Yakhkak Jamjau Ai Lam Ni Htum Mat Na Kun?

Chyum Laika Hta Tsun Da Ai Lam

“Karai Kasang . . . gaw shanhte a myi hta na myi prawi pru ma pru katsut kau ya na ra ai: htawm hpang e si hkrung si htan n nga lu na sai; sharung shayawt ai, hkrap ngu hkrap ngoi ai, hki si ba si ai mung, n nga lu na sai.”​—⁠Shingran 21:3, 4.

Chyum Laika Hta Na Nang Lu La Mai Ai Akyu Ni

Anhte a manghkang ni hpe Karai Kasang byin shangun ai n re nga nna chye na lu ai.​—⁠Yaku 1:13.

Anhte jamjau ai shaloi hkam sha ai hpe, Karai Kasang chye ya ai. Dai hpe anhte chye na lu ai majaw myit shalan shabran lu ai.​—Zehkaria 2:8.

Yakhkak jamjau ai ni yawng htum mat na hpe myit mada mai ai.​—⁠Shakawn Kungdawn 37:9-11.

Chyum Laika Hta Tsun Da Ai Lam Ni Hpe Kam Mai A Ni?

Kam mai ai lam ni nga ai. Nkau mi gaw:

• Karai Kasang gaw yakhkak jamjau ai hte n tara ai hpe nju ndawng ai. Chyum Laika prat hta, Karai Kasang hpe nawku ai ni, aroi arip hkrum ai shaloi, shi gara hku hkam sha ai hpe myit yu ga. Chyum Laika hta “shanhte sharu shatsang zingri zingrat hkrum sha ai majaw” shi yawn hkyen ai nga nna tsun ai.​—⁠Tara Agyi 2:18.

  Kaga masha ni hpe, jamjau hkra galaw ai ni hpe, Karai Kasang grai nju ai. Ga shadawn, “Mara n kap ai wa a sai hpe jahkaw kau ai lata” ni hpe Karai Kasang matsat ai nga nna Chyum Laika hta tsun da ai. ​—⁠Ga Shagawp 6:16, 17.

• Karai Kasang gaw anhte langai hpra hpe lanu lahku nga ai. “Tinang hkum hta hkra ai ana ahkya hte yawn hkyen” ai hpe shinggyim masha ni sha chye ai nrai, Yehowa mung chye nga ai.​—⁠2 Hkawhkam Labau 6:29, 30.

  Yehowa gaw, shi a mungdan hta masha langai hpra a yakhkak jamjau lam ni hpe, kade nna yang jahtum ya sana re. (Mahte 6:9, 10) Ndai laman, shi hpe teng man ai myit hte tam ai ni hpe, shalan shabran ya nga ai.​—⁠Kasa 17:27; 2 Korinhtu 1:3, 4.