Israela Mungdan Lahkawng Garan Mat

Yehowa hpe Shawlumon nawku nga ding yang, Israela mung gaw simsa nga ai. Shawlumon gaw kaga mungdan kaw nna, gawng ngu sumla nawku ai anum law law hpe hkungran la ai. Angwi ngwi hte Shawlumon gaw galai shai wa nna, gawng ngu sumla ni hpe nawku wa ai. Yehowa gaw grai masin pawt nna, Shawlumon hpe ndai hku tsun ai: ‘Israela mung gaw na a dinghku kaw nna, dawm la hkrum nna lahkawng garan mat na re. Grau kaba ai daw hpe na a mayam langai hpe jaw nna, na a dinghku hpe gaw, kaji ai daw hpe sha uphkang shangun na re.’

Yehowa gaw ndai dawdan lam hpe kaga lam hku nna mung, dan dan leng leng madun wa ai. Shawlumon a mayam Yeroboam gaw, bu hkawm nga ai shaloi, lam kaw myihtoi Ahiya hte hkrum ai. Ahiya gaw shi a palawng galu hpe daw 12 gang je kau nna ndai hku tsun ai: ‘Yehowa gaw Shawlumon a dinghku kaw nna Israela mung hpe dawm la kau nna, lahkawng garan kau sana re. Ndai daw 10 hpe nang la dat u. Hpa majaw nga yang, nang gaw amyu lakung 10 a hkawhkam byin wa na re.’ Dai lam hpe Hkawhkam Shawlumon na yang, Yeroboam hpe sat na matu shakut ai. Dai majaw, Yeroboam gaw Egutu mung de hprawng mat wa ai. Aten loi mi na ai hpang, Shawlumon si mat nna shi a kasha Rehoboam hkaw dung ai. Yeroboam gaw shim lum sai ngu hkamsha ai majaw, Israela mung de bai n htang wa ai.

Asak kaba sai Israela salang ni gaw, Rehoboam hpe ndai hku tsun ai: ‘Mung masha ni hpe nang atsawm yu lanu lahku yang, shanhte nang hpe sadi dung na re.’ Raitim, Rehoboam hte rau kaba wa ai manang ni gaw shi hpe ndai hku tsun ai: ‘Mung masha ni hpe laja lana zingri ra ai! Shanhte hpe yak ai bungli law law galaw shangun u!’ Rehoboam gaw shi hte arau kaba wa ai manang ni tsun ai hku sha hkan galaw ai. Masha ni hpe shi zingri ai majaw, amyu lakung 10 gaw gumlau wa ma ai. Shanhte gaw Yeroboam hpe amyu lakung 10 a hkawhkam shatai nna, dai mungdan gaw Israela mungdan byin wa ai. Ngam ai amyu lakung 2 gaw, Rehoboam hpe sha sadi dung nna, Yuda mung byin wa ai. Ya, Israela amyu lakung 12 gaw lahkawng garan mat sai.

Yeroboam gaw Rehoboam uphkang ai Yerusalem kaw nga ai nawku htingnu de, shi a masha ni sa nna nawku na hpe n ra ai. Hpa majaw kun? Yeroboam gaw mung masha ni shi hpe kau da nna, Rehoboam hpe sa madi shadaw na tsang ai majaw re. Dai majaw, Yeroboam gaw aja dumsu lahkawng hpe galaw nna, shi a masha ni hpe ndai hku tsun ai: ‘Yerusalem gaw grai tsan ai. Ya, nanhte ndai kaw sha nawku mai sai.’ Mung masha ni gaw aja dumsu hpe nawku wa nna, Yehowa hpe kalang bai kau da sai.