi nna shi hte ni htep hkra galaw na matu saw shaga nga ai. (Shakawn 65:​2) Raitim, akyu hpyi ga yawng hpe n madat ya ai. Ga shadawn, madu jan hpe roi rip ai madu wa a akyu hpyi ga hpe madat ya na nre. (1 Petru 3:​7) Israela masha ni gaw n hkru ai amu hpe dingsang galaw ai majaw, shanhte a akyu hpyi ga hpe n madat ya ai. Akyu hpyi ai gaw laksan ahkang langai re. Yubak kaba galaw hkrup ai raitim, myit malai lu ai ni a akyu hpyi ga hpe gaw madat ya ai.—Esaia 1:​15; 55:7 hpe hti u.

Akyu Hpyi Ga Yawng Hpe Karai Kasang Madat Ya Ai Kun? ngu ai video hpe yu u.

2. Gara hku akyu hpyi ra a ta?

Nawku dawjau ai lam hta akyu hpyi ai lam mung lawm ai. Hpan Da Madu Yehowa hpe sha, akyu hpyi ra ai. (Mahte 4:​10; 6:​9) Nhkum tsup ai masha ni re ai majaw, anhte a yubak a matu si hkam ya ai Yesu a amying kaw na akyu hpyi ra ai. (Yawhan 14:​6) Akyu hpyi ai shaloi lam langai hpe sha kahtap tsun ai, ka matsing da nna hpyi ai hpe Yehowa nra ai. Anhte a myit masin hta hkamsha ai lam ni, myit mang ai lam ni hpe, tsun dan shangun mayu ai.—Mahte 6:7; Hpilipi 4:​6, 7 ni hpe hti u.

Karai Kasang gaw, nsen n pru ai akyu hpyi ga hpe mung na lu ai. (1 Samuela 1:​12, 13) Shi gaw anhte hpe aten shagu akyu hpyi na matu saw shaga ai. Jahpawt yup rawt ai, shana yupra shang ai, shat sha ai, manghkang byin ai aten ni hta akyu hpyi mai ai.—Shakawn Kungdawn 55:22; Mahte 15:​36 ni hpe hti u.

3. Hkristan ni hpa majaw shada da zuphpawng ra a ta?

Karai Kasang hte ni htep na matu nloi ai. Hpa majaw nga yang, Karai Kasang hpe nkam sham ai ni hte, mungkan ga hpe simsa hkra galaw ya na ngu ai shi a ga sadi hpe, jahpoi asawng di ai ni a lapran hta anhte asak hkrung nga ai majaw re. (2 Timohti 3:​1, 4; 2 Petru 3:​3, 13) Dai majaw makam masham bung ai shada da n-gun jaw ra ai.—Hebre 10:​24, 25 hpe hti u.

Karai Kasang hpe tsawra ai ni hte kanawn mazum ai gaw Karai Kasang hte ni htep na matu karum ya ai. Yehowa Sakse Ni a zuphpawng hta, kaga masha ni a makam masham kaw na akyu lu la mai ai.—Roma 1:​11, 12 hpe hti u.

4. Karai Kasang hte gara hku ni htep lu na ta?

Chyum Laika kaw na sharin la ai ni hpe myit sawn sumru nna Yehowa hte ni htep mai ai. Karai Kasang a ga sadi ni, galaw ai lam ni hte, lam matsun ni hpe myit sawn sumru yu u. Akyu hpyi ai hte myit sawn sumru ai gaw, Karai Kasang a tsawra myit hte nyan hpaji hpe, manu shadan chye wa na matu, karum ya na re.—Yawshu 1:8; Shakawn Kungdawn 1:​1-3 ni hpe hti u.

Karai Kasang hpe kamhpa yang she, shi hte ni htep wa na re. Raitim, makam masham gaw, namhpun bang ya ra ai hpun langai hte bung ai. Nang chye na hkap la da ai lam ni hpe, bai myit sawn sumru nna, na a makam masham ngang kang wa hkra galaw ra na re.—Mahte 4:4; Hebre 11:​1, 6 ni hpe hti u.

5. Karai Kasang hte ni htep ai lam gaw nang hpe gara hku akyu jaw ai kun?

Yehowa gaw shi hpe tsawra ai ni hpe lanu lahku nga ai. Shanhte a makam masham hte, htani htana asak myit mada lam hpe, hten bya shangun ai lam shagu kaw na, makawp maga ya ai. (Shakawn 91:​1, 2, 7-​10) Shi gaw anhte a hkamja lam hte, ngwi pyaw ai lam jahten ya ai prat hkrun lam hpe, n hkan sa na matu sadi jaw ai. Yehowa gaw, kaja htum ai prat hkrun lam hpe, sharin achyin ya ai.—Shakawn Kungdawn 73:​27, 28; Yaku 4:​4, 8 ni hpe hti u.