Hkum Shan Roi Rip Hkrum Ai Ni Hpe Shalan Shabran Ya Ai Lam (Daw 4 kaw nna 4)

1-2. (a) Shinggyim masha ni gaw shalan shabran lam ra nna, shalan ya lu ai hpe gara ga shadawn gaw madun dan ai kun? (b) Ma nkau gaw gara hku hkra machyi nga ai kun?

SHINGGYIM masha ni gaw, shalan shabran lam ra nna, shalan ya lu ai atsam mung nga ai. Ga shadawn, ma langai ginsup nga ai laman kashawt nna shi lahput hpye mat ai. Shi nu yan wa hpang de hkrap let kagat sa mat wa ai. Kanu yan kawa gaw hpye ai ana hpe n shamai ya lu tim, shalan shabran ya lu ai. Shan gaw ma hpe hpa byin mat ai rai? ngu san nna, myiprwi katsut kau ya ai. “Mai sai yaw, mai sai yaw” ngu tsun let tsi chya ya nna, hpye ai shara hpe kayawp ya na re. Dai hpang, ma gaw hkrap ai zim mat nna, bai pyi ginsup nga na re. Hpang hta, hpye ai ana mai mat ai.

² Kalang lang, ma ni gaw grai sawng ai lam hku nna hkra machyi chye ai. Nkau gaw hkum shan roi rip hkrum ma ai. Ma gaw kalang daram (sh) shaning law law roi rip hkrum wa chye ai. Roi rip hkrum ai majaw shanhte a myit hta grai sawng ai ningma ngam mat ai. Dai zawn byin ai lam nkau hta, roi rip ai ni gaw, rim hkrum nna, ari jaw hkrum ma ai. Nkau chyawm gaw, ari n jaw hkrum ai zawn rai nga ai. Roi rip ai wa gaw, kalang ta ari jaw hkrum tim, roi rip hkrum ai ma gaw, kaba wa ai aten du hkra naw hkra machyi nga ai.

3. 2 Korinhtu 1:3, 4 hta tsun da ai hku nga yang Yehowa myit ra ai lam gaw hpa rai kun? Gara ga san hpe hkaja mat na kun?

³ Hkristan langai gaw, ma prat hta hkum shan roi rip hkrum wa nna, asak kaba ai du hkra, hkra machyi nga ai majaw, shi hpe hpa gaw karum ya lu na kun? (2 Korinhtu 1:3, 4 hpe hti u.) Yehowa myit ra ai lam gaw, shi a sagu ni tsawra hkrum nna shalan shabran lam lu na matu re. Ndai ga san masum hpe hkaja yu ga: (1) Ma prat hta roi rip hkrum wa ai ni gaw, hpa majaw shalan shabran lam ra ai kun? (2) Ra nga ai shalan shabran lam hpe kadai gaw jaw lu na kun? (3) Shanhte hpe anhte gara hku shalan shabran ya mai na kun?

Shalan Shabran Lam Hpa Majaw Ra Ai Kun?

4-5. (a) Ma ni gaw asak ram sai ni hte shai ai lam nga ai hpe chye na matu hpa majaw ahkyak ai kun? (b) Ma hpe hkum shan roi rip ai lam gaw, kaga ni a ntsa ma a kamhpa myit hpe gara hku hkra machyi shangun ai kun?

⁴ Ma prat hta roi rip hkrum wa ai nkau gaw, shaning grai na mat tim shalan shabran lam matut ra nga ai. Hpa majaw kun? Ma ni gaw asak ram ai ni hte shai ai lam grai law hkra nga ai. N tara ai lam hpe asak ram sai ni hkrum ai shaloi, hkra machyi ai lam ni hte ma ni hkrum ai shaloi hkra machyi ai lam ni gaw n bung ai. Ga shadawn nkau hpe yu yu ga.

⁵ Ma ni gaw shanhte hpe bau maka let lanu lahku ya ai ni hpe kamhpa ra nna shanhte hte hku hkau ra ai. Dai zawn makyit sumri gaw, ma ni hpe shim lum lam lu shangun ai. Shanhte hpe tsawra ai ni hpe kamhpa na matu mung sharin ya ai re. (Shk 22:9) Raitim, roi rip ai lam law malawng gaw nta hta byin chye nna, roi rip ai ni gaw nta masha, jinghku majing ni, nta masha ni a manang ni rai ma ai gaw yawn hpa re. Tinang kamhpa ai marai langai a roi rip hkrum ai majaw, shaning grai na mat tim, ma ni gaw kaga ni hpe n kam ai myit nga mat ai.

