Wan Zawn Htoi Kabrim Ai Yehowa A Hpyen Dap

Suri hkawhkam Benhada gaw Israela ni hpe gasat nga ai. Raitim, Israela hkawhkam hpe myihtoi Elisha gaw aten shagu sadi jaw ya ai majaw, hkawhkam wa gaw asak lawt nga ai. Dai majaw, Benhada gaw Elisha hpe rim na matu dawdan wa ai. Benhada gaw Dohtan mare hta Elisha nga ai hpe na ai majaw, shi hpe rim na matu suri hpyen dap hpe dat dat ai.

Suri hpyen dap gaw Dohtan mare de shana aten hta du wa ai. Hpang jahpawt hta, Elisha a mayam gaw shinggan de pru yu yang, mare ting hpe hpyen luksuk kaba wang tawn da ai hpe mu dat ai. Shi hkrit kajawng nna ndai hku marawn ai: ‘Elisha e, an gara hku galaw na ta?’ Elisha ndai hku bai tsun ai: ‘Anhte maga gaw shanhte maga hta grau law ai.’ Dai shaloi, Yehowa gaw Elisha a mayam hpe mare grup yin na bum ni hta, wan zawn htoi kabrim ai hpyen gumra leng ni hpe mu hkra galaw ya dat ai.

Elisha gaw Suri hpyen la ni shi hpe rim na matu shakut ai shaloi, karum ya na matu Yehowa hpang akyu hpyi ai. Dai majaw, Yehowa gaw hpyen la ni hpe myit shuk mat hkra galaw ya dat ai. Dai shaloi, shanhte gaw gara de sa na pyi n chye mat ai. Elisha gaw ‘nanhte shara shut taw sai. Nye hpang hkan wa rit. Nanhte tam ai wa nga ai shara de ngai woi sa ya na’ nga nna hpyen la ni hpe tsun ai. Elisha gaw shanhte hpe Israela hkawhkam nga ai Samari mare de woi sa mat ai.

Suri hpyen la ni gaw shanhte gara kaw du nga ai hpe chye mat ai shaloi, grai hpang hkrat mat sai. Israela hkawhkam gaw Elisha hpe ndai hku san ai: ‘Shanhte hpe ngai sat kau ra na kun?’ Dai ga na yang, Elisha gaw ahkaw ahkang la nna shi hpe sat na matu shakut ai ni hpe matai htang wa ai kun? Matai n htang wa ai. De a malai, ‘shanhte hpe hkum sat u. Lusha jaw sha nna, bai dat dat u’ nga nna tsun ai. Dai majaw, hkawhkam wa mung lusha poi kaba galaw ya nna shanhte hpe dat dat ai.