DAW 54
“Sadi Ai Hte Myit Su Ai Mayam” A Galaw Ai Lam
Yesu gaw Hkristan nawku hpung a Baw re. (Ehpesu 5:23) Dai ni aten hta, Yesu gaw sumsing lamu hta nga nna, mungkan ga hta nga ai shi hpang hkan ai ni hpe lam matsun ya na matu, “sadi ai hte myit su ai mayam” hpe akyu jashawn nga ai. (Mahte 24:45 hpe hti u.) Yesu lit shatsam da ai dai “mayam” hta ahkang aya nga ai. Raitim, Hkristu a ga hpe matut madat mara ai, Hkristu a kanau ni hku nna magam gun nga ai. Dai mayam gaw kadai rai kun? Anhte hpe gara hku lanu lahku ai kun?
1. “Sadi ai hte myit su ai mayam” gaw kadai rai kun?
Yehowa gaw shi a masha ni hpe lam matsun jaw na matu, la (sh) la ni lawm ai hpung kaji hpe, galoi mung akyu jashawn wa ai. (Malahki 2:7; Hebre 1:1) Yesu si ai hpang, kasa ni hte Yerusalem kaw nga ai myitsu salang ni gaw woi awn wa ai. (Kasa 15:2) Dai hte maren, dai ni aten na Yehowa Sakse ni a Uphkang Hpung re ai myitsu salang hpung kaji gaw, wenyi malu masha ni hpe lajang ya nna, hkaw tsun bungli hpe lam matsun ya nga ai. Yesu gaw dai hpung hpe, “sadi ai hte myit su ai mayam” hku nna lit shatsam da ai. (Mahte 24:45) Uphkang Hpung hta lawm ai ni gaw, chyoi pra ai wenyi hte namman jaw hkrum ai Hkristan ni rai nna, lamu ga aprat htum ai shaloi, sumsing Mungdan hta Hkristu hte rau uphkang na matu myit mada nga ai ni re.
2. Gara wenyi malu masha hpe sadi ai hte myitsu ai mayam lajang ya nga ai kun?
Sadi dung ai mayam gaw, “aten du jang [Hkristan ni] hpe lusha karan jaw” na ngu Yesu tsun wa ai. (Mahte 24:45) Malu masha gaw hkum hkrang hkam kaja lam jaw nna, n-gun lu shangun ai. Karai a Mungga kaw na lu la ai wenyi malu masha mung, Yehowa hpe sadi dung lu hkra karum ya nna, Yesu jaw da ai magam lit hpe gun hpai lu hkra karum ya ai. (1 Timohti 4:6) Dai wenyi lusha hpe zuphpawng ni, zuphpawng kaba ni, Chyum Laika hpe madung tawn ai laili laika ni hte video ni kaw na lu la ai. Dai gaw, Karai a myit ra ai lam hpe chye na na matu, shi hte hku hkau lam ngang kang na matu karum ya ai.
Kahtap Hkaja
“Sadi ai hte myit su ai mayam” re ai Uphkang Hpung hpe anhte hpa majaw ra ai lam hkaja yu ga.
Mungkan ting hta nga ai Yehowa Sakse ni hpe Uphkang Hpung gaw wenyi malu masha ni, lam matsun ni jaw ya nna, tatut karum ya
3. Yehowa amyu masha ni gaw hpawng de da ra
Yesu a lam matsun hte maren, Uphkang Hpung gaw Yehowa Sakse ni a bungli hpe hpawng de ya ai. Tsa ban langai na Hkristan ni mung dai hku galaw wa ai. VIDEO hpe hpaw.
1 Korinhtu 14:33, 40 hpe hti nna, ndai ga san hpe bawngban u:
Yehowa gaw shi a Sakse ni hpe hpawng de shangun mayu ai lam, ndai Chyum daw ni gaw gara hku madun dan ai kun?
4. Sadi dung ai mayam gaw hkaw tsun bungli hpe lam matsun
Hkaw tsun magam gaw tsa ban langai na Hkristan ni galaw wa ai ahkyak htum bingli re. Kasa 8:14, 25 hpe hti nna, ndai ga san ni hpe bawngban u:
Tsa ban langai na Hkristan ni a hkaw tsun bungli hpe kadai gaw lam matsun ya ai kun?