6. Hkum shan roi rip ai gaw hpa majaw grai nhkru nna hkra machyi shangun ai kun?

⁶ Ma ni gaw tinang hkum tinang n makawp maga lu ai. Ma hpe roi rip ai lam gaw grai nhkru nna, hkra machyi shangun ai lam re. Hkungran da ai ni a lapran hkum shan kanawn ai hte seng ai lam hpe garai n chye shi ai ma ni hpe dai lam galaw na matu shadut ai gaw, grai nan hkra machyi shangun ai. Ma ni hpe hkum shan roi rip ai gaw, ngang hte seng nna shut ai hku mu mada mat shangun ai. Manu n dan ai ngu hkamsha shangun nna, kaga ni hpe mung kam ai myit n nga mat shangun ai.

7. (a) Ma ni hpe hkum shan roi rip na matu hpa majaw loi ai kun? Roi rip ai ni gaw gara hku tsun chye ai kun? (b) Dai masu ga ni gaw gara hku hkra machyi shangun ai kun?

⁷ Ma ni gaw chye myit ai atsam, sawn dinglik lu ai atsam (sh) shoihpa hpe chye nna koi lu ai atsam ni n nga shi ai. (1 Ko 13:11) Dai majaw, roi rip ai ni gaw ma ni hpe hkalem na matu grau loi ai re. Shanhte gaw ma ni hpe shoihpa nga ai masu ga ni hpe sharin ya ai. Ga shadawn, roi rip ai lam byin ai gaw ma ni nan shut ai majaw re ngu tsun ai. Byin ai lam hpe ip da na matu hte kaga ni hpe tsun dan na nga yang kadai mung kam nna karum na n re ngu tsun ai (sh) asak ram sai ni hte ma ni hkum shan kanawn ai gaw tsawra myit madun ai lam re ngu tsun ai. Dai zawn masu ga ni gaw, teng man ai lam hte seng nna ma ni a myit mang lu ai atsam, chye na lu ai atsam hpe shaning law law jahten kau ya ai. Dai ma ni gaw, tinang hkum tinang awu asin byin mat sai ngu myit la nna, tsawra myit hte shalan shabran lam n lu ging sai ngu hkamsha let kaba wa ai.

8. Hkra machyi nga ai ni hpe shalan shabran ya na matu Yehowa lajang ya lu ai hpe anhte hpa majaw kam mai ai kun?

⁸ Hkum shan roi rip ai lam gaw shaning na na hkra machyi shangun ai. Dai zawn tara tawt lai ai lam gaw grai nhkru ai lam re. Hkum shan roi rip ai lam chyam bra nga ai hpe yu yang, “nja nhpra myit n rawng ai ni” law wa nna, ‘n hkru n hkra ai hte sawt ai masha ni, . . . n hkru ai lam hta je je kaba wa’ ai jahtum nhtoi hta anhte asak hkrung nga ai hpe chye lu ai. (2 Tm 3:1-5, 13) Satan a ladat ni gaw grai nhkru ai. Shi myit pyaw hkra shinggyim masha ni galaw nga ai gaw yawn hpa re. Raitim, Yehowa gaw Satan hte shi a mayam ni hta grau nna atsam kaba ai. Satan galaw ai lam ni hpe mung ayan na sadi yu nga ai. Anhte kade daram hkra machyi nga ai hpe chye nna, anhte ra nga ai shalan shabran lam hpe mung lajang ya lu ai. “Shangwi shapyaw na lam amyu myu a Karai Kasang . . . kaw na anhte hkum nan lu la sa gaw ai shangwi shapyaw ai lam tau yu yang, dai shangwi shapyaw ai a marang e, tsin-yam tsindam amyu myu hkrum ai ni hpe shangwi shapyaw lu hkra, anhte a tsin-yam tsindam amyu myu hta . . . shangwi shapyaw” ya lu ai Karai hpe nawku lu ai gaw shaman chyeju re. (2 Ko 1:3, 4) Shalan shabran ya na matu Yehowa kadai hpe akyu jashawn ai kun?

