Chyum Laika Kaw Na Akyu Hpring Tup Lu La Mai Ai Lam

Masing kaba langai nnan galaw hpang na matu myit ai shaloi, myit tsang ga ai kun? Mayak mahkak ni yawm mat na matu, bungli ni hpe grau loi hkra, grau kaji mat hkra garan nna galaw mai ai. Chyum Laika nnan hti hpang na matu myit ai shaloi hta mung dai hte maren sha re. ‘Gara hku hpang ra na kun?’ ngu nna nang myit na re. Ndai sumhpa hta, Chyum Laika hti ai, hkaja ai hpe pyaw wa hkra karum ya lu ai lam nkau mi hpe hkaja mat na re.

1. Chyum Laika hpe hpa majaw ayan hti ging ai kun?

Chyum Laika (sh) “Yehowa a tara” hpe ayan hti ai marai langai gaw, ngwi pyaw lam hte awng dang lam lu la na re. (Shakawn 1:​1-3 hpe hti u.) Shani shagu minit loi mi daram hte hti hpang na matu shakut u. Karai a Mungga hte grau hku hkau wa magang, Chyum Laika hti ai hpe nang grau pyaw wa magang rai na re.

2. Chyum Laika hti ai kaw na akyu lu la hkra nang hpe hpa gaw karum ya na kun?

Chyum Laika hti ai kaw na akyu lu la na matu, hti ai shaloi chyahkring mi hkring nna, hti ai lam ni hpe myit sawn sumru ra ai. Chyum Laika hpe hti nna “aru yu” ging ai. (Yawshu 1:8) Hti ai shaloi, ndai ga san ni hpe tinang hkum tinang san yu u: ‘Ndai gaw Yehowa Karai Kasang hte seng nna ngai hpe hpa tsun dan ai kun? Dai hpe nye a prat hta gara hku hkan sa lu na kun? Dai Chyum daw ni hpe akyu jashawn nna kaga ni hpe gara hku karum ya lu na kun?’

3. Chyum Laika hti na matu gara hku aten masat da na kun?

Chyum Laika hti ai aten hpe masat na matu yak nga ai kun? Masha law law dai hku byin nga ai. “Aten hpe atsawm akyu jashawn” na matu shakut u. (Ehpesu 5:​16, NWT) Shani shagu Chyum Laika hti na matu, aten hpe laksan masat da ai hku nna dai hpe galaw mai ai. Masha nkau gaw, jahpawt manap hta Chyum Laika hti na matu aten masat da ai. Nkau mi gaw, shani ka-ang shat sha hkring ai aten hta hti ma ai. Nkau mi gaw, yup-ra garai n shang shi ai aten hta hti ai. Na a matu gara aten gaw kaja htum rai na kun?

Kahtap Hkaja

4. Chyum Laika hti ai hpe pyaw hkra sharin la u

Chyum Laika hti hpang na matu, loi na gaw n re. Raitim, lusha nnan a namchyim hpe chyim yu na matu shakut mai ai zawn, Chyum Laika hti ai hpe pyaw hkra galaw na matu mung shakut mai ai. 1 Petru 2:3 hpe hti nna, ndai ga san hpe bawngban u:

• Chyum Laika hpe shani shagu hti ai nga yang, pyaw wa nna, grau hti mayu wa na ngu shadu ai kun?

Chyum Laika hti ai hpe pyaw hkra masha nkau gara hku galaw hpang wa ai hpe chye na matu, VIDEO hpe hpaw. Dai hpang, ndai ga san ni hpe bawngban u.

VIDEO: Karai A Mungga Hpe Tsawra Wa Hkra Sharin La Nga Ai Ramma Ni (5:33)

• Ndai video hta, ramma ni gaw gara mayak mahkak ni hpe tawt lai wa ai kun?

• Chyum Laika hpe matut nna hti mat na matu shanhte hpe hpa gaw karum ya wa ai kun?

• Chyum Laika hti ai hpe grau myit lawm wa hkra shanhte gara hku galaw wa ai kun?

Nnan hpang lu na matu karum ya ai hpaji jaw ga ni:

• Tup hkrak tengman nna chye na loi ai ga hte ga gale da ai Chyum Laika hpe lata u. Na a amyu ga hta Mungkan Nnan Ga Gale Chyum Laika nga yang, dai hpe lata u. Shing nrai, Myanmar amyu ga hte gale da ai Mungkan Nnan Ga Gale Chyum Laika hpe lata u.

