Yesu Hpe Kasi La Nna Matut Simsa Nga U

1-2. Yesu hpa majaw mayak mahkak hkrum wa ai kun?

YESU gaw, shinggyim masha prat hpang jahtum shani hta mayak mahkak hkrum wa ai. Kade nna yang, nhkru ai masha ni a lata hta nni nkri hkrum let si ra sana re. Si na majaw sha, shi myit tsang nga ai n re. Shi a Kawa hpe grai tsawra nna myit shapyaw ya mayu ai. Hkrum wa na mayak mahkak ni hpe sadi dung let hkam jan na nga yang, Yehowa a amying chyoi pra san seng na hpe shi chye ai. Yesu gaw masha ni hpe mung tsawra ai. Shinggyim masha ni htani htana asak hkrung lu na myit mada lam gaw, Yehowa hpe si ai du hkra shi sadi dung ai lam hta madung nga ai hpe mung shi chye ai.

² Yesu gaw, grai myit tsang tim myit simsa lam nga wa ai. “Nye a ngwi pyaw ai nanhte hpe ngai jaw ma de ai” nga nna sape ni hpe Yesu tsun wa ai. (Yhn 14:27) Yehowa hte hku hkau lam nga ai ni lu la ai “Karai Kasang a ngwi pyaw ai” lam ngu ai simsa ai myit shi hta nga ai. Dai lam gaw Yesu hpe myit n tsang na matu karum ya wa ai.​—⁠Hpl 4:6, 7.

3. Ndai sumhpa hta gara lam hpe hkaja mat na kun?

³ Yesu hkam jan wa ai manghkang zawn anhte kadai mung hkrum na n re. Raitim, Yesu hpang hkan ai ni gaw mayak mahkak ni hkrum na re. (Mat 16:24, 25; Yhn 15: 20) Yesu zawn anhte hta mung, kalang lang myit tsang ai lam nga chye ai. Myit tsang nna myit simsa lam n nga mat ai baw n byin hkra, gara hku galaw lu na kun? Ginding ga ntsa hta, Yesu hkaw tsun magam gun wa ai shaloi galaw wa ai lam 3 hte anhte manghkang ni hkrum ai shaloi shi hpe gara hku kasi la lu na lam hkaja yu ga.

Yesu Gaw Chyahkring Hkring Akyu Hpyi

4. 1 Htesaloni 5:17 hpe myit hta bang nna, ginding ga ntsa asak hkrung ai hpang jahtum shani ni hta Yesu chyahkring hkring akyu hpyi wa ai lam ga shadawn tsun dan u. 

⁴ 1 Htesaloni 5:17 hpe hti u. Yesu gaw, shinggyim asak aprat hpang jahtum shana hta, chyahkring hkring akyu hpyi wa ai. Shi si ai myit dum poi hpe gara hku galaw na hte seng nna madun dan ai shaloi, muk hte tsabyi a matu akyu hpyi wa ai. (1 Ko 11:23-25) Shalai Wa Ai Poi galaw ai shara kaw nna garai n pru shi ai aten hta mung, shi a sape ni hte arau akyu hpyi ai. (Yhn 17:1-26) Dai shana hta sha, shi hte sape ni Tsanlun Bum de du ai shaloi, chyahkring hkring akyu hpyi ai. (Mat 26:36-39, 42, 44) Shi si na mahka hpang jahtum tsun ai ga mung, akyu hpyi ga sha re. (Luk 23:46) Yesu gaw, shinggyim aprat hpang jahtum shani hta byin ai lam yawng hte seng nna Yehowa kaw akyu hpyi wa ai.

5. Hpa majaw kasa ni nden marai hta ningra mat ai kun?

⁵ Yesu mayak mahkak ni hpe hkam jan lu ai lam langai gaw, shi Kawa kaw chyahkring hkring akyu hpyi nna kamhpa wa ai majaw re. Raitim, kasa ni gaw dai shana hta, htep lahti akyu hpyi ai lam n nga ma ai. Dai majaw, chyam dinglik hkrum ai shaloi, shanhte a nden marai hta ningra mat ai re. (Mat 26:40, 41, 43, 45, 56) Anhte mung manghkang ni hkrum ai shaloi, Yesu hpe kasi la nna ayan na “akyu hpyi” yang she, matut sadi dung lu na re. Hpa a matu anhte akyu hpyi mai ai kun?

