Galoi Mung Madat Mara Ai Yesu

Nu yan Wa a ga hpe ayan madat na matu loi ai i?— Kalang lang gaw yak na re. Yesu gaw kadai na ga hpe madat ai rai?— Shi a Kanu yan Kawa hte Yehowa a ga hpe madat ai. Shi a kasi hpe anhte chye da yang, yak ai aten hta pyi, Nu yan Wa a ga hpe madat mara lu na re. Yesu a lam hpe hti yu ga.

Yesu mungkan ga de n sa shi yang, sumsing lamu hta shi a Kawa Yehowa hte rau nga ai. Ga ntsa hta mung Yesu kaw Kanu Kawa nga ai. Shan yan gaw Yosep hte Mari re. Shan yan Yesu a Kanu Kawa gara hku byin wa ai kun?—

Yehowa gaw mau hpa lam hte sumsing lamu na Yesu a asak hpe Mari a kan kata bang dat ya ai. Kaga ma ni zawn, Yesu mung Mari a kan hta kaba wa nna, shata 9 daram na ai hpang mungkan ntsa hta Yesu shangai wa ai. Dai hku nna Mari hte Yosep gaw, ga ntsa na Yesu a Kanu Kawa byin wa ai.

Yesu asak 12 ning du ai shaloi, shi a Kawa Yehowa hpe kade daram tsawra ai lam madun wa ai. Dai gaw, Yesu hte shi a nta masha ni, grai tsan ai Yerusalem mare de, Shalai Wa Ai Poi sa ai shaloi byin ai re. Nta de bai wa ai lam hta, Yosep hte Mari gaw Yesu hpe n mu ma ai. Yesu gara de du mat ai kun?—

Yosep hte Mari gaw Yesu hpe tam na matu, Yerusalem de lawan wan bai n htang sa ai. Yesu hpe tam n mu ai majaw, grai myit tsang nga ma ai. Masum ya na ai hpang she nawku htingnu kata hta mu ma ai. Nawku htingnu hta Yesu hpa majaw nga nga ai kun?— Dai shara hta, shi Kawa Yehowa a lam sharin la lu ai majaw re. Yehowa hpe tsawra nna, shi myit pyaw hkra gara hku galaw ra na hpe chye mayu ai. Shi masha kaba byin wa ai aten hta mung, Yehowa a ga ayan madat ai. Madat na matu nloi tim, madat yang tsinyam hkrum na hpe chye tim madat mara ai. Yosep hte Mari a ga hpe mung Yesu madat ai kun?— Madat ai ngu Chyum Laika hta tsun da ai.

Yesu kaw na hpa sharin la mai na ta?— Nu yan Wa a ga hpe, madat na matu yak ai aten hta mung, madat ra ai. Ma ni Nu yan Wa a ga madat na kun?—