DAW 13
Shut Shai Ai Nawku Htung Ni Gaw Masha Ni Hpe Karai Kasang Hte Tsan Hkra Galaw Nga
Karai Kasang gaw tsawra myit rai yang, Karai Kasang hpe nawku nga ai ngu tsun ai nawku htung ni gaw, nhkru n kaja ai lam ni hpe hpa majaw tawt lai nga ai kun? Dai nawku htung ni gaw shut ai. Shanhte gaw masha ni hpe Karai Kasang hte tsan hkra galaw nga ai. Shanhte gara hku galaw nga ai kun? Dai hpe Karai Kasang gara hku hkamsha ai kun? Shi hpa galaw na kun?
1. Shut shai ai nawku htung ni a sharin achyin ai lam ni gaw masha ni hpe Karai Kasang hte tsan mat hkra gara hku galaw nga ai kun?
Shut shai ai nawku htung ni gaw, “Karai Kasang a teng man ai lam hpe masu ai hte galai kau mu ai.” (Roma 1:25, JCLB) Ga shadawn, shut shai ai nawku htung law malawng gaw, Karai Kasang a mying hpe n sharin ya ma ai. Chyum Laika hta gaw Karai a mying hpe lang ra ai ngu tsun da ai. (Roma 10:13, 14) Hkra machyi ai lam lama ma byin ai shaloi, nawku htung ningbaw nkau mi gaw, Karai Kasang a myit ra ai lam re ngu nna tsun ma ai. Raitim, dai gaw masu ga re. Karai Kasang gaw nhkru n kaja ai lam ni hpe tsep kawp n galaw ai. (Yaku 1:13 hpe hti u.) Nawku htung ni gaw, masha ni hpe Karai Kasang hte tsan mat hkra masu nga ai gaw yawn hpa re.
2. Shut shai ai nawku htung ni a galaw ai lam ni gaw masha ni hpe Karai Kasang hte tsan mat hkra gara hku galaw nga ai kun?
Shut shai ai nawku htung ni gaw, masha ni hpe Yehowa kanawn mazum shangun mayu ai zawn, n kanawn mazum ai. Chyum Laika hta, shut shai ai nawku htung ni a “yubak lamu dep hkra law wa ai” ngu tsun da ai. (Shingran 18:5) Tsa ban shaning law law hta, shut shai ai nawku htung ni gaw, mung masa lam hta shang lawm ai, majan ni hpe madi shadaw ai, masha wunawng wuwa si hkra galaw ai, madi shadaw ai. Nawku htung ningbaw nkau mi gaw, lusu mayu ai majaw hpung masha ni kaw na alu law law hpyi shawn ma ai. Dai zawn galaw ai lam ni gaw, Karai Kasang hpe shanhte n chye ai hpe sakse madun ai. Karai Kasang hpe nawku taw ai ngu hkrak tsun na ahkang shanhte hta n nga ai.—1 Yawhan 4:8 hpe hti u.
3. Shut shai ai nawku htung ni hte seng nna Karai Kasang gara hku hkamsha ai kun?
Shut shai ai nawku htung ni a galaw ai lam a majaw, nang pyi masin pawt ai nga yang Yehowa gara hku hkamsha na ngu nang shadu ai kun? Shi gaw shinggyim masha ni hpe grai tsawra ai. Shinggyim masha ni hte shi hpe tsan mat hkra galaw ai sha n-ga, hpung masha ni hpe shut ai hku kanawn mazum nga ai nawku htung ningbaw ni hpe shi grai masin pawt ai. Shut shai ai nawku htung ni hpe yeng seng kau sana re, “htawm hpang galoi mung shi hpe bai mu lu” sana n re ngu nna ga sadi jaw da ai. (Shingran 18:21) Kade n na yang, Karai Kasang gaw shut shai ai nawku htung yawng hpe jahten kau sana re.—Shingran 18:8.
Kahtap Hkaja
Shut shai ai nawku htung ni hte seng nna Karai Kasang gara hku hkamsha ai hpe grau nna hkaja yu ga. Dai nawku htung ni galaw nga ai lam hte Yehowa hpe chye hkra galaw ai kaw na n jahkring kau ging ai lam hpe mung hkaja yu ga.
4. Karai Kasang gaw nawku htung yawng hpe n hkap la
Nawku htung ni gaw n bung tim, yawng gaw Karai Kasang hpang de sa ya ai lam ni re ngu masha law law kam ma ai. Raitim dai gaw jaw na kun? Mahte 7:13, 14 hpe hti nna, ndai ga san hpe bawngban u:
Asak lu shangun ai lam hte seng nna Chyum Laika hta gara hku tsun da ai kun?
VIDEO hpe hpaw, dai hpang, ndai ga san hpe bawngban u.
Nawku htung yawng hpe Karai Kasang hkap la ai ngu Chyum Laika hta tsun da ai kun?
5. Shut shai ai nawku htung ni gaw Karai Kasang a tsawra myit hpe n madun
Shut shai ai nawku htung ni gaw masha ni hpe Karai Kasang hte tsan mat hkra lam amyu myu hku nna galaw nga ai. Grai sawng ai lam langai gaw, majan hta shang lawm ai lam re. Ga shadawn langai hpe chye lu na matu, VIDEO hpe hpaw u. Dai hpang, ndai ga san ni hpe bawngban u.
Nambat II Mungkan majan laman, church law law gaw gara daw hta shang lawm wa ai kun?
Shanhte shang lawm wa ai daw hte seng nna nang gara hku hkamsha ai kun?
Yawhan 13:34, 35 hte 17:16 hpe hti u. Dai hpang, ndai ga san ni hpe bawngban u:
Nawku htung ni majan hta shang lawm ai hpe Yehowa gara hku hkamsha ai kun?
Shut shai ai nawku htung ni gaw, nhkru n kaja ai lam law law hpe galaw ai majaw, shanhte hta lit nga ai. Karai a tsawra myit hpe madun na matu nawku htung ni ra rawng nga ai gara lam ni hpe nang mu lu nga ai kun?
Shut shai ai nawku htung gaw Karai a tsawra myit hpe n madun
6. Karai Kasang gaw masha ni hpe shut shai ai nawku htung kaw na lawt shangun mayu
Shingran 18:4a hpe hti nna, ndai ga san hpe bawngban u:
Shut shai ai nawku htung a hkalem hkrum nga ai marai langai hpra hpe Karai Kasang hkye la mayu ai hpe nang chye ai shaloi gara hku hkamsha ai kun?
7. Tengman ai Karai Kasang hte seng nna matut hkaja u
Karai Kasang a ntsa na a mu mada ai lam hta shut shai ai nawku htung a shingkang ka-up hkrum ging ai kun? Kawa a hpaji rawng ai lam matsun hpe nyet kau ai kasha langai hpe shingran yu u. Kasha gaw nta kaw na pru mat nna akyang htenza mat ai. Kawa gaw kasha dai hku galaw ai hpe n ra sharawng ai. Ninghkap mat ai kasha a sak hkrung hkawm sa lam hte seng nna kawa hpe mara shagun ai gaw hpa majaw rap ra ai lam n nga ai kun?
Shut shai ai nawku htung ni a galaw ai lam a majaw, Yehowa a lam sharin la ai hpe jahkring kau ai, shi hpe mara shagun ai gaw rap ra ai lam nga na kun?
Nkau Mi Tsun Ai: “Nawku htung ni gaw manghkang law law hpe shabyin ai majaw, Karai Kasang a lam hpe ngai myit n lawm ai.”
Nang mung dai hku hkamsha ai kun?
Shut shai ai nawku htung ni a galaw ai lam ni gaw, Yehowa hpe anhte a mu mada ai a ntsa hpa majaw shingkang n ka-up ging ai kun?
Kadun Dawk
Shut shai ai nawku htung ni gaw, shanhte a sharin achyin ai lam ni hte grai sawng ai lailen ni hku nna, Karai Kasang hte masha ni hpe tsan mat hkra galaw nga ai. Karai Kasang gaw shut shai ai nawku htung ni hpe jahten kau na re.
Bai Maram
Shut shai ai nawku htung ni a sharin achyin ai lam hte shanhte a galaw ai lam hte seng nna nang gara hku hkamsha ai kun?
Shut shai ai nawku htung ni hte seng nna Yehowa gara hku hkamsha ai kun?
Shut shai ai nawku htung ni hpe Karai Kasang hpa galaw na kun?
Sawk Sagawn
Shut shai ai nawku htung ni hte seng nna Karai Kasang n ra sharawng ai lam lahkawng hpe hkaja yu u.
“Nawku Htung Yawng Gaw Bung Ai Kun? Yawng Hpe Karai Kasang Hkap La Ai Kun?” (Web sumhpa)
Kaga ni hte rau nawku dawjau na matu, Yehowa hpa majaw ra sharawng ai kun?
“Nawku Hpung Langai Hta Hpung Shang Masha Byin Ra Ai Kun?” (Web sumhpa)
Wa jau langai gaw shi a nawku htung hpe myit htum mat ai. Raitim, Karai Kasang hte seng ai tengman lam hpe sharin la ai kaw na n jahkring kau ai.
“Wa Jau Langai Gaw Shi A Nawku Hpung Kaw Na Hpa Majaw Pru Wa” (Dum Hprang!, February 2015)
Tsa ban shaning law law hta, nawku htung ni a masu ga ni a majaw, Karai Kasang hte tsan mat shangun ai, Karai Kasang gaw mazut ai ngu sawn la mat shangun ai. Dai masu ga 3 hte seng ai lam hpe hkaja yu u.
“Karai Kasang Hpe Sari Jahpoi Ai Masu Ga Ni” (Sin Langchyi, November 1, 2013)
a Shut shai ai nawku htung ni hpe Galu Kaba Ai Babelon ngu ai mying nga ai num langai hku nna, Shingran laika hta hpa majaw tsun da ai hpe chye na matu, Jahtum Matsing 1 hpe hti yu u.