Mari Hpang Gabriela Du Wa

Elisabet hta Mari ngu ai jinghku daw ai kanau langai nga ai. Shi gaw Galile mung, Nazaret mare hta nga nna laksama galaw ai Yosep hte mahtan da ai. Elisabet hta ma hkum shata 6 rai yang, lamu kasa Gabriela gaw Mari hpang du sa wa ai. Lamu kasa ndai hku tsun ai: ‘Mari e, ngwi pyaw ai shani rai u ga. Nang gaw Yehowa a man hta grai myiman lu ai wa re.’ Gabriela hpa tsun ai hpe Mari n chye na ai. Gabriela ndai hku bai tsun ai: ‘Nang gaw na-um nasin byin wa nna, shadang sha langai shangai wa na re. Dai ma a amying hpe Yesu ngu nna shamying ra ai. Shi gaw Hkawhkam byin wa na. Shi a Mungdan gaw htani htana agrin nga na re.’

Mari ndai hku tsun ai: ‘Ngai gaw hkawn sek rai nga ai. Gara hku nna, ma lu mai na ta?’ Gabriela ndai hku tsun ai: ‘Yehowa a matu, n mai byin ai lam n nga ai. Chyoi pra ai wenyi gaw na ntsa du wa nna, nang shadang sha lu wa na re. Na a jinghku re ai, asak kaba sai Elisabet mung, ya ma hkum hte rai taw sai.’ Mari ndai hku bai tsun ai: ‘Ngai gaw Yehowa a mayam rai nga ai. Nang tsun ai hte maren, ngai hta byin wa u ga.’

Mari gaw bum ga kaw nga ai Elisabet hpang de sa ai. Mari shakram dat ai shaloi, Elisabet a hkritung na ma gaw kabu gumlawt wa ai hpe, Elisabet hkam sha hkrup dat ai. Elisabet hta chyoi pra ai wenyi hpring wa nna, ndai hku tsun ai: ‘Mari e, Yehowa gaw nang hpe shaman chyeju jaw sai. Nye Madu a kanu, ngai kaw sa chyai ai gaw arawng la hpa re.’ Mari ndai hku tsun ai: ‘Nye a myit masin mahkra hte Yehowa hpe shakawn kungdawn nngai.’ Mari gaw Elisabet a nta kaw shata 3 sa nga nna, dai hpang Nazaret kaw nga ai shi a nta de bai wa ai.

Yosep gaw Mari hta ma hkum nga ai hpe na yang, mahtan da ai hpe dawm kau mayu ai. Hpa majaw nga yang, Mari gaw kaga la langai hte ma lu wa ai ngu shadu ai majaw re. Raitim, Yosep a yup mang hta lamu kasa langai pru wa nna, ndai hku sa tsun ai: ‘Mari hpe hkungran la na matu hkum hkrit u. Shi gaw mara hpa mung n galaw da ai.’ Dai majaw, Yosep gaw Mari hpe shi a madu jan hku nna hkungran la let, nta de woi mat wa ai.