Kin Yu Ni Hpe Rahab Makoi Ya

Israela kin yu ni gaw Yerihko mare de sa ai shaloi, Rahab ngu ai num langai a nta hta manam ma ai. Dai hpe Yerihko hkawhkam chye mat ai shaloi, Rahab a nta de hpyen la ni dat dat ai. Kin yu lahkawng hpe nta numgaw ntsa hta makoi da nna hpyen la ni hpe kaga de lam madun dat ai. Kin yu lahkawng hpe shi ndai hku tsun ai: ‘Nanhte maga de Yehowa nga nna ndai mungdan hpe nanhte gasat awng dang lu na lam ngai chye ai majaw karum ya ai re. Chyeju hte nye a nta masha ni hpe hkye la na ngu ga sadi jaw rit.’

Kin yu lahkawng gaw Rahab hpe ndai hku ga sadi jaw ai: ‘Na nta kata de nga ai kadai mung hpa byin na n re. Sum ri ahkyeng hpe hku wawt chyinghka hta gyit noi da u, rai yang na nta masha ni yawng lawt lu na re.’

Rahab gaw hku wawt chyinghka kaw nna sumri jahkrat ya let shan hpe dai hku yu mat wa shangun ai. Shan gaw bum ntsa masum ya makoi nga ai hpang she, Yawshu hpang bai wa ai. Dai hpang, Israela ni gaw Yawdan hka rap nna dai mung hpe zing la na matu lajang ma ai. Yerihko gaw shanhte shawng nnan awng dang ai mare re. Yehowa gaw shanhte hpe kru ya ting lani mi hta kalang, dai mare hpe wang kawai u. Sanit ya ngu na nhtoi hta sha, mare hpe sanit lang wang kawai u nga nna tsun ai. Sanit lang ngu na nhtoi hta, hkinjawng ni mung pahtau dum nna hpyen la ni mung nsen ja ja hte marawn ma ai. Dai shaloi, mare bunghku ni agrawp daw mat ai. Raitim, mare bunghku hta de nga ai Rahab a nta chyawm gaw n hten mat ai sha ngam nga ai. Rahab gaw Karai Kasang hpe kamhpa ai majaw shi hte shi a nta masha ni yawng hkye hkrang la hkrum wa ai.