Samuela Hpe Yehowa Ga Shaga

Hkinjawng Agyi Eli hta shadang sha lahkawng nga nna shan gaw hkinjawng hku nna nawku sum hta amu gun ma ai. Shan a amying gaw Hobni hte Hpineha re. Shan gaw Yehowa a tara ni hpe n hkan sa ai. Masha ni hpe mung grai dang sha ai. Yehowa a matu Israela ni hkungga sa nawng yang, Hobni hte Hpineha gaw shan a matu kaja htum shan ni hpe la kau ma ai. Dai hku galaw ai hpe Eli chye tim, hpa mung ahkyak shatai n galaw wa ai. Yehowa dai hku matut byin shangun na kun?

Samuela gaw Hobni hte Hpineha hta na asak grau kaji tim, shan hpe kasi n la wa ai. Yehowa gaw Samuela hpe grai ra sharawng ai. Lana mi hta, Samuela yup pyaw taw ai shaloi, shi a amying shaga ai nsen hpe na dat ai. Shi rawt nna Eli hpang kagat sa ai. ‘Ngai du wa sai’ nga nna shi tsun yang Eli gaw: ‘Nang hpe ngai n shaga ai, bai sa yup su’ nga nna tsun dat ai. Samuela mung bai sa yup ai. Shawng na zawn kalang bai shaga wa ai. Masum lang ngu na nsen hpe Samuela na yang, Samuela hpe shaga ai gaw Yehowa re ai hpe Eli chye mat ai. Dai zawn nsen kalang bai na yang, ‘Yehowa e, tsun rit, na a mayam madat nga nngai’ nga nna htan na matu Eli gaw Samuela hpe htet dat ai.

Samuela mung bai wa yup ai. Dai hpang,‘Samuela e! Samuela e!’ nga ai nsen hpe shi na ai. Shaloi shi gaw: ‘Tsun rit, na mayam madat nga nngai’ nga nna bai tsun ai. Yehowa ndai hku bai tsun ai: ‘Eli hte shi nta masha ni hpe ngai ari jaw sana nga nna Eli hpe tsun u. Shi kasha ni gaw nye a nawku sum hta n kaja ai lam ni galaw nga ai hpe shi chye nga ninglen hpa mung ahkyak shatai n galaw ai.’ Hpang jahpawt hta, Samuela gaw nawku sum chyinghka ni hpe shawoi na zawn sa hpaw ai. Samuela gaw Yehowa tsun ai lam ni hpe hkinjawng agyi Eli hpe tsun dan na matu hkrit nga ai. Raitim, Eli gaw shi hpe shaga la nna ndai hku san ai: ‘Ngai sha Samuela e, Yehowa nang hpe hpa lam tsun a ta? Ngai hpe yawng tsun dan rit.’ Samuela mung Eli hpe yawng tsun dan dat ai.

Samuela asak kaba wa nna, Yehowa mung shi hte arau rai nga ai. Samuela hpe Yehowa gaw, myihtoi hte tara agyi hku nna lata da ai lam, Israela mung ting chye ma ai.