Hka Htung Makau Na Numsha

Shalai Wa Ai Poi ngut nna aten loi mi na ai hpang, Yesu hte shi a sape ni gaw Samari mung hpe lai nna Galile mung de bai wa ma ai. Yesu gaw Shuhka mare makau na, Yaku a hka htung ngu ai shara hta hkring sa la ai. Shi hkring sa nga ai laman, shi a sape ni gaw lusha mari na matu mare de sa mat ma ai.

Dai shaloi, anum langai gaw hka htung de hka ja na matu sa wa ai. Yesu shi hpe ndai hku hpyi ai: “Ngai hpe ntsin jaw lu e.” Shi ndai hku tsun ai: ‘Nang ngai hpe hpa majaw ga shaga ai kun? Ngai gaw Samari numsha re. Yuda masha ni gaw Samari masha ni hpe ga n shaga ma ai.’ Yesu shi hpe ndai hku tsun ai: ‘Ngai kadai re ai hpe nang chye yang, ngai kaw na ntsin hpyi lu na re. Ngai mung nang hpe asak hkrung ai ntsin jaw lu na.’ Shaloi, ‘nang hpa hpe tsun mayu ai kun? Nang hta hka ja na matu hka pung mung n nga ai’ nga nna dai numsha tsun ai. Yesu gaw: ‘Ngai jaw ai ntsin hpe lu ai kadai mung, hpang gara sana n re’ nga nna tsun ai. Dai numsha gaw: ‘Madu e, dai hka ngai hpe jaw lu rit’ nga nna hpyi ai.

Yesu gaw shi hpe ndai hku tsun ai: ‘Na a madu wa hpe hka htung de shaga sa wa rit.’ ‘Ngai ala n lu nngai’ nga nna dai numsha tsun ai. Yesu gaw: ‘Teng man ai ga nang tsun ai re. Nang la manga lu ga sai. Ya nang hte arau nga ai wa gaw nang hkungran da ai wa n re.’ Dai numsha ndai hku bai tsun ai: ‘Nang gaw myihtoi re ai hpe ngai chye sai. Nye a amyu gaw ndai bum hta Karai Kasang hpe nawku mai ai nga nna kam ma ai. Raitim, Yuda ni chyawm gaw Yerusalem hta sha Karai Kasang hpe nawku mai ai nga nna tsun ma ai. Meshia du wa yang, anhte ni gara hku nawku ra na lam shi sharin ya na hpe ngai kam ai.’ Dai shaloi, Yesu gaw: ‘Ngai gaw Meshia re’ nga nna kadai hpe mung n tsun dan shi ai ga hpe tsun wa ai.

Dai numsha gaw shi a mare de alawan wa mat nna, Samari masha ni hpe ndai hku sa tsun ai: ‘Meshia hpe ngai mu sai ngu shadu ai. Nye a lam yawng mayawng shi chye ai. Sa yu yu ga!’ Samari masha ni mung, hka htung de hkan nang wa nna, Yesu sharin achyin ya ai lam ni hpe sa madat la ma ai.

Samari masha ni gaw Yesu hpe shanhte a mare hta manam na matu saw shaga ai. Yesu gaw dai mare hta lahkawng ya nga nna sharin achyin ya ai. Dai majaw, masha law law shi hpe kamsham wa ma ai. Shanhte gaw dai Samari numsha hpe ndai hku tsun ai: ‘Dai wa tsun ai hpe anhte madat yu yang, shi gaw mungkan ga hpe hkye la na Madu teng sha re ai hpe anhte chye sai.’