6. Myit simsa lam lu hkra makam masham gaw gara hku karum ya ai kun?

⁶ “Anhte a kam sham ai myit shalaw ya mi” nga nna Yehowa kaw akyu hpyi mai ai. (Luk 17:5; Yhn 14:1) Satan gaw, Yesu hpang hkan ai ni yawng hpe chyam dinglik na re ai majaw, anhte hta makam masham nga ra ai. (Luk 22:31) Manghkang langai hpang langai hparan ra nga tim, matut simsa lu na matu makam masham gaw anhte hpe gara hku karum ya na kun? Mayak mahkak ni hpe dang lu ai daram hparan ngut sai nga yang, ngam ai lit hpe Yehowa a lata hta ap da na matu, makam masham gaw karum ya na re. Hpa majaw nga yang, anhte hparan lu ai hta grau nna Yehowa hparan ya lu ai hpe anhte kam ai majaw myit simsa lam lu ai re.​—⁠1 Pe 5:6, 7.

7. Hpunau Robat a tsun ai ga kaw nna hpa sharin la lu ai kun?

⁷ Gara mayak mahkak mi anhte hkrum nga tim, akyu hpyi ai gaw myit simsa lu hkra karum ya ai. Ya, asak 80 jan sai sadi dung ai myitsu salang Robat a kasi hpe myit yu ga. Shi ndai hku tsun ai: “Hpilipi 4:6, 7 hta lawm ai hpaji jaw ga gaw, prat hta hkrum ai mayak mahkak ni hpe hparan lu hkra karum ya ai. Ngai hta ja gumhpraw mayak mahkak nga ai. Myitsu salang langai hku nna chyahkring chyahkra magam n lu gun mat ai.” Myit simsa lu hkra hpa gaw hpunau Robat hpe karum ya wa ai kun? Shi ndai hku tsun ai: “Ngai myit tsang wa yang, kalang ta akyu hpyi ai. Sharawng shara hte chyahkring hkring akyu hpyi magang, grau simsa magang re ai hpe ngai kam ai.”

Yesu Gaw Myit Rawt Let Hkaw Tsun

8. Yawhan 8:29 hta tsun da ai hte maren Yesu hpe myit simsa shangun ai kaga lam langai gaw hpa rai kun?

⁸ Yawhan 8:29 hpe hti u. Yesu gaw, zingri zingrat hkrum ai shaloi hta pyi, myit simsa lam lu wa ai. Hpa majaw nga yang, shi Kawa a myit pyaw hkra shi galaw ya nga ai hpe chye ai majaw re. Shi galaw na matu grai yak tim pyi, matut nna madat mara wa ai. Shi Kawa hpe tsawra nna, shi a magam hpe ahkyak htum lam hku nna galaw wa ai. Mungkan ga de garai n sa shi yang, Karai a “magam gun daju” hku nna galaw wa ai. (Gsh 8:30, NW) Mungkan ga hta nga ai shaloi mung, shi Kawa a lam kaga ni hpe myit rawt let sharin ya wa ai. (Mat 6:9; Yhn 5:17) Dai bungli gaw Yesu hpe grai ngwi pyaw shangun ai.​—⁠ Yhn 4:34-36.

9. Hkaw tsun magam hta amu law nga ai gaw hpa majaw myit simsa lam lu shangun ai kun?

⁹ Anhte gaw, Yesu hpe kasi la ai hku nna Yehowa hpe madat mara let, “Madu a bungli hta tutnawng e tsam mari shakut sharang nga” ga ai. (1 Ko 15:58) Hkaw tsun magam hta anhte “myit maju jung” na nga yang, hkrum nga ai manghkang ni hte seng nna jaw ai ningmu nga wa na re. (Kas 18:5, NW) Ga shadawn, anhte hta grau sawng ai manghkang ni hpe hkrum nga ai ni hte, hkaw tsun magam hta chyahkring hkring hkrum ga ai. Shanhte gaw, Yehowa hpe tsawra na matu sharin la nna shi a hpaji jaw ga ni hpe hkan sa ai shaloi, shanhte a aprat gaw kaja wa nna ngwi pyaw wa ai. Dai lam ni hpe anhte mu shagu, Yehowa anhte hpe lanu lahku ai lam, grau kam wa ai. Dai makam masham gaw, myit simsa lam lu hkra karum ya ai. Myit daw myit hten nna manu n dan ai ngu hkamsha ai nauna langai gaw, dai lam teng ai hpe chye wa ai. Shi ndai hku tsun ai: “Hkaw tsun magam hta amu law nga ai shaloi, nye a hkamsha lam hpe hkang lu nna grau pyaw wa ai. Hkaw tsun magam hta rai nga yang, Yehowa hte grau ni htep ai ngu hkamsha ai.”

