Yesu Meshia Byin Wa

Yawhan gaw: ‘Ngai hta grau ai wa du wa sana’ nga nna hkaw tsun nga ai. Yesu asak 30 daram hta, Galile mung kaw nna Yawdan Hka de sa wa ai. Dai shara hta Yawhan gaw masha ni hpe hkalup jaw ai. Yesu gaw shi hpe hkalup hkam ya na matu Yawhan hpe tsun ai shaloi, Yawhan ndai hku tsun ai: ‘Ngai nang hpe hkalup n jaw ging ai. Nang mahtang she ngai hpe hkalup jaw ging ai.’ Yawhan hpe Yesu ndai hku tsun ai: ‘Yehowa gaw ngai hpe nang kaw hkalup hkam shangun mayu ai.’ Dai majaw, shan gaw Yawdan hka de yu nna, Yawhan gaw Yesu hpe hka hta tsep kawp lup kau ya ai hku nna hkalup hkam ya ai.

Yesu gaw hka kaw nna paw pru wa ai hpang akyu hpyi ai. Dai shaloi, Sumsing lamu hpaw wa nna Karai Kasang a wenyi gaw hkrudu zawn Yesu ntsa yu hkrat wa ai. Dai hpang, Yehowa gaw sumsing lamu kaw nna ndai hku tsun ai: “Nang gaw nye tsaw ra ai Kasha rai nga ndai; Nang hta ngai sharawng awng nngai law.”

Yehowa a wenyi gaw Yesu a ntsa yu hkrat wa ai hpang, Yesu gaw Hkristu shing nrai Meshia byin wa ai. Ya, Yesu gaw mungkan ga ntsa shi hpe Yehowa galaw shangun mayu ai lam hpe galaw hpang sana re.

Yesu gaw hkalup hkam ngut ai hte kalang ta, nam mali de pru mat wa nna, dai shara hta nhtoi 40 ya tup sa nga ai. Shi bai wa ai shaloi, Yawhan hpe sa jahkrum ai. Yesu sa wa ai hpe Yawhan mu yang ndai hku tsun ai: ‘Mungkan ga a yubak raw dat kau ya na, Karai Kasang a Sagu Kasha hpe yu yu mu!’ Dai hku tsun nna, Yesu gaw Meshia re ai lam masha ni chye wa hkra Yawhan shana ya ai. Yesu nam mali hta nga ai shaloi hpa byin wa ai kun? Dai lam hpe yu yu ga.