Kadai Ni Gaw Shalan Shabran Ya Lu Ai Kun?

9. Shakawn 27:10 hta mu lu ai Dawi a ga ni hku nga yang nta masha ni a kabai da hkrum ai ni hpe Yehowa hpa galaw ya na kun?

⁹ Kanu kawa ni a kabai kau hkrum ai ni (sh) shanhte hte ni htep ai ni a roi rip hkrum ai ni gaw grau nna shalan shabran lam ra ma ai. Shalan shabran lu la na npawt gaw Yehowa re ai hpe shakawn kungdawn sara Dawi chye wa ai. (Shakawn 27:10 hpe hti u.) Tinang tsawra ai ni a nyet kau hkrum ai ni hpe Yehowa karum la na hpe Dawi kam ai. Dai hpe Yehowa gara hku galaw ai kun? Sadi dung ai shi a mayam ni hpe akyu jashawn ai hku nna re. Yehowa hpe nawku ai hpunau nauna ni gaw anhte a matu wenyi kun dinghku re. Ga shadawn, Yesu gaw shi hte arau Yehowa hpe nawku ai ni hpe shi a kahpu, kajan, kanu ni re ai ngu tsun wa ai.​—⁠Mat 12:48-50.

10. Myitsu salang langai hku nna kasa Pawlu hpa galaw wa ai kun?

¹⁰ Hkristan nawku hpung hta, kun dinghku zawn kanawn mazum ai ga shadawn langai hpe myit yu ga. Kasa Pawlu gaw bungli shakut nna, sadi dung ai myitsu salang langai re. Kasi kaja madun wa nna, Hkristu hpe shi kasi la wa ai zawn, shi hpe kasi la na matu n-gun jaw da ai. (1 Ko 11:1) Pawlu gaw myitsu salang langai hku nna shi a bungli hpe ndai hku tsun da ai: “Chyu jaw ai kanu gaw, ma chyangai hpe lanu lahku ai zawn, anhte ni mung nanhte hpe lanu lahku wa ai.” (1 Ht 2:7, NW) Dai ni aten na sadi dung ai myitsu salang ni mung, shalan shabran lam ra nga ai ni hpe Chyum Laika hte karum ya ai shaloi, si mani nna matsan dum myit rawng ai ga ni hpe akyu jashawn ma ai.

11. Shalan shabran lam jaw lu ai gaw myitsu salang ni sha n re ai hpe hpa gaw madun nga ai kun?

¹¹ Myitsu salang ni sha, roi rip hkrum ai ni hpe shalan shabran ya lu ai kun? N re. “Shada da shangwi shapyaw hkat” ya na lit anhte langai hpra hta nga ai. (1 Ht 4:18) Shalan shabran lam ra nga ai nauna ni hpe kunghpan ai Hkristan nauna ni gaw laksan hku nna n-gun jaw lu ai. Kasha hpe shangwi shapyaw ya ai kanu hte bung ai ngu Yehowa hkam la ai gaw grai htap htuk ai lam re. (Esa 66:13) Chyum Laika hta, myit daw nga ai ni hpe shalan shabran ya wa ai num ni a kasi ningli ni lawm ai. (Yob 42:11) Dai ni aten na Hkristan nauna ni gaw, hkra machyi nga ai nauna ni hpe shalan shabran ya nga ai majaw Yehowa grai kabu na re. Masa lam nkau hta, myitsu salang langai (sh) lahkawng gaw, myit daw nga ai nauna hpe karum na matu kunghpan ai nauna hpe kadai n chye ai hku nna karum hpyi wa chye ai.b

Anhte Gara Hku Shalan Shabran Ya Mai Na Kun?

12. Hpa hpe n galaw na matu anhte sadi ra ai kun?

¹² Hkristan shada da hpe anhte karum ya ai shaloi, shanhte n tsun dan mayu ai lam ni hpe n san ging ai. (1 Ht 4:12) Rai yang, karum shingtau lam hte shalan shabran lam ra nga ai ni hpe anhte hpa galaw ya mai na kun? Kaga ni hpe karum ya lu na hte seng nna Chyum Laika hta lawm ai lam 5 hpe hkaja yu ga.

