Karai Kasang A Ga Hpe Adam Yan Ewa N Madat

Lani mi hta, Ewa hkrai sha nga taw ai aten hta lapu langai gaw shi hpe ga sa shaga ai. Lapu ndai hku san ai: ‘Karai Kasang gaw hpun mahkra hta na namsi ni hpe n sha shangun ai kun?’ Ewa ndai hku bai tsun ai: ‘Hpun langai hta lai nna ngam ai yawng hpe an sha mai ai. Dai hpun kaw na namsi hpe sha yang gaw an si na re.’ Lapu ndai hku bai tsun ai: ‘Nang n si ai. Dai hpun kaw na namsi hpe sha dat yang, nang gaw Karai Kasang zawn byin wa na re.’ Dai ga gaw jaw ai i? N jaw ai. Masu ga re. Raitim, Ewa gaw dai ga hpe kam mat ai. Dai namsi hpe shi yu magang grau sha mayu wa magang re. Shi namsi hpe sha kau nna Adam hpe mung jaw sha ai. Karai Kasang a ga n madat yang shan si na hpe Adam chye ai. Raitim, namsi hpe Adam sha kau ai.

Dai shana maga hta, Yehowa gaw Adam yan Ewa hpe ga sa shaga ai. Shi a ga hpe hpa majaw n madat ai kun? nga nna shan hpe san ai. Ewa gaw lapu hpe mara shagun nna, Adam gaw Ewa hpe mara shagun ai. Adam yan Ewa ga n madat ai majaw, Yehowa gaw shan hpe Edin sun kaw nna shapraw kau ai. Shan galoi mung bai n lu shang hkra, sun a chyinghka lam hta sin na matu, wan nhtu hte lamu kasa ni hpe tawn da ai.

Ewa hpe sa masu ai wa hpe mung ari jaw na ngu Yehowa tsun ai. Lapu gaw Ewa hpe gaja wa ga sa shaga ai n re. Yehowa gaw lapu ni ga lu shaga hkra n hpan da ya ai. N hkru ai lamu kasa gaw lapu ga shaga hkra galaw ai re. Dai hku galaw nna Ewa hpe masu hkalem dat ai. Dai lamu kasa a amying gaw Nat Satan re. Yehowa gaw htawm hpang hta Satan hpe jahten kau na re. Dai hpang Satan gaw masha ni hpe n kaja ai lam galaw na matu n lu hkalem sai.