Karai Kasang A Ga Madat Ai Mayam Langai

Yaku asak kaba ai shaloi she Yosep hpe lu wa ai. Dai majaw, Yaku gaw kaga kasha ni hta grau nna Yosep hpe tsawra ai. Yaku gaw, Yosep hpe grai tsawra ai lam kahpu ni chye ai. Dai majaw, shanhte gara hku hkamsha ai kun? Yosep hpe manawn nna n ju ma ai. Yosep gaw mauhpa yupmang ni mu ai shaloi, shi a kahpu ni hpe tsun dan ai. Dai yupmang ni gaw, lani mi na aten hta shanhte gaw shi hpe sa gum dagup ra na ngu ai lachyum re. Dai majaw, shi hpe grau nna n ju wa ai.

Lani mi hta, Yosep a kahpu ni gaw Shehkem mare makau hta sagu rem nga ma ai. Yaku gaw shanhte hpe sa yu na matu Yosep hpe shangun dat ai. Yosep sa wa ai hpe shanhte tsan tsan kaw nna mu ai shaloi, ndai hku tsun ma ai: ‘Yupmang htai ai wa sa wa sai. Shi hpe sat kau ga.’ Shanhte gaw shi hpe magra nna, grai sung ai nhkun de jahkrat bang kau ai. Raitim, kahpu Yuda gaw ndai hku tsun ai: ‘Shi hpe hkum sat. Mayam hku nna dut sha kau ga.’ Dai majaw, shanhte gaw Egutu mung de sa ai Midian hpaga la ni hpang de gumhpraw lap 20 hte Yosep hpe dut kau ai.

Yosep a kahpu ni gaw, shi a palawng hpe bainam sai hta dip bang nna kawa hpang de sa dat ai. Ngut nna ndai hku tsun ai: ‘Na kasha na palawng n rai ni?’ Yosep hpe grai zai ai dusat langai kawa sha kau sai ngu Yaku shadu ai. Shi grai na hkra yawn taw ai. Shi hpe kadai mung n shalan ya lu ai.

Egutu mung hta, Yosep gaw ahkang aya kaba ai Hputihpa a nta hta, mayam hku nna dut sha hkrum ai. Raitim, Yehowa gaw Yosep hte arau re. Yosep bungli kang ka ai hpe Hputihpa mu ai majaw, shi hpe kam mat ai. Dai hpang kade nna yang Yosep gaw, Hputihpa madu ai arai yawng hpe yu lajang ra ai wa byin wa ai.

Hputihpa a madu jan gaw, Yosep hkum hkrang galu kaba nna grai tsawm ai hpe sadi hkrup ai. Shi hte arau yup na matu shani shagu tsun ai. Yosep gara hku galaw na kun? Shi ningdang kau nna ndai hku tsun ai: ‘Ndai gaw shut ai. Nye madu gaw ngai hpe kam ai. Nang gaw shi a madu jan re. Ngai nang hte arau yup yang, Karai Kasang hpe shut hpyit ai re.’

Lani mi hta, Hputihpa a madu jan gaw shi hte arau yup na matu Yosep hpe atik anang galaw ai. Yosep a palawng hpe shi magra wa ai shaloi, Yosep hprawng mat wa ai. Hputihpa nta de wa ai shaloi, Yosep gaw shi hte arau yup na matu shakut ai ngu shi a madu jan tsun dan ai. Shi gaw teng ai hku n tsun ai. Hputihpa gaw grai masin pawt nna, Yosep hpe htawng de bang kau ai. Raitim, Yehowa gaw Yosep hpe n malap kau ai.