Yehowa A Lam Yeremia Ntsun Ai Sha Nnga Ai

Anhte Yehowa a lam tsun ai shaloi, kalang lang masha ni gaw mani asawng ai. Masin pawt ma ai. Dai hku byin yang, Yehowa a lam nkam tsun wa ai. Ma ni mung dai hku byin ga ai i?— Yehowa hpe tsawra ai la sha langai gaw, Yehowa a lam nkam tsun mat ai du hkra, byin ga ai ngu Chyum Laika hta tsun da ai. Shi gaw Yeremia re. Shi a lam hpe hti yu ga.

Yeremia brang ram prat hta, Yehowa gaw masha ni nhkru ai amu n galaw na matu sadi jaw shangun ai. Dai gaw Yeremia a matu grai yak ai majaw shi hkrit nga ai. Dai majaw ‘hpa tsun na hpe ngai nchye ai. Ngai ma naw rai nga ai’ ngu Yehowa hpe shi tsun ai. Dai shaloi ‘hkum hkrit, ngai nang hpe karum ya na’ ngu Yehowa tsun ai.

Nhkru ai hpe matut nna galaw nga yang, ari jaw hkrum sana ngu masha ni hpe Yeremia sadi jaw ai. Yeremia tsun ai hpe masha ni madat ai kun?— Shanhte gaw n madat ai sha mani asawng ma ai. Masin pawt ma ai. Nkau mi gaw shi hpe sat kau mayu ma ai. Yeremia gara hku hkamsha ai kun?— Shi grai hkrit ai majaw ‘ngai Yehowa a lam ntsun sana’ ngu tsun ai. Shi kaja wa ntsun ai sha nga ai kun?— N nga ai. Shi Yehowa hpe grai tsawra ai majaw shi a lam ntsun ai sha n nga lu ai. Yehowa a lam matut nna tsun ai majaw hkye hkrang la hkrum ai.

Kalang mi hta nhkru ai masha nkau mi gaw Yeremia hpe hkumpup ni hpring nga ai nhkun kata jahkrat bang kau ai. Lu na, Sha na hpa mung n nga ai. Dai kaw sha si mat shangun mayu ai. Raitim, Yehowa shi hpe dai nhkun kaw na hkye la ai.

Yeremia kaw na hpa sharin la mai na ta?— Hkrit tim Yehowa a lam ntsun ai sha Yeremia n nga ai. Ma ni mung Yehowa a lam masha ni hpe tsun dan ai shaloi, shanhte mani a sawng na. Masin pawt na. Dai shaloi kaya nna, hkrit wa na re. Raitim, Yehowa a lam ntsun ai sha hkum nga yaw. Yeremia hpe karum ya ai zawn ma ni hpe mung, Yehowa galoi mung karum ya na re.