10. Nauna Brenda tsun ai ga kaw nna hpa sharin la lu ai kun?

¹⁰ Nauna Brenda a mahkrum madup hpe mung myit yu ga. Shi hte shi kasha gaw, grai machyi sawng nga ai. Shi gaw, leng kap punghkum hta dung nga ra nna, n-gun mung n nga ai. Kalang lang, nta langai hpang langai hkaw tsun sa tim, madung hku nna gaw laika ka nna hkaw tsun ai. Shi ndai hku tsun ai: “Ngai hkrum nga ai machyi makaw lam hpe ya aten hta n mai tsi sai hpe chye nna hkap la lu ai shaloi, hkaw tsun magam hta myit maju jung lu wa ai. Ngai hkaw tsun ai shaloi, myit tsang hpa lam ni hpe n myit sai. De a malai, hkaw tsun lawk hta nga ai ni hpe, gara hku karum ya lu na hpe sha myit maju jung ai. Ngai hkaw tsun nga ai shaloi, htawm hpang myit mada lam hte seng nna ayan myit nga ai.”

Manang Ni Karum Ya Ai Hpe Yesu Hkap La

11-13. (a) Kasa ni hte kaga ni gaw Yesu a manang ajet re ai hpe gara hku sakse madun wa ai kun? (b) Manang ni gaw Yesu hpe gara hku akyu shabyin ya ai kun?

¹¹ Yesu hkaw tsun bungli galaw ai shaloi, sadi dung ai kasa ni gaw Yesu a matu manang ajet tai wa ma ai. “Hpu nau wa manoi ai hta, grau manoi ai jinghku wa mung nga ai” ngu nna Ga Shagawp hta tsun da ai hte maren shanhte galaw wa ai. (Gsh 18:24) Dai manang ni hpe Yesu manu shadan wa ai. Hkaw tsun magam gun ai laman, shi a kanau majing ni gaw shi hpe n kam sham ma ai. (Yhn 7:3-5) Kalang mi hta, Yesu myit n gring mat sai ngu nna pyi, jinghku ni sawn la ma ai. (Mrk 3:21) Raitim, sadi dung ai kasa ni hte seng nna gaw, shi n si shi ai shana hta ndai hku lu tsun wa ai: “Nanhte chyawm gaw, ngai gung lau hkrum shatsang ai hta, ngai hte rau nga nan nga ai ni, rai nga myit dai.”​—⁠Luk 22:28.

¹² Kalang lang, kasa ni gaw Yesu hpe myit daw hkra galaw wa tim, shanhte a shut ai lam ni hpe n re ai sha, shi hpe kam ai shanhte a makam masham hpe sha yu wa ai. (Mat 26:40; Mrk 10:13, 14; Yhn 6:66-69) Shi sat hkrum na shana hta sadi dung ai ni hpe ndai hku tsun wa ai: “Nanhte hpe jinghku she ngai ngu na ma de ai; nye Wa kaw na ngai na la ai hte yawng, ngai nanhte hpe chye shangun ma sa de ai.” (Yhn 15:15) Yesu a sape ni gaw shi hpe grai n-gun jaw wa ai. Yesu a hkaw tsun magam hta shanhte karum ya ai majaw, Yesu grai kabu ai.​—⁠Luk 10:17, 21.

¹³ Yesu hta kasa ni sha n-ga, hkaw tsun magam hte kaga lam ni hta karum ya ai num, la, manang ni mung nga ai. Nkau nga yang, shanhte a nta de saw shaga nna malu masha daw ma ai. (Luk 10:38-42; Yhn 12:1, 2) Nkau nga yang, shi hte arau bu hkawm nna, tinang lu ai arung arai ni hpe jawm lang ma ai. (Luk 8:3) Yesu gaw shanhte a matu kaja ai manang tai wa ai majaw, shanhte mung shi a matu manang kaja ni tai wa ai. Shanhte a matu kaja ai lam ni galaw ya wa nna, shanhte n lu galaw ai lam hpe mung n hpyi shawn wa ai. Yesu gaw hkum tsup ai wa raitim, n hkum tsup ai manang ni a madi shadaw ya ai lam hpe chyeju dum wa ai. Yesu hpe myit simsa lam matut nga hkra shanhte karum ya wa na re.

14-15. Manang kaja lu hkra gara hku galaw mai na kun? Shanhte gaw anhte hpe gara hku karum ya na kun?

