Yehowa Hte Shi Kawa Hpe Myit Pyaw Shangun Ai Numsha

Dai numsha hpe sumla hta mu ai i?— Shi gaw Yephta a kasha re. Chyum Laika hta shi a mying hpe ntsun da tim, Yehowa hte shi kawa a myit pyaw hkra galaw wa ai hpe anhte chye lu ai. Shi hte shi kawa Yephta a lam hpe hti yu ga.

Yephta gaw masha kaja rai nna, kasha hpe Yehowa a lam galoi mung sharin ya ai. Shi gaw n-gun grai ja nna, ningbaw kaja mung re. Dai majaw, Israela masha ni gaw, shanhte a hpyen ni hpe gasat ai hta, woi awn na matu shi hpe tsun ai.

Yephta gaw, awng dang hkra karum ya rit nga nna, Karai Kasang kaw akyu hpyi ai. Awng dang nna, nta de bai wa ai shaloi, shawng nnan sa tau ai wa hpe Yehowa hpe jaw na nga nna Yephta ga sadi jaw ai. Dai wa gaw, Karai Kasang a sum hta, prat tup amu gun ra na re. Karai Kasang a sum ngu ai gaw Karai Kasang hpe nawku ai nta re. Ya, Yephta awng dang sai. Shi bai wa ai shaloi shawng nnan sa tau ai wa gaw kadai rai na ta?—

Yephta a kasha shingtai re. Ya, Yephta shi kasha hte hka ra mat sai. Shi grai myit npyaw mat ai. Raitim, Karai Kasang hpe shi ga sadi jaw da ngut sai. Shi a kasha gaw ‘Wa e, Yehowa hpe ga sadi jaw da yang, sadi dung ra na re’ nga nna tsun ai.

Yephta a kasha mung myit npyaw na re. Karai Kasang a sum hta nga yang, dinghku de ai, ma shangai ai ni n mai galaw sai. Raitim, shi kawa hpe sadi dung shangun mayu nna, Yehowa hpe mung myit pyaw shangun mayu ai. Dai gaw, dinghku de nna, ma shangai ai hta, grau ahkyak ai majaw re. Dai majaw, shi Karai Kasang a sum hta, prat tup amu gun na matu sa mat wa sai.

Yehowa hte shi a kawa myit pyaw hkra, shi galaw wa ai kun?— Galaw wa ai. Ma ni mung, Yehowa hpe tsawra nna shi a ga madat yang, Yephta a kasha hte bung na re. Dai rai yang, Nu yan Wa hte Yehowa mung grai pyaw na re.