Daw 5
“Sagu Rem Wa Hte Nanhte A Myit Masin A Hpung Up Wa Hpang De, Nhtang Wa” U
Ndai brochure hta bawngban wa ai mayak mahkak ni hta na, langai lahkawng hpe nang hkrum nga ai kun? Nang langai sha dai hku hkrum nga ai n re. Chyum Laika prat hte dai ni aten na Karai Kasang a sadi dung ai mayam ni mung, dai zawn mayak mahkak ni hkrum wa ai. Yehowa gaw, dai mayak mahkak ni hpe hparan lu hkra shanhte hpe karum ya wa ai zawn, nang hpe mung karum ya na re.
“Yehowa ngai hpe galoi n kabai kau ai. Yehowa hpang de bai nhtang wa ra ai hpe chye wa ai.”
Karai Kasang hpang de nang bai wa yang, shi hkap tau la na hpe kam u. Myit tsang lam ni hte myit daw ai lam ni hpe hparan lu hkra, san seng ai myit hte myit simsa lam lu hkra, Yehowa karum ya na re. Dai hpang, Yehowa a magam bungli hpe hpunau nauna ni hte arau bai gun hpai mayu ai myit nga wa na re. “Nanhte nlang sagu zawn lam dam mat myit ti mung, ya gaw, dai Sagu rem wa hte nanhte a myit masin a Hpung up wa hpang de, nhtang wa ma nit dai” ngu Petru tsun ai tsa ban langai na Hkristan nkau mi hte na mabyin bung na re.—1 Petru 2:25.
Nang galaw lu ai lam yawng hta Yehowa hpang de bai nhtang wa ai gaw kaja htum re. Hpa majaw nga yang, Yehowa hpe myit pyaw hkra galaw nga ai majaw re. (Ga Shagawp 27:11) Yehowa mung hkam sha chye ai majaw, anhte galaw ai lam ni gaw shi ntsa akyu nga ai. Raitim, shi hpe tsawra nna nawku na matu anhte hpe atik anang n-gun n jaw ai. (Tara Jahprang 30:19, 20) Yehowa hpe myit masin mahkra hte tsawra nna, nawku na matu tinang nan dawdan ra ai. Anhte dai hku galaw yang, Yehowa hpe sadi dung ai lam madun ai re majaw, shi grai myit pyaw na re. Yehowa sha lu ging ai nawku daw jau lam hpe, anhte jaw nga ai majaw lu la ai ngwi pyaw lam gaw, hpa hte mung shadawn n mai ai.—Kasa 20:35; Shingran 4:11.
Dai hta n-ga, Karai Kasang hpe nang bai nawku wa ai shaloi, shi hte bai hku hkau wa na re. (Luka 11:28) Mungkan ting na masha ni gaw, ‘Anhte hpa majaw asak hkrung nga ai kun?’ ngu nna myit ma ai. Asak hkrung nga ai lam a yaw shada lam hpe mung masha ni chye mayu ma ai. Karai Kasang gaw, shi a ga madat nna shi hpe nawku let asak hkrung na matu yaw shada nna masha ni hpe hpan da ai re. Yehowa hpe tsawra ai myit hte nawku nga ai majaw lu ai ngwi pyaw lam gaw yawng mayawng hta grau kaja ai.—Shakawn 63:1-5.
Yehowa gaw nang hpe shi hpang de bai nhtang wa shangun mayu ai hpe dum u. Dai hpe gara hku kam mai na kun? Myit yu u: Ndai brochure hpe akyu hpyi nna atsawm lajang da ya ai re. Hpung myitsu salang shing nrai hpunau nauna langai ngai gaw, ndai brochure hpe na a matu la wa ya ai rai na re. Nang brochure hpe hti ai shaloi, chye wa ai lam ni hte maren galaw mayu wa na re. Ndai lam ni gaw, nang hpe Yehowa n malap shi ai hpe sakse madun ai re. Dai hku nna, Karai Kasang gaw nang bai nhtang wa na matu si mani ai hku saw shaga nga ai.—Yawhan 6:44.
Yehowa gaw lam shai mat ai shi a sagu ni hpe n malap ai ngu chye ai majaw anhte n-gun lu ga ai. Nauna Donna mung dai zawn hkam sha wa ai. Shi ndai hku tsun ai: “Ngai teng man ai lam hte angwi ngwi tsan mat ai. Raitim, ‘Karai Wa e, ngai hpe manaw yu nna, Nye a myit mang ai lam hpe chye ya e; Ngai hpe dinglik yu nna, ngai myit ai hku hpe chye ya e. Yawn mai ai lam de, ngai hkan taw gaw, yu yu u; Htani htana grin nga ai lam de, ngai hpe woi wa e law’ ngu, Shakawn 139:23, 24 hta lawm ai ga ni hpe ngai chyahkring hkring bai myit ai. Ngai gaw ndai mungkan hte n seng ai hpe ngai chye ai. Mungkan ra ai hku mung ngai n lu nga ai. Ngai nga ra na shara gaw Yehowa a uhpung sha re ai hpe chye ai. Yehowa ngai hpe galoi n kabai kau ai, shi hpang de bai nhtang wa ra ai hpe chye wa ai. Dai hku galaw wa ai majaw ngai grai pyaw ai.”
Yehowa hpang de bai nhtang wa ai shaloi shi nang hpe hkap tau la na re
“Yehowa hta kabu gara nga” lu u ga, anhte nang hpe akyu hpyi ya ai. (Nehemia 8:10) Yehowa hpang de bai nhtang wa ai hpe, nang galoi mung myit malai lu na n re.