Lawt A Madu Jan Hpe Dum Nga Mu

Lawt gaw shi kawa na kanau Abraham hte Hkanan mung hta arau nga ai. Lani hte lani, Abraham hte Lawt hta dusat ni law wa ai majaw udat shara n law mat sai. Abraham gaw Lawt hpe ndai hku tsun ai: ‘Anhte gaw shara mi hta sha rau nga na matu n mai byin sai. Nang gara shara kaw nga mayu ai hpe chyeju hte lata u. Nang n lata ai shara hta ngai nga na.’ Abraham a tingkyeng akyu n tam ai myit hpe chye lu ai.

Lawt gaw Sodom mare makau na grai kaja ai shara hpe mu ai. Dai hta hka law law nga nna tsit tsawm ai tsing du mung tu ai. Dai majaw, shi dai shara hpe lata nna shi a dinghku hte arau dai de htawt mat wa ai.

Sodom mare hte, dai mare hte ni ai Gomora mare hta nga ai masha ni gaw grai n hkru ma ai. Dai majaw, Yehowa gaw dai mare ni hpe jahten kau na matu dawdan wa ai. Raitim, Karai Kasang gaw Lawt hte shi a dinghku hpe hkye la mayu ai. Dai majaw, lamu kasa lahkawng hpe shangun dat nna ndai hku tsun shangun ai: ‘Ndai mare kaw nna alawan pru mat u! Yehowa gaw ndai mare hpe jahten sana re.’

Lawt gaw kalang ta n pru ai sha lanyan taw nga ai. Dai majaw, lamu kasa yan gaw Lawt, shi a madu jan hte Lawt a shayi sha lahkawng hpe lata dun let, mare kaw nna woi hprawng ai. Ngut nna ndai hku tsun ai: ‘Nanhte a asak lawt na matu kagat u! Hpang de hkum kayin yu. Yu na nga yang, nanhte si na!’

Shanhte gaw Zora mare de du ai shaloi, Yehowa gaw Sodom hte Gomora ntsa kan hte grung ai wan jahtu dat ai. Dai mare lahkawng gaw tsep kawp htenza mat ai. Lawt a madu jan gaw Yehowa a ga n madat ai sha, hpang de kayin yu dat ai majaw jum shadaw tai mat ai. Raitim, Lawt hte shi a shayi sha lahkawng gaw Yehowa a ga madat ai majaw asak lawt wa ai. Lawt a madu jan jahten hkrum ai majaw shanhte grai myit n pyaw ai. Raitim, shanhte Yehowa a ga madat ai majaw grai pyaw ma ai.