Yehowa A Ga Madat Ai Ramma Mali

Nebuhkadneza gaw Yuda mung kaw nna, hkawseng shadang sha ni hpe Babelon mung de, shaga mat wa ai. Shanhte hpe woi awn na matu, Ashpena hpe san tawn da ai. Nebuhkadneza gaw Ashpena hpe shanhte kaw nna, hkam kaja ai hte, hpaji rawng dik htum ni hpe lata na matu tsun da ai. Dai ramma ni gaw, 3 ning tup shaman shakyang ra na re. Dai hku galaw ai gaw shanhte hpe Babelon mungdan hta, ahkyak ai masha ni byin wa na matu shaman shakyang ya ai re. Dai ramma ni gaw, Babelon amyu ga hpe hti chye, ka chye, tsun chye na matu sharin la ra ai. Hkawhkam hte hkawhkam htingnu kaw nna jaw sha ai malu masha hpe mung sha ra ai. Dai ramma ni kaw nna marai 4 a amying gaw, Daniela, Hanania, Mishaela hte Azaria re. Ashpena gaw shanhte hpe Belteshaza, Shadrak, Meshak hte Abed-nego ngu ai Babelon amying bai shamying ya ai. Shanhte sharin la na hpaji gaw, Yehowa hpe n nawku ai ni byin mat shangun na kun?

Dai ramma 4 gaw Yehowa hpe sha, madat mara na matu dawdan da ma ai. Yehowa a Tara hta dusat nkau mi hpe, n sha na matu tsun da ai majaw, hkawhkam jaw ai lusha n mai sha ai hpe shanhte chye ai. Dai majaw, Ashpena hpe shanhte ndai hku sa tsun ai: ‘Hkawhkam jaw sha ai malu masha hpe anhte n sha na ga ai.’ Ashpena ndai hku bai tsun ai: ‘Lama na nanhte n sha ai majaw, hkam kaja lam n nga ai hpe hkawhkam mu yang, ngai hpe sat na re.’

Daniela hta masing langai nga ai. Dai majaw, shanhte hpe uphkang ai salang hpe ndai hku sa tsun ai: ‘Chyeju hte anhte hpe shapre, namlaw namlap hte hka hpe sha nhtoi 10 ya tup, jaw sha rit. Dai hpang, hkawhkam jaw sha ai lusha sha ai kaga ni hte, anhte hpe shingdaw yu u.’ Dai ga hpe uphkang ai salang wa mung, myit hkrum dat ai.

Nhtoi 10 ya chyam yu ngut ai hpang, Daniela hte shi manang 3 gaw, kaga ramma ni hta grau hkam kaja nga ai. Dai hku madat mara ai hpe Yehowa grai ra sharawng ai. Dai majaw, Yehowa gaw Daniela hpe yupmang chye htai nna shingran ni hpe chye na lu ai nyan hpaji pyi jaw ai.

Shaman shakyang ai aten ngut yang, Ashpena gaw ramma ni hpe Nebuhkadneza hpang de shaga sa wa ai. Hkawhkam wa gaw ramma yawng hte ga shaga yu yang, Daniela, Hanania, Mishaela hte Azaria gaw, kaga ni hta nyan hpaji hte machye machyang grau nga ai hpe sadi hkrup mat ai. Dai majaw, shanhte 4 hpe hkawhkam htingnu hta amu gun shangun ai. Grai ahkyak ai masa ni nga wa yang, hkawhkam wa gaw shanhte hpe hpaji ayan hpyi ai. Yehowa gaw shanhte hpe hkawhkam wa a hpaji rawng ai masha ni hte mandan hpaji sara ni yawng hta, nyan hpaji grau nna chye shangun ai.

Daniela, Hanania, Mishaela hte Azaria ni gaw kaga mungdan hta du taw nga tim, shanhte gaw Yehowa a masha re ai hpe n malap kau ai. Nanhte mung, kanu kawa ni nanhte a makau hta n nga yang pyi, Yehowa hpe galoi mung myit dum na n re i?