Yawshu Hte Gibeon Masha Ni

Yerihko mare hte seng ai shiga gaw Hkanan mung hta nga ai kaga amyu ni hpang chyam bra mat ai. Kaga mung kaw na hkawhkam ni gaw Israela ni hpe arau gasat na matu daw dan ma ai. Raitim, Gibeon masha ni gaw shanhte hte n bung ai dawdan lam jahkrat wa ai. Palawng ding sa ni hpun let Yawshu hpang sa nna ndai hku tsun ai: ‘Anhte ni gaw grai tsan ai mung kaw nna sa wa ai. Yehowa a lam, Egutu mung hte Moba mung hta nanhte a matu shi galaw ya wa ai lam ni hpe anhte na ga ai. Anhte hpe n gasat ai ngu ga sadi jaw rit. Rai yang, anhte ni nanhte a mayam galaw na.’

Yawshu mung shanhte hpe kam nna n gasat na matu myit hkrum wa ai. Masum ya na ai hpang, shanhte gaw grai tsan ai mung kaw na n re ai hpe Yawshu chye mat ai. Shanhte gaw Hkanan mung masha ni sha re. Dai majaw, Gibeon masha ni hpe : ‘Hpa majaw anhte hpe masu wa ai ta?’ nga nna san ai. Shanhte gaw: ‘Anhte hkrit nna re! Nanhte a Karai Kasang Yehowa gaw nanhte a matu gasat ya nga ai hpe anhte chye ai. Chyeju hte anhte hpe hkum sat kau rit’ nga nna hpyi nem ma ai. Yawshu gaw shi a ga sadi hte maren, shanhte hpe n sat ai sha asak shalawt dat ya ai.

Kade nna yang, Hkanan hkawhkam manga hte shanhte a hpyen dap ni gaw Gibeon masha ni hpe sa jahkrit shama ma ai. Yawshu hte shi a hpyen dap gaw Gibeon masha ni hpe hkye la na matu shana tup rawt sa wa ma ai. Hpang jahpawt jau jau hta hpyen gasat hpang ma ai. Hkanan masha ni hkrit kajawng nna hkrup mara kagat hprawng mat ma ai. Yehowa gaw shanhte gara de hprawng hprawng, shanhte a ntsa sin kaba ni jahkrat bun ai. Yawshu gaw jan hpe jahkring ya na matu Yehowa hpe hpyi shawn ai. Shawng hta jan hkring mat ai lam n nga ga tim, hpa majaw dai hku galaw ya na matu Yehowa hpe tsun ai kun? Yawshu gaw Yehowa hpe kamsham ai majaw re. Jan hpe shani tup n shang hkra jahkring da ya ai majaw, Israela masha ni gaw Hkanan hkawhkam manga hte hpyen ni hpe gasat awng dang wa ai.