Nden Marai Rawng Nna Sadi Dung Ai Yonahtan

Hkawhkam Shawlu a kasha alat Yonahtan gaw, nden marai rawng ai share ninghkrin re. Yonahtan gaw, hkanghkyi hta grau n-gun ja nna, kalang hta grau lawan ai nga nna Dawi tsun ai. Lani mi hta, Yonahtan gaw bum ntsa kaw Hpilisti hpyen la nkau mi hpe mu ai. Dai majaw, shi a ri nhtu lang ai wa hpe ndai hku tsun ai: ‘Yehowa anhte hpe lamik kumla madun yang, shanhte hpe gasat ga. Lama na, Hpilisti masha ni gaw, lung wa rit ngu tsun yang, anhte lung nna gasat ra na hpe chye lu na re.’ Hpilisti ni gaw ‘Lung wa rit, gasat hkat ga!’ nga nna marawn wa ai. Dai majaw, shan lahkawng gaw bum ntsa de lung nna, sa gasat ai shaloi hpyen la marai 20 hpe gasat awng dang wa ai.

Yonahtan gaw Shawlu a kasha alat re ai majaw, hpang lung na hkawhkam gaw shi mahtang re. Raitim, Dawi hpe Israela ni a hpang lung na hkawhkam hku nna Yehowa lata da ai lam hpe, manawn ai myit Yonahtan hta n nga ai. Yonahtan hte Dawi gaw grai hkau ai manang ni byin wa ai. Shan shada da makawp maga ya na nga nna ga sadi jaw hkat ma ai. Yonahtan gaw Dawi hpe shi a palawng galu, ri nhtu, ndang hte shingkyit hpe manang byin ai masat dingsat hku nna jaw ai.

Dawi gaw Shawlu hte tsan ai shara de hprawng hkawm nga ai shaloi, Yonahtan gaw Dawi hpang sa nna ndai hku tsun ai: ‘Hkum hkrit u. Nden marai nga u. Yehowa gaw nang hpe hkawhkam hku nna lata da sai. Dai lam hpe nye awa mung chye ai.’ Nang mung Yonahtan zawn manang kaja lu mayu ai kun?

Yonahtan gaw shi a manang Dawi hpe karum ya ai majaw, shi hta asak shoihpa nga ai aten ni mung nga wa ai. Shi kawa Shawlu gaw Dawi hpe sat mayu ai lam Yonahtan chye ai majaw, kawa hpe ndai hku tsun ai: ‘Dawi hpe sat yang awa nang sha, mara lu na. Dawi gaw shut ai lam hpa mung n galaw da ai.’ Shawlu gaw Yonahtan hpe grai masin pawt mat ai. Shaning loi mi na ai hpang, Shawlu hte Yonahtan gaw majan pa hta arau si mat ai.

Yonahtan si ai hpang, Dawi gaw Yonahtan a kasha Mehpiboshet hpe hkan tam ai. Dawi gaw shi hpe mu yang ndai hku tsun ai: ‘Na awa gaw nye a matu grai kaja ai manang re. Ngai nang hpe prat tup bau maka na. Nye a hkawhkam htingnu hta sa nga nna, ngai sha ai shaku hta sa sha u.’ Dawi gaw shi a manang Yonahtan hpe galoi mung n malap ai.