Ramma Yesu

Yosep yan Mari gaw Yesu hte shan bai lu wa ai kasha ni hte arau, Nazaret mare kaw shanu nga ma ai. Yosep gaw laksama galaw nna, kun dinghku hpe bau maka wa ai. Yehowa a lam hte Shi a Tara ni hpe mung shanhte hpe sharin ya ai. Yosep hte shi a dinghku gaw, tara jawng hta ayan sa nawku nna, Shalai Wa Ai Poi hpe shaning shagu Yerusalem mare kaw sa lung ma ai.

Yesu asak 12 ning hta, Yerusalem mare de shawoi na zawn, dinghku nawng hkrun lam galu hkawm sa ma ai. Dai mare gaw, Shalai Wa Ai Poi sa lung ai ni hte hpring chyat taw nga ai. Poi ngut ai hpang, Yosep yan Mari gaw nta de wa ai hkrun lam hta, shan hte arau Yesu lawm wa ai ngu nna sha shadu ma ai. Raitim, makyin jinghku ni a lapran, Yesu hpe hkan tam yu yang, n mu ma ai.

Dai majaw, Yerusalem mare de nhtang bai wa nna, 3 ya tup shan a kasha hpe hkan tam ma ai. Hpang jahtum hta, nawku htingnu de sa tam ma ai. Dai shara kaw Yesu gaw, sara ni a lapran dung let, shanhte tsun ai lam ni hpe atsawm madat ya nna, grai kaja ai ga san ni san nna nga taw ai. Dai sara ni gaw Yesu hpe yu kaba mat nna, ga san ni san ma ai. Yesu bai htai ai mahtai ni a majaw, shanhte grai mau ma ai. Yehowa a Tara ni hpe Yesu atsawm chye ai lam shanhte mu ma ai.

Yosep yan Mari gaw grai myit tsang taw nga ai. Mari ndai hku tsun ai: ‘Ma e, an nang hpe shara shagu hkan tam taw nga ai le! Nang gara de sa taw nga ai ma?’ Yesu gaw: ‘Nye Wa a nta hta, ngai nga taw na ngu n shadu ma ai kun?’ nga nna bai tsun ai.

Yesu gaw kanu kawa ni hte arau, Nazaret mare de bai wa ai. Yosep gaw Yesu hpe laksama hpaji sharin ya ai. Ramma aten hta Yesu gaw kaning re ai ramma re ngu nang shadu ai kun? Yesu kaba wa magang, nyan hpaji grau nga wa magang rai nna, Karai Kasang hte masha ni a man hta mung, grau myiman lu wa magang re.