DAW 55
Na A Nawku Hpung Hpe Madi Shadaw Ya U
Mungkan ting na wan hku law ai masha ni gaw, mun hku law ai nawku hpung ni hta Yehowa hpe kabu gara let nawku nga ai. Shanhte lu la ai lam matsun ni a matu chyeju dum nna, nawku hpung hpe lam amyu myu hte myit rawt let madi shadaw ya nga ai. Na a nawku hpung hpe madi shadaw ya mayu ai kun?
1. Nawku hpung hpe madi shadaw na matu aten hte n-gun atsam hpe gara hku akyu jashawn lu ai kun?
Anhte yawng gaw nawku hpung hpe karum ya lu ai. Ga shadawn, nawku hpung hta asak kaba ai ni (sh) nkung nkang ai ni nga ai kun? Shanhte zuphpawng sa lu hkra karum ya lu na kun? Gat mari ya ai, nta bungli galaw ya ai zawn re ai lam ni hpe karum ya lu na kun? (Yaku 1:27 hpe hti u.) Nawku Htingnu jasan jaseng ai, gram lajang ai hta mung karum ya lu ai. Galaw na matu kadai mung n shadut ai. Karai Kasang hte hpunau nauna ni hpe tsawra ai myit gaw, “madu myit hte shang karum” na matu shadut ya ai.—Shakawn 110:3, JCLB.
Hkalup hkam da sai Sakse Hkam ni gaw, kaga lam ni hku nna mung nawku hpung hpe madi shadaw ya lu ai. Wenyi lam hta atsam nga ai hpunau ni gaw magam tau hku nna magam gun lu nna, hpang hta myitsu salang hku nna mung magam gun mai ai. Hpunau nauna ni gaw, ningshawng ni hku nna hkaw tsun magam hta myit rawt let madi shadaw lu ai. Sakse Hkam nkau gaw, nawku dawjau na matu, htingnu ni gawgap ai hta karum ya ai. Karum shingtau ra nga ai nawku hpung ni de htawt ai hku nna madi shadaw ya ai.
2. Anhte a arung arai ni hte nawku hpung hpe gara hku madi shadaw ya lu ai kun?
Anhte a “sut gan hte . . . Yehowa hpe hkungga let nawng ya” lu ai. (Ga Shagawp 3:9) Buga nawku hpung hte mungkan ting na hkaw tsun bungli hpe madi shadaw na matu, ja gumhpraw hte arung arai ni karum ya lu ai majaw anhte grai kabu ga ai. (2 Korinhtu 9:7 hpe hti u.) Anhte bang ai alu hpe, hkye mawai bungli hta mung akyu jashawn ai. Masha law law gaw, alu bang lu hkra laksan “mahkawng da” ma ai. (1 Korinhtu 16:2 hpe hti u.) Nawku Htingnu hta nga ai alu sutdek (sh) intanet hku nna, donate.jw.org hta alu bang mai ai. Arung arai ni hpe akyu jashawn nna shi hpe tsawra ai lam madun na matu, Yehowa anhte hpe ahkaw ahkang jaw da ai.
Kahtap Hkaja
Nawku hpung hpe madi shadaw ya lu ai lam nkau mi hpe hkaja yu ga.
3. Anhte a arung arai ni hpe akyu jashawn mai
Shawang myit hte jaw ai ni hpe Yehowa hte Yesu grai tsawra ai. Ga shadawn, shakut nna alu bang ai matsan ai gaida jan hpe Yesu shakawn ya wa ai. Luka 21:1-4 hpe hti nna, ndai ga san ni hpe bawngban u:
Yehowa a myit shapyaw ya lu hkra alu law law bang ra ai kun?
Myit masin mahkra hte bang ai alu a matu Yehowa hte Yesu gara hku hkamsha ai kun?
Alu gumhpraw hpe gara hku jailang ai hte seng nna chye na matu, VIDEO hpe hpaw. Dai hpang ndai ga san hpe bawngban u.
