Yerusalem Mare Bunghku

Ezra asak hkrung ai aten hta, Nehemia ngu ai Israela masha langai mung hkawhkam Artahkere kaw magam gun ai. Shi gaw Persi mungdan, Shushan mare kaw nga ai. Yuda mung kaw nga ai Nehemia a kanau gaw Shushan mare de du wa nna, n kaja ai shiga sa tsun ai: ‘Yerusalem de bai wa ai masha ni a aprat gaw shimlum lam n nga ai. Babelon masha ni jahten kau ai mare bunghku ni hte mare chyinghka ni mung, bai n lu gawgap shi ai.’ Nehemia grai myit n pyaw mat ai. Shi gaw Yerusalem de sa nna, karum ya mayu ai. Dai majaw, dai de sa lu hkra hkawhkam wa ahkang jaw u ga nga nna akyu hpyi ai.

Lani mi hta, Nehemia myit n pyaw nga ai hpe hkawhkam wa sadi hkrup ai. Shi ndai hku san ai: ‘Nang hpa byin nga ai rai? Shawoi na zawn n re nga ai le.’ Nehemia ndai hku htai ai: ‘Yerusalem mare hten run nga ai majaw, ngai grai myit n pyaw nga ai re.’ Hkawhkam wa ndai hku san ai: ‘Ngai hpa galaw ya ra na kun?’ Nehemia gaw kalang ta myit kaw nna akyu hpyi dat ai. Dai hpang, shi ndai hku tsun ai: ‘Yerusalem de sa nna, mare bunghku bai gawgap na matu, chyeju hte ngai hpe ahkang jaw rit.’ Hkawhkam Artahkere gaw sa na matu ahkang jaw nna, hkrun lam galu hta mung shimlum na matu lajang ya ai. Hkawhkam wa gaw Nehemia hpe Yuda mung a munggyi hku nna, aya tang dat ai. Mare chyinghka ni galaw na matu mung, hpun ni jaw dat ai.

Yerusalem de Nehemia du ai shaloi, mare bunghku ni hpe hkan jep yu ai. Dai hpang, hkinjawng ni, du agyi salang ni hte zuphpawng nna, shi ndai hku tsun ai: ‘Mare bunghku gaw grai hten run taw nga ai. Anhte kalang ta gawgap hpang ra sai.’ Masha yawng mung myit hkrum nna, mare bunghku hpe gawgap hpang wa ma ai.

Raitim, Israela amyu a hpyen ni gaw, shanhte hpe ndai hku jahpoi asawng ma ai: ‘Nanhte gawgap nga ai mare bunghku gaw, chyahkyawn langai mi lung kabye yang pyi, run mat na re.’ Gawgap nga ai masha ni gaw shanhte hpa mi tsun tim n madat ai sha, matut gawgap ma ai. Mare bunghku tsaw wa magang, ngang kang wa magang re.

Hpyen ni gaw, shara shagu hkan na pru sa nna Yerusalem mare hpe akajawng sha sa gasat na matu dawdan ma ai. Dai shiga hpe Yuda masha ni na yang, grai hkrit kajawng ma ai. Raitim, Nehemia ndai hku tsun ai: ‘Hkum hkrit mu. Yehowa anhte hte arau rai nga ai.’ Nehemia gaw gawgap ai ni hpe makawp maga ya na matu, sin langa ni hpe tawn da ai majaw, hpyen ni n lu sa gasat ai.

Nhtoi 52 ya hte sha, mare bunghku ni hte mare chyinghka ni yawng, ngut kre lu wa ai. Nehemia gaw apnawng poi galaw na matu, Lewi masha yawng hpe Yerusalem mare de saw shaga dat ai. Mahkawn mangoi na matu shanhte hpe hpung lahkawng garan dat ai. Dai hpung lahkawng gaw hka hpawk chyinghka kaw nga ai lakang hku, mare bunghku ntsa lung nna, n bung ai maga de man yawng let mare hpe kawan ma ai. Shanhte gaw shupsheng, pahtau, tingse ni hpe dum nna, Yehowa hpe shakawn kungdawn let rawt sa ma ai. Hpung langai hpe Ezra woi awn nna, kaga langai hpe gaw Nehemia woi awn ai. Dai hpung lahkawng gaw nawku htingnu hta, myiman chyaw bai hkrum ma ai. Anum, ala hte ma ni yawng gaw, Yehowa hpe shagu hkungga sak jaw nna, poi galaw ma ai. Kabu gara nga ai shanhte a nsen hpe, grai tsan ai shara kaw nna pyi na lu ai.