DAW 56
Nawku Hpung Kahkyin Gumdin Hkra Shakut
Hpunau nauna ni hte kanawn mazum ai shaloi, “Hpu nau ni myit hkrum nga nna, Rau hpawng nga lu ai gaw, Gade ngwi pyaw nga a hka!” ngu tsun wa ai Hkawhkam Dawi zawn anhte mung hkamsha ai. (Shakawn 133:1) Anhte a kahkyin gumdin lam gaw, shi hkrai shi byin wa ai n re. Langai hpra shakut ai majaw re.
1. Karai a masha ni hta gara laklai ai lam nga ai kun?
Nang gaw kaga mungdan hta zuphpawng sa lung ai nga yang, shanhte a amyu ga hpe n chye na tim, myit hta alum ala hkamsha na re. Hpa majaw kun? Chyum Laika hkaja ai shaloi lang ai laili laika bung nna, shada da mung tsawra na matu shakut ai majaw re. Gara kaw mi nga tim, anhte yawng gaw, “Yehowa amying hpe shaga nna, myit langai sha hte shi hpe daw jau” nga ai.—Zehpani 3:9.
2. Grau nna kahkyin gumdin hkra gara hku galaw lu ai kun?
“Nanhte a myit ting hte shada da tsaw ra nga mu.” (1 Petru 1:22) Ndai lam matsun hpe gara hku hkan sa mai na kun? Kaga ni a n hkum tsup ai lam hpe myit maju jung na malai, shanhte a kaja ai atsam ningja ni hpe yu u. Myit lawm ai lam bung ai shada da sha kanawn na malai, shingdu labau n bung ai hpunau nauna ni hpe chye hkra shakut u. Anhte hta nga chye ai lachyen lahka ai myit ni hpe shaw kau na matu gaw yak chye ai.—1 Petru 2:17 hpe hti u.a
3. Hkristan langai hte myit n hkrum ai lam nga yang hpa galaw mai ai kun?
Anhte gaw kahkyin gumdin ai ni raitim, n hkum tsup ai ni re. Kalang lang, shada da myit daw shangun chye nna, hkra machyi shangun chye ai. Dai majaw, Chyum Laika hta ndai hku tsun da ai: “Mara langai ngai nga yang gaw, shada da [matut nna, NWT] raw dat kau hkat nga mu: dai Madu nanhte a mara hpe raw dat kau ya ai hte maren, nanhte mung galaw nga mu.” (Kolose 3:13 hpe hti u.) Anhte gaw, Yehowa hpe hti n dang hkra, hkra machyi shangun tim, shi mara raw ya ai. Dai majaw, hpunau nauna ni hpe mara raw ya na matu shi hpyi shawn ai re. Marai langai ngai hpe nang hkra machyi shangun ai nga yang, masa lam ni bai kaja hkra nang shawng shakut u.—Mahte 5:23, 24 hpe hti u.b
Kahtap Hkaja
Nawku hpung kahkyin gumdin nna simsa hkra galaw mai na lam ni hpe hkaja yu ga.
Simsa hkra hpa galaw lu ai kun?
4. Lachyen lahka ai myit hpe gasat
Hpunau nauna yawng hpe anhte tsawra ai. Raitim, anhte hte n bung ai ni hpe tsawra na matu gaw yak chye ai. Hpa gaw karum ya lu ai kun? Kasa 10:34, 35 hpe hti nna, ndai ga san ni hpe bawngban u:
Yehowa gaw masha amyu yawng hpe shi a Sakse ni hku nna hkap la ai. Yehowa hpe kasi la ai hku nna, shingdu labau n bung ai ni hpe gara hku mu mada ging ai kun?
Na a buga hta byin nga ai gara zawn lachyen lahka ai lam hpe nang koi mayu ai kun?
2 Korinhtu 6:11-13 hpe hti nna, ndai ga san hpe bawngban u:
Shingdu labau n bung ai hpunau nauna ni hpe tsawra wa hkra gara hku galaw mai na kun?