¹⁴ Yehowa hpe anhte matut sadi dung lu hkra, manang kaja ni gaw karum ya ai. Manang kaja ni lu la na matu, tinang nan kaja ai manang tai ra ai. (Mat 7:12) Ga shadawn, tinang a n-gun atsam hte ahkying aten ni hpe akyu jashawn nna, kaga ni, laksan hku nna ‘ra kadawn nga ai ni’ hpe karum ya na matu, Chyum Laika hta tsun da ai. (Ehp 4:28) Nawku hpung hta nang karum ya lu na marai langai ngai hpe myit lu ai kun? Asak kaba ai (sh) machyi ai ni hpe gat mari na matu karum ya mai na kun? Ja gumhpraw yak nga ai dinghku hpe malu masha daw ya mai na kun? jw.org^® website hte JW Library^® app hpe nang akyu jashawn chye yang, nawku hpung hta nga ai ni mung dai kaw nna wenyi sutgan lu la hkra karum ya lu na kun? Kaga ni hpe karum ya na matu myit maju jung na nga yang, anhte grau nna pyaw wa na re.​—⁠Kas 20:35.

¹⁵ Anhte manghkang ni hkrum ai shaloi manang ni gaw madi shadaw ya nna, matut myit simsa lu hkra karum ya na re. Yoba gaw shi a manghkang ni hte seng nna tsun dan ai shaloi, Elihu madat ya wa ai zawn, manang ni gaw anhte a hkamsha lam ni hpe tsun dan ai shaloi myit galu let madat ya nna karum ya na re. (Yob 32:4) Manang ni gaw, anhte a matu dawdan ya na hpe n mai myit mada ai. Raitim, Chyum Laika hta madung da ai shanhte a hpaji jaw ga hpe madat na nga yang, hpaji rawng wa na re. (Gsh 15:22) Hkawhkam Dawi gaw, manang ni karum ya ai hpe shagrit shanem let hkap la wa ai zawn, anhte mung ra kadawn nga ai shaloi, manang ni karum ya ai hpe shagrit shanem let hkap la ra ai. (2 Sa 17:27-29) Dai zawn kaja ai manang ni gaw Yehowa jaw ai kumhpa re.​—⁠Yak 1:17.

Matut Myit Simsa Lu Na Lam

16. Hpilipi 4:6, 7 hku nga yang simsa lam hpe gara lam hku nna sha lu la mai na kun? Sang lang dan u.

¹⁶ Hpilipi 4:6, 7 hpe hti u. Yesu Hkristu hku nna simsa lam anhte lu la na ngu Yehowa hpa majaw tsun ai kun? Yehowa a yaw shada lam hta lawm ai Yesu a daw hpe anhte kam nna chye na yang she, matut simsa lam lu na majaw re. Ga shadawn, Yesu jaw wa ai gawng malai hkungga a majaw sha, anhte a mara ni raw kau hkrum ai. (1 Yh 2:12) Dai lam hpe anhte myit ai shaloi, shalan shabran lam lu ga ai. Satan hte shi mungkan a majaw hten za mat ai lam yawng hpe, bai kaja wa hkra Karai Mungdan a Hkawhkam Yesu gaw galaw ya na re. (Esa 65:17; 1 Yh 3:8; Shr 21:3, 4) Dai lam gaw anhte hpe myit mada lam lu shangun ai. Anhte hpe Yesu galaw shangun ai magam gaw yak tim, ndai hpang jahtum nhtoi ni hta anhte hte shi arau nga nga nna madi shadaw ya nga ai. (Mat 28:19, 20) Dai hpe chye lu ai majaw, nden marai lu la ga ai. Shalan shabran lam, myit mada lam hte nden marai ni gaw anhte ra nga ai myit simsa lam lu na matu ahkyak ai lam ni re.

17. (a) Hkristan langai gaw gara hku nna myit simsa lu na kun? (b) Yawhan 16:33 hta ga sadi jaw da ai hte maren anhte hpa galaw lu na kun?

¹⁷ Grai sawng ai manghkang ni anhte hkrum nga tim, matut simsa hkra gara hku galaw mai na kun? Yesu galaw wa ai lam ni hpe kasi la ai hku nna galaw mai ai. Langai, akyu hpyi u. Hpa mi byin nga tim matut nna akyu hpyi u. Lahkawng, Yehowa hpe madat mara nna, mayak mahkak nga yang pyi, myit rawt let hkaw tsun u. Masum, mayak mahkak ni hkrum ai shaloi, manang ni karum ya ai hpe hkap la u. Rai yang, Karai Kasang a ngwi pyaw ai gaw na a myit masin hpe bau sin ya na re. Yesu zawn, mayak mahkak yawng hpe nang awng dang lu na re.​—⁠Yawhan 16:33 hpe hti u.