• Nang ra dik htum daw ni hpe shawng hti u. Gara hku hti hpang na hpe chye hkra, “Chyum Laika Shani Shagu Hti Na Chyarang” ngu ai hpe yu u.

• Nang hti mat ai lam ni hpe ka matsing da u. Ndai laika buk hta lawm ai “Chyum Laika Hti Ai Hpe Matsing Da” ngu ai hpe akyu jashawn u.

• JW Library^® app hpe akyu jashawn u. Dai app hpe na a phone (sh) kaga jak rai langai ngai hta bang da yang, gara shara kaw raitim, Chyum Laika hpe hti mai ai, madat mai ai.

• Mungkan Nnan Ga Gale Chyum Laika hta lawm ai bungjat ni hpe akyu jashawn u. Dai hta, nang Chyum Laika hti ai hpe grau nna myit lawm hkra karum ya lu ai lamu ga sumla ni, chyarang ni, ga si a lachyum ni lawm ai.

5. Chyum Laika hkaja ai lamang a matu hkyen lajang u

Shakawn 119:​34, hpe hti nna, ndai ga san hpe bawngban u:

• Chyum Laika garai n hti shi yang (sh) Chyum Laika hkaja ai lamang a matu garai n hkyen lajang shi yang, akyu hpyi ai gaw hpa majaw kaja ai kun?

Chyum Laika hkaja ai lamang shagu kaw na akyu grau lu la hkra gara hku galaw mai ai kun? Ndai laika buk hta lawm ai daw langai ngai hpe hkyen lajang ai shaloi, ndai lam ni hpe shakut yu u:

1. Hkaja na daw a shawng na laika pang ni hpe hti da u.

2. Chyum daw ni hpe hpaw hti u. Dai Chyum daw ni gaw nang hti nga ai lam hte gara hku matut mahkai ai hpe chye na hkra shakut u.

3. Ga san shagu a mahtai ni hpe mahkret da u. Dai gaw sharin ya ai wa hte rau dai daw hpe bawngban ai shaloi karum ya lu na re.

Nang chye ai kun?

Yehowa Sakse ni gaw ga gale Chyum Laika amyu myu hpe akyu jashawn ai. Raitim, Mungkan Nnan Ga Gale Chyum Laika hpe gaw laksan hku nna akyu jashawn ai. Hpa majaw nga yang, dai gaw tup hkrak tengman nna, chye na loi ai. Karai a amying mung lawm ai majaw re.​—“Yehowa Sakse Ni Hta Tinang Madu Ai Chyum Laika Nga Ai Kun?” ngu ai Web sumhpa hpe yu u.

Kadun Dawk

Chyum Laika hti ai kaw na akyu grau lu la hkra, chyarang hte maren hti u. Hti ai lam ni hpe chye na hkra akyu hpyi u. Chyum Laika hkaja ai lamang ni a matu hkyen lajang u.

Bai Maram

• Chyum Laika hti ai kaw na akyu hpring tup lu la hkra nang hpe hpa gaw karum ya lu na kun?

• Chyum Laika hti na matu hte hkaja na matu aten hpe gara hku masat da mai na kun?

• Chyum Laika hkaja ai lamang ni a matu hkyen lajang ai gaw hpa majaw kaja ai kun?

Sawk Sagawn

Chyum Laika hti ai kaw na akyu grau lu hkra, karum ya ai lam nkau hpe bai maram yu u.

“Chyum Laika Gaw Prat Hpe Rawt Jat Shangun Lu” (Sin Langchyi No. 1 2017)

Chyum Laika hti na matu galaw mai ai lam 3 hpe sharin la u.

“Chyum Laika Gaw Ngai Hpe Gara Hku Karum Ya Lu Ai Kun?​—Daw 1: Chyum Laika Hpe Tam Sawk Sagawn Ai Lam” (Web sumhpa)

Chyum Laika hti ai shaloi pyaw hkra gara hku galaw mai ai lam hpe sawk sagawn yu u.

“Chyum Laika Gaw Ngai Hpe Gara Hku Karum Ya Lu Ai Kun?​—Daw 2: Chyum Laika Hti Ai Shaloi Pyaw Hkra Galaw Ai Lam” (Web sumhpa)

Chyum Laika hti wa ai grai na sai ni a hkaja ai lam kaw na hpaji la u.

Tang Du Ai Tinang Hkrai Hkaja Ai Lamang (2:06)