Petru hte Yawhan gaw kasa shada da a lam matsun hpe gara hku bai htang ai kun?
Hkaw tsun bungli gaw, Uphkang Hpung woi awn ya ai kaw na ahkyak htum bungli re. VIDEO hpe hpaw.
Yesu gaw, hkaw tsun bungli hpe ahkyak shatai tsun wa ai. Marku 13:10 hpe hti nna, ndai ga san ni hpe bawngban u:
Uphkang Hpung a matu hkaw tsun bungli gaw hpa majaw grai ahkyak ai kun?
Mungkan ting na hkaw tsun bungli hpe woi awn na matu “sadi ai hte myit su ai mayam” hpe hpa majaw ra ai kun?
5. Sadi dung ai mayam gaw lam matsun jaw
Uphkang Hpung gaw, mungkan ting na Hkristan ni hpe lam matsun jaw nga ai. Lam matsun jaw na matu shanhte gara hku dawdan ai kun? Tsa ban langai na Hkristan ni a uphkang hpung gaw dai hpe gara hku galaw wa ai hpe yu yu ga. Kasa 15:1, 2 hpe hti nna, ndai ga san ni hpe bawngban u:
Tsa ban langai na Hkristan nkau hta gara myit n hkrum ai lam nga ai kun?
Pawlu, Barnaba hte kaga ni gaw kadai kaw na lam matsun hpyi wa ai kun?
Kasa 15:12-18, 23-29 hpe hti nna, ndai ga san hpe bawngban u:
Dai lam hpe garai n dawdan shi yang, Karai a lam matsun lu na matu, tsa ban langai na uphkang hpung hpa galaw wa ai kun?—Daw kaji 12, 15 hte 28 hpe yu u.
Kasa 15:30, 31 hte 16:4, 5 hpe hti nna, ndai ga san ni hpe bawngban u:
Uphkang hpung jaw ai lam matsun hpe tsa ban langai na Hkristan ni gara hku bai htang ai kun?
Shanhte a madat mara ai lam hpe Yehowa gara hku shaman chyeju jaw ai kun?
2 Timohti 3:17 hte Yaku 1:5 hpe hti nna, ndai ga san hpe bawngban u:
Dai ni aten hta mung dawdan lam ni jahkrat ai shaloi, Uphkang Hpung gaw gara kaw lam matsun tam ai kun?
Nkau Mi Tsun Ai: “Uphkang Hpung a ga madat ai nga yang, masha hpang hkan ai re.”
Uphkang Hpung hpe Yesu woi awn nga ai hpe nang kam ai kun?
Kadun Dawk
Uphkang Hpung gaw, Yesu lit shatsam da ai “sadi ai hte myit su ai mayam” re. Mungkan ting na Hkristan ni hpe lam matsun ya nna, wenyi lusha lajang ya ai.
Bai Maram
“Sadi ai hte myit su ai mayam” hpe kadai lit shatsam da ai kun?
Uphkang Hpung gaw anhte hpe gara hku lanu lahku ai kun?
Uphkang Hpung gaw “sadi ai hte myit su ai mayam” re ai hpe nang kam ai kun?
Sawk Sagawn
Magam bungli ni hpe galaw lu hkra Uphkang Hpung hpe gara hku hpawng de da ai hpe hti yu u.
“Yehowa Sakse Ni A Uphkang Hpung Ngu Ai Gaw Hpa Rai A Ta?” (Web sumhpa)
Tup hkrak tengman ai wenyi malu masha hpe anhte lu na matu, Uphkang Hpung gara hku galaw ai hpe yu yu u.
Tup Hkrak Tengman Ai Wenyi Malu Masha Hpe Shapraw Ya Ai Lam (17:18)
Yesu jaw da ai magam lit hte seng nna Uphkang Hpung gaw gara hku hkamsha ai kun?
Uphkang Hpung hpe Yehowa lam matsun ya nga ai lam, zuphpawng ni hte zuphpawng kaba ni gaw gara hku sakse madun dan ai kun?