Mungkan ting na nawku hpung ni akyu lu hkra, alu gumhpraw hpe gara hku jailang nga ai kun?
4. Shawang lit gun nna karum ya mai
Chyum Laika prat hta, Yehowa hpe nawku ai ni gaw, nawku dawjau ai shara hpe myit rawt let gram lajang wa ai. Dai hta alu gumhpraw bang ai hta n-ga lawm ai. 2 Hkawhkam Labau 34:9-11 hpe hti nna, ndai ga san hpe bawngban u:
Yehowa a nta (sh) nawku ai shara hpe gram lajang na matu, Israela ni gara hku karum ya ai kun?
Yehowa Sakse ni gaw, moi na kasi ningli hpe gara hku hkan sa ai lam chye na matu, VIDEO hpe hpaw. Dai hpang ndai ga san ni hpe bawngban u.
Nawku Htingnu san seng na matu, gram lajang na matu hpa majaw ahkyak ai kun?
Gara lam ni hku nna nang karum ya lu ai kun?
5. Hpunau ni gaw, magam lit ni a matu shakut lu
Nawku hpung hpe madi shadaw na matu galaw lu ai lam yawng hpe galaw na matu, Hkristan la ni hpe Chyum Laika hta n-gun jaw da ai. Ga shadawn langai hpe yu na matu, VIDEO hpe hpaw. Dai hpang ndai ga san hpe bawngban u.
Video hta, nawku hpung hpe grau madi shadaw lu hkra hpunau Raiyen gara hku shakut wa ai kun?
Magam tau hte myitsu salang hku nna magam gun lu hkra, hpunau ni hta nga ra na atsam ningja ni hte seng nna Chyum Laika hta sanglang da ai. 1 Timohti 3:1-13 hpe hti nna, ndai ga san ni hpe bawngban u:
Magam tau hte myitsu salang ni hku nna magam gun na matu shakut nga ai hpunau ni kaw na hpa hpyi shawn da ai kun?
Shanhte a dinghku hte seng nna hpa hpyi shawn da ai kun?—Daw kaji 4 hte 11 hpe yu u.
Atsam ningja ni hpring hkra hpunau ni shakut ai nga yang, nawku hpung kaw na yawng gaw gara hku akyu lu la ai kun?
Nkau Mi San Chye Ai: “Yehowa Sakse ni gaw shanhte a bungli a matu gumhpraw gara hku lu ai kun?”
Nang gara hku htai na?
Kadun Dawk
Nawku hpung hpe madi shadaw na matu, anhte a aten, n-gun atsam hte arung arai ni hpe akyu jashawn na nga yang Yehowa grai chyeju dum ai.
Bai Maram
Nawku hpung hpe madi shadaw na matu, aten hte n-gun atsam hpe gara hku akyu jashawn lu ai kun?
Nawku hpung hpe madi shadaw na matu, arung arai hpe gara hku akyu jashawn lu ai kun?
Nawku hpung hpe gara lam hku nna madi shadaw ya mayu ai kun?
Sawk Sagawn
Karai Kasang gaw shi hpe nawku dawjau ai ni kaw na htam shi alu hpa majaw n hpyi shawn sai hpe hti yu u.
“Htam Shi Alu Hte Seng Nna Chyum Laika Hta Gara Hku Tsun Da Ai Kun?” (Web sumhpa)
Chyum Laika hta hkalup hkam da ai la ni a matu lit nkau jaw da ai. Raitim, hkalup hkam da ai num ni gaw dai lit ni hpe galaw ra wa yang gaw gara hku kun?
Hpunau nauna ni a matu laili laika ni hpe nden marai rawng let sa ya ai Sakse Hkam nkau mi a lam hpe yu yu u.
Alu gumhpraw jailang ai shaloi, anhte a uhpung gaw kaga nawku htung ni hte gara hku shai ai lam hti yu u.
“Yehowa Sakse Ni A Magam Bungli Hpe Gara Kaw Na Gumhpraw Hte Galaw Nga Ai Kun?” (Web sumhpa)