13. 1 Hkawhkam 19:5-8 hta, Yehowa a lamu kasa gaw Elia a matu hpa lajang ya wa ai kun? Anhte gara hku kasi la mai na kun?

¹³ Tatut re ai karum shingtau lam jaw u. Myihtoi Elia gaw asak lawt na matu hprawng hkawm ra ai shaloi, si mayu ai du hkra myit daw wa ai. Myit daw nga ai myihtoi hpang de, atsam kaba ai lamu kasa langai hpe Yehowa shangun dat ai. Lamu kasa gaw tatut re ai karum shingtau lam ni hpe jaw wa ai. Kahtet ai muk hpe jaw nna, sha na matu n-gun jaw wa ai. (1 Hkawhkam 19:5-8 hpe hti u.) Dai mabyin gaw grai akyu rawng ai teng man lam hpe madun dan ai. Kalang lang marai langai a matu kaji kajaw lam galaw ya ai gaw grai nan akyu lu shangun ai. Myit daw nga ai hpunau nauna ni a matu malu masha shadu ya ai, kumhpa jaw ai (sh) n-gun jaw ya lu ai laika shagun ya ai zawn re ai lama ma galaw ya ai hku nna tsawra ai lam madun mai ai. Shanhte a hkamsha lam hte seng nna, tsun jahta na matu n loi yang pyi, dai lam ni hku nna shanhte hpe lanu lahku ai lam madun mai ai.

14. Elia a mabyin kaw na anhte hpa sharin la lu ai kun?

¹⁴ Myit daw nga ai ni hpe shalan shabran ya nna shim lum hkra galaw ya u. Elia a mabyin kaw na kaga lam langai naw sharin la lu ai. Horeb Bum de du hkra hkrun lam galu hkawm lu na matu, mauhpa lam hku nna myihtoi wa hpe Yehowa madi shadaw ya wa ai. Lai wa sai aten hta Yehowa hte shi a amyu masha ni ga shaka tawn wa ai shara de sa ai hkrun lam galu hta shim lum ai ngu Elia hkamsha wa na re. Shi hpe sat mayu ai masha ni hte grai tsan ai shara de du mat sai ngu shi hkamsha wa na re. Anhte hpa sharin la lu ai kun? Roi rip hkrum ai masha ni hpe shalan shabran ya ai shaloi, shim lum ai ngu shanhte hkamsha hkra shawng galaw ra ai. Ga shadawn, myit daw nga ai nauna hpe Nawku Htingnu hta hkrum na malai, nauna a nta kaw lama ma lu let ga shaga ai gaw grau kaja ai hpe myitsu salang ni myit hta bang da ra ai. Nkau chyawm gaw Nawku Htingnu hta ga shaga ai hpe grau nna ra sharawng na re.

15-16. Atsawm madat ya ai ngu ai gaw hpa hpe tsun mayu ai kun?

¹⁵ Atsawm madat ya u. Chyum Laika hta ndai hku hpaji jaw da ai: “Masha kadai wa rai ti mung, na la na matu lawan nga u ga; ga tsun na matu hkum tin nga u ga.” (Yak 1:19) Anhte gaw atsawm madat ya chye ai ni rai kun? Atsawm madat ya ai ni ngu ai gaw, hpa mung n shaga lawm ai sha, shi hpe yu nna madat ya nga ai hpe tsun ai re ngu anhte sawn la chye ai. Gaja nga yang, dai hta n-ga lawm ai. Ga shadawn, hpang jahtum hta Elia gaw shi gara hku hkamsha nga ai hpe Yehowa hpe tsun dan wa ai. Yehowa mung atsawm madat ya wa ai. Elia gaw shi chyu sha re ai majaw hkrit wa nna, shi galaw ai bungli mung akyu n nga ai ngu myit wa ai hpe Yehowa chye na ya ai. Dai hkamsha lam ni hpe awng dang lu hkra tsawra myit hte Yehowa karum ya wa ai. Elia tsun ai hpe madat ya wa ai.​—⁠1 Hk 19