Daw 3
Myit Machyi Ai Lam Ni—Tinang Hpe “Mara Langai Ngai” Galaw Hkrup Yang
“Nauna langai gaw shi a gumhpraw lagu ai ngu ngai hpe shadu ai. Dai hpe hpung na kaga hpunau nauna ni chye mat ai shaloi, nkau gaw shi hpang de lawm ai, nkau gaw ngai hpang de lawm ma ai. Hpang de gaw, ngai n lagu ai hpe shi chye mat ai. Shi hpyi nem ai raitim, ngai hpe dai hku shadu ai majaw gara hku mung mara n lu raw ya ai”—Linda.
Nang mung nauna Linda zawn, hpunau nauna langai ngai a majaw myit machyi ga ai kun? Kaga masha ni galaw ai lam a majaw, myit machyi mat nna wenyi lam hta n-gun yawm mat ai ni nga ai. Nang mung dai zawn byin nga ai kun?
Marai Langai Ngai Gaw “Karai Kasang A Tsaw Ra Ai Hta Na Anhte Hpe” Jahka Kau Lu Ai kun?
Anhte hpe myit machyi hkra galaw ai hpunau nauna hpe mara raw ya na matu n loi ai. Raitim, Hkristan ni gaw shada da tsawra ra ai. (Yawhan 13:34, 35) Hpunau nauna langai ngai gaw anhte hpe tsun shut, galaw shut yang, myit machyi mat chye ai.—Shakawn 55:12.
Hkristan ni a lapran hta “mara langai ngai” galaw hkrup wa chye ai nga nna Chyum Laika hta tsun da ai. (Kolose 3:13) Dai zawn, tinang nan hkrum wa yang she, hparan na matu n loi ai hpe chye wa ai. Anhte hpe karum ya lu ai lam lama ma nga ai kun? Chyum Laika a npawt tara masum hpe yu yu ga:
Sumsing lamu na anhte a Wa gaw yawng hpe chye ai. Yehowa gaw anhte hkrum nga ai n tara ai lam ni, jamjau ai lam ni yawng hpe chye ai. (Hebre 4:13) Dai hta n-ga, anhte jamjau hkrum yang, Yehowa mung myit n pyaw ai. (Esaia 63:9) Karai Kasang gaw ‘tsin-yam tsindam, zingri zingrat’, makam masham bung shada, (sh) kaga hpa a majaw mung, shi a “tsawra ai hta na anhte hpe” jahka kau na ahkang jaw na n re. (Roma 8:35, 36, 38, 39) Dai majaw, anhte mung masha langai shing nrai lama ma a majaw Karai Kasang hte anhte tsan gang mat na matu ahkang jaw na n re.
Mara raw ya ai gaw dai hpe ahpa atang sawn la ai n re. Tinang a ntsa galaw shut ai ni hpe mara raw ya ai gaw, shi shut ai hpe ahpa atang sawn la ai, n chye masu su ai, shi n shut ai ngu tsun mayu ai n re. Yehowa gaw mara galaw ai hpe n ra sharawng ai. Raitim, kaja wa myit malai lu ai ni hpe gaw mara raw ya ai. (Shakawn 103:12, 13; Habaku 1:13) Kaga masha ni hpe mara raw ya na matu Yehowa tsun ai gaw, shi hpe kasi la na matu tsun ai re. Shi gaw “prat ding sa e a pawt nga na nrai.”—Shakawn 103:9; Mahte 6:14.
Kaga masha a mara hpe n matsing da ai gaw anhte a matu akyu nga ai. Gara hku na kun? Ndai ga shadawn hpe myit yu u. Nau n li ai nlung tawng langai hpe hta lang nna lata hpe latsawn da yu u. Nang chyahkring mi gaw lu hpai na re. Raitim, kade na hkra hpai lu na? Minit kachyi mi kun? Hkying hkum mi, (sh) dai hta grau na na kun? Grai na hkra hpai da yang, na lata tsu wa na re. Nlung tawng gaw grau li wa ai n re. Grai na hkra hpai da ai majaw, grau li wa ai ngu hkamsha wa ai re. Masha ni a mara hpe matsing da ai mung dai hte bung ai. Kaji kajaw shut ai lam hpe sha raitim, na na matsing da yang, tinang sha hkra machyi na re. Dai majaw kaga masha ni hpe mara raw ya na matu Yehowa hpyi shawn da ai re. Mara raw ya yang anhte akyu lu na re.—Ga Shagawp 11:17.
Kaga masha a mara hpe n matsing da ai gaw anhte a matu akyu nga ai
“Ngai Hpe Yehowa Ga Shaga Nga Ai Zawn Hkam Sha Ai”
Nauna langai shi ntsa galaw shut ai hpe, n matsing da na matu Linda hpe hpa gaw karum ya ai kun? Mara raw ya ra ai lam hte seng ai Chyum daw ni hpe shi sawn dinglik ai. (Shakawn 130:3, 4) Dai shaloi, kaga masha ni a mara hpe raw ya yang, tinang a mara hpe Yehowa raw ya na ngu ai lam gaw Linda a myit salum hpe hkra ya ai. (Ehpesu 4:32–5:2) Dai majaw, “ngai hpe Yehowa ga shaga nga ai zawn hkam sha ai” ngu shi tsun wa ai.
Hpang de gaw, Linda myit n machyi mat sai. Linda gaw, dai nauna hpe mara raw kau ya ai majaw, ya nga yang shan lahkawng grai tsawra ai manang ni byin nga sai. Linda mung matut nna Yehowa a magam hpe gun nga sai. Nang hpe mung Yehowa dai zawn sha karum ya mayu ai hpe kam u.