5. Mara raw ya nna simsa hkra galaw u
Yehowa gaw mara raw hkrum na matu n ra tim, anhte hpe shi mara raw ya ai. Shakawn 86:5 hpe hti nna, ndai ga san ni hpe bawngban u:
Yehowa a mara raw ya ai lam gaw kade daram kaba ai kun?
Shi a mara raw ya ai lam hpe hpa majaw chyeju dum ai kun?
Kaga ni hte simsa lam n nga hkra, gara masa ni gaw yak shangun ai kun?
Hpunau nauna ni hte matut kahkyin gumdin hkra, Yehowa hpe gara hku kasi la mai na kun? Ga Shagawp 19:11 hpe hti nna, ndai ga san hpe bawngban u:
Marai langai ngai gaw nang hpe myit n pyaw hkra galaw ai nga yang, masa lam ni bai kaja wa hkra gara hku galaw mai na kun?
Anhte mung, kaga ni hpe myit n pyaw hkra kalang lang galaw hkrup ai. Dai shaloi hpa galaw ging ai kun? VIDEO hpe hpaw, dai hpang ndai ga san hpe bawngban u.
Ndai video hta, simsa lam nga hkra nauna hpa galaw wa ai kun?
6. Hpunau nauna ni a kaja ai atsam ningja ni hpe tam u
Hpunau nauna ni hte anhte grau hkau wa yang, shanhte a gawngkya lam ni, kaja ai atsam ningja ni hpe chye wa ai. Kaja ai atsam ningja ni hpe anhte gara hku myit maju jung lu na kun? VIDEO hpe hpaw, dai hpang ndai ga san hpe bawngban u.
Hpunau nauna ni hta nga ai kaja ai atsam ningja ni hpe mu lu hkra hpa gaw karum ya lu ai kun?
Yehowa gaw anhte hta nga ai kaja ai atsam ningja ni hpe sha myit maju jung ai. 2 Hkawhkam Labau 16:9a hpe hti nna, ndai ga san hpe bawngban u:
Nang hta nga ai kaja ai atsam ningja ni hpe Yehowa myit maju jung ai hpe chye ai majaw nang gara hku hkamsha ai kun?
Manu dan ai tsin lungseng gaw ana ni nga tim, naw manu dan ai. Dai zawn sha, hpunau nauna yawng gaw n hkum tsup tim, Yehowa a matu manu dan
Nkau Mi Tsun Ai: “Ngai shi hpe mara raw ya na matu, shi shawng hpyi nem ra ai.”
Hpa majaw kaga ni hpe sharawng awng let mara raw ya ging ai kun?
Kadun Dawk
Nawku hpung hta kahkyin gumdin lam matut nga na matu, hpunau nauna yawng hpe tsawra nna, mara raw ya ra ai.
Bai Maram
Lachyen lahka ai myit hpe gara hku gasat lu na kun?
Hkristan langai hte myit n hkrum ai lam nga yang hpa galaw lu ai kun?
Kaga ni hpe mara raw ya ai Yehowa a kasi ningli hpe hpa majaw hkan sa mayu ai kun?
Sawk Sagawn
Kaga ni hpe tara n jeyang hkrup hkra, Yesu a ga shadawn gaw gara hku karum ya ai hpe yu yu u.
Tinang n shut ai raitim, hpyi nem ra ai kun?
“Hpyi Nem Ai—Simsa Shangun Ai Lam” (Sin Langchyi, November 1, 2002)
Kaga ni hpe myiman n lata ai sha kanawn mazum ra ai lam, masha nkau gara hku sharin la wa ai hpe yu yu u.
Nawku hpung hpe hkra machyi shangun na masa n du shi yang, marai langai hte byin ai manghkang hpe gara hku hparan lu na lam hpe hti yu u.
“Myit N Hkrum Hkat Ai Lam Ni Hpe Tsawra Myit Hte Hparan U” (Sin Langchyi, May 2016)
a Kap bra ana n chyam bra hkra, Hkristan tsawra myit gaw gara hku karum ya ai hpe, Jahtum Matsing 6 hta hti yu u.
b Hpaga lam, upadi hte seng ai lam ni hpe gara hku hparan mai ai hpe chye na matu, Jahtum Matsing 7 hpe yu u.