Shanhte Ga Sadi N Dung

Yehowa gaw Mawshe hpe: ‘Ngai nga ai bum de lung wa rit. Nye a tara ni hpe lungpa ni hta ka nna nang hpe ngai jaw na’ nga nna tsun ai. Mawshe mung dai bum ntsa de lung nna dai kaw nhtoi 40 ya tup sa nga ai. Shi dai kaw nga ai shaloi, Yehowa gaw lungpa lahkawng hta Tara Kanu Shi hpe ka ya nna, Mawshe hpe jaw ai.

Aten loi mi na ai hpang, Israela ni gaw shanhte hpe Mawshe kau da sai ngu myit wa ai. Shanhte gaw Arun hpe: ‘Anhte hpe woi awn na marai langai ra ai. Anhte a matu hpara langai galaw ya rit’ nga nna tsun ai. Arun gaw: ‘Nanhte a ja ni hpe jaw rit’ nga nna tsun ai. Shi gaw dai ja ni hpe shabyawng kau nna dumsu sumla langai galaw ya ai. Israela ni gaw: ‘Ndai dumsu sumla gaw Egutu mung kaw nna anhte hpe shapraw wa ai Karai rai nga ai!’ nga nna tsun ai. Shanhte gaw dai ja dumsu hpe nawku hpang wa nna poi kaba galaw ai. Dai gaw shut ai kun? Shut ai. Hpa majaw nga yang, shanhte gaw Yehowa hpe sha nawku na nga nna ga sadi jaw wa ai majaw re. Ya, shanhte dai ga sadi hpe n dung mat sai.

Israela ni hpa byin taw sai hpe Yehowa mu nna, Mawshe hpe: ‘Amyu masha ni hpang yu wa su. Shanhte gaw nye a ga n madat nna shut shai ai hpara hpe nawku nga ma sai’ nga nna tsun ai. Mawshe mung lungpa lahkawng hpe hpai wa nna bum lagaw de yu wa ai.

Dap hte ni wa ai hte maren, Mawshe gaw masha ni a mahkawn hkawn ai nsen hpe na ai. Shaloi Israela masha ni gaw ka manawt nna dumsu sumla hpe gum dagup nga ai hpe shi mu ai. Mawshe grai masin pawt ai. Lungpa lahkawng hpe ga de kabai jahkrat kau ai majaw adaw achyen ga ayai mat ai. Shi gaw dai dumsu sumla hpe kalang ta jahten kau ai. Bai Arun hpe mung: ‘Ndai hkrit hpa amu hpe nang galaw wa hkra nang hpe Israela ni kaning rai galaw a ta?’ nga nna tsun ai. Arun mung: ‘Masin hkum pawt rit. Ndai masha ni gaw kaning re ai masha re ai hpe nang mung chye ai. Shanhte gaw hpara langai hpyi shawn ai majaw, ngai gaw shanhte a ja ni hpe wan hta bang kau nna, ndai dumsu sumla pru wa ai’ nga nna bai htang ai. Arun dai hku n galaw ging ai. Mawshe gaw bum ntsa bai lung nna Israela ni hpe mara raw ya na matu Yehowa hpe hpyi nem ai.

Yehowa gaw shi hpe sharawng awng let madat mara ai ni hpe mara raw ya ai. Mawshe woi awn ai hpe Israela ni hkan nang na matu kade daram ahkyak ai hpe nang mu ai kun?