HKAJA 6

Chyum Daw A Yaw Shada Lam Hpe Tsun Dan U

Yawhan 10:33-36

KADUN DAWK: Chyum daw hpe majoi sha hti nna, kaga lam langai hpe tsun ai baw hkum galaw. Hti mat ai Chyum daw hte nang tsun ai madung lam ni matut mahkai nga ai lam, madat nga ai ni chye na hkra karum ya u.

GALAW MAI AI LAM:

Madung ga si ni hpe garan ginhka ya u. Chyum daw hpe hti ngut ai hpang, madung lam hte matut mahkai nga ai ga si ni hpe dan dawng hkra tsun u. Madung lam hpe chye na wa hkra, dai ga si ni hpe kahtap nna tsun mai ai (sh) ga san langai san mai ai.

Chyum daw hpe sang lang dan na matu, kaga ga si ni hpe galai lang na nga yang mung mai ai. Raitim, Chyum daw kaw lawm ai ga si nan, nang tsun nga ai madung lam hte matut mahkai nga ai hpe, asan sha chye na hkra karum ya u.
Madung lam hpe ahkyak shatai tsun u. Chyum daw langai hpe hpa majaw hti ai hpe tsun dan ngut ai hpang, Chyum daw kaw na madung ga si ni gaw, nang tsun mayu ai lam hte gara hku matut mahkai nga ai lam sang lang dan u.

Chyum daw hpe bawngban nga ai shaloi, na a Chyum Laika hpe hpaw da u. Nang dai hku galaw na nga yang, shawa hpawng mung Chyum Laika hpe matut hpaw da na rai nna, nang sang lang nga ai lam hpe Chyum Laika kaw nna shanhte mu lu na re.
Asan sha tsun dan u. Madung lam hte n seng ai, ahkri ahkrai lam ni tsun dan ai hpe koi u. Nang tsun na lam hpe madat nga ai ni asan sha chye na na matu, shanhte kade daram chye da ai hta hkan nna, gara lam ni hpe kade daram tsun dan na dawdan u.