Hkalup Hkam Ai​—Akyu Nga Ai Bandung

Hkalup hkam ai gaw Hkristan ni galaw nan galaw ra ai lam re ngu Yesu sharin ya ai. (Mahte 28:​19, 20 hpe hti u.) Raitim, hkalup hkam ai ngu ai gaw hpa lachyum rai kun? Dai bandung de du na matu masha langai hpa galaw ra ai kun?

1. Hkalup hkam ai ngu ai gaw hpa lachyum rai kun?

“Hkalup hkam ai” ngu ai ga gaw, hka kata de “dip bang ai” ngu lachyum nga ai Grik ga kaw na yu hkrat wa ai. Yesu hkalup hkam ai shaloi, Yawdan hka hta hkum ting lup bang ai, dai hpang “hka hta na shi pru lung wa” ai. (Marku 1:​9, 10) Dai hte maren, jet ai Hkristan ni mung hka kata hta hkum ting lup bang ai hku nna hkalup hkam ai.

2. Hkalup hkam ai gaw hpa hpe madun ai kun?

Hkalup hkam ai hku nna masha langai gaw, Yehowa Karai Kasang kaw shi hkum shi apnawng ai lam madun ai. Masha langai gaw apnawng ai lam hpe gara hku nna galaw ai kun? Hkalup garai n hkam shi yang, tinang hkrai tinang akyu hpyi nna, Yehowa hpe prat tup nawku mayu ai lam tsun dan ai. Shi a prat hta, Yehowa a magam gun ai hpe ahkyak htum shara hta tawn na, Yehowa hpe sha nawku na ngu nna ga sadi jaw ai re. Shi gaw ‘tinang hkum hpe nyet kau’ nna, Yesu a kasi ningli hte shi a sharin achyin ai lam hpe matut “hkan nang” na matu dawdan ra ai. (Mahte 16:24) Shi a apnawng ai lam hte hkalup hkam ai lam gaw, Yehowa, hpunau nauna ni hte grau hku hkau na matu lam hpaw wa ai.

3. Hkalup hkam lu hkra masha langai gaw gara hku rawt jat lu ai kun?

Yehowa hte seng ai lam hpe sharin la ai, shi hpe kam ai myit rawt jat hkra galaw ai hku nna, hkalup hkam lu hkra shajin mai ai. (Hebre 11:6 hpe hti u.) Machye machyang hte kamsham ai myit rawt jat wa yang, Yehowa hpe tsawra ai myit rawt jat wa na re. Rai yang, shi a lam hpe hkaw tsun mayu wa na, shi a tsang madang ni hte maren asak hkrung mayu wa na re. (2 Timohti 4:2; 1 Yawhan 5:3) Masha langai gaw Yehowa “Karai Kasang a myit ra ai hku asak hkrung” na nga yang, shi a prat hpe Karai Kasang kaw apnawng nna hkalup hkam na matu dawdan wa na re.​—Kolose 1:​9, 10, JCLB.a

Kahtap Hkaja

4. Yesu hkalup hkam ai kaw na sharin la lu ai lam

Mahte 3:​13-17 hpe hti nna, Yesu hkalup hkam ai hte seng ai lam hpe ahkri ahkrai hkaja yu u. Dai hpang ndai ga san ni hpe bawngban u:

• Yesu gaw ma chyangai aten kaw na hkalup hkam ai kun?

• Yesu gara hku hkalup hkam wa ai kun? Hka hte sha lapri bun ai kun?

Yesu hkalup hkam ngut ai shaloi, ginding aga hta Karai Kasang jaw da ai laksan bungli hpe galaw hpang wa ai. Luka 3:​21-23 hte Yawhan 6:38 hpe hti nna, ndai ga san hpe bawngban u:

• Yesu hkalup hkam ngut ai hpang, shi a prat hta gara bungli hpe shawng tawn wa ai kun?

5. Hkalup hkam ai gaw du lu ai bandung

Apnawng na, hkalup hkam na ngu myit ai shaloi, myit tsang ai lam ni nga na re. Raitim, dai zawn ahkyak ai dawdan lam ni hpe jahkrat na matu, tinang hkum tinang kam ai myit nga hkra shakut lu ai. Dai zawn galaw wa ai masha nkau a lam hpe chye na matu, VIDEO hpe hpaw.

VIDEO: Yehowa Hte Hku Hkau Lam Ngangkang Hkra Gawgap U (1:11)

Yawhan 17:3 hte Yaku 1:5 hpe hti nna, ndai ga san hpe bawngban u:

• Masha langai hkalup hkam lu hkra hpa gaw karum ya lu ai kun?

1. Yehowa hpe htani htana nawku mayu ai lam tsun dan ai hku nna apnawng ai lam galaw

2. Karai Kasang kaw apnawng da sai lam hpe shawa man hta hkalup hkam ai hku nna madun dan

6. Hkalup hkam ai gaw Yehowa a nta masha byin wa ai lachyum re

Anhte hkalup hkam ai shaloi, zinlum ai mungkan grup nta masha langai hku nna byin wa ai. Anhte gaw, gara shingdu labau kaw na raitim, gara kaw mi nga ai raitim, makam masham langai hpe sha hkaw tsun nna, akyang lailen hte seng ai tsang madang ni hpe mung maren hkan sa ai. Ga Shagawp 3:32 hte 1 Petru 2:17 hpe hti nna, ndai ga san hpe bawngban u:

• Hkalup hkam ai gaw masha langai hte Yehowa a hku hkau lam ntsa, hpunau nauna ni hte hku hkau lam a ntsa, gara hku akyu shabyin ya lu ai kun?

Kadun Dawk

Hkristan yawng hkalup hkam ra ai ngu Yesu sharin ya ai. Dai bandung de du na matu, masha langai gaw, Yehowa hpe kam ai myit ngangkang hkra gawgap ra ai. Shi a tsang madang hte maren asak hkrung ra nna, Shi kaw tinang hkum tinang apnawng ra ai.

Bai Maram

• Hkalup hkam ai ngu ai gaw hpa lachyum rai kun? Dai gaw hpa majaw ahkyak ai kun?

• Apnawng ai hte hkalup hkam ai gaw gara hku matut mahkai nga ai kun?

• Apnawng ai hte hkalup hkam na matu gara lam ni galaw ra ai kun?

Sawk Sagawn

Hkalup hkam ai gaw hpa lachyum re ai, hpa lachyum n re ai ngu ai hpe hkaja yu u.

“Hkalup Hkam Ai Ngu Ai Gaw Hpa Lachyum Rai Kun?” (Web sumhpa)

Hkalup hkam ai du hkra rawt jat lu ai lam ni hpe bai maram yu u.

“Yehowa Hpe Tsawra Nna Chyeju Dum Ai Majaw Hkalup Hkam” (Sin Langchyi, March 2020)

Hkalup hkam na ngu dawdan ai la langai gaw, shi a hkamsha lam hta sha n-ga, gara lam hta madung tawn ai hpe hti yu u.

“Shanhte Gaw Tengman Ai Lam Hpe Ngai Nan Tam Na Matu N-gun Jaw Wa” (Sin Langchyi, February 1, 2013)

Hkalup hkam ai gaw hpa majaw akyu nga ai bandung re ai lam hte dai bandung de du na matu, nang gara hku hkyen lajang mai ai hpe hti yu u.

“Ngai Hkalup Hkam Ging Ai Kun?” (Ramma Ni A Ga San​—Mahtai Ga, Volume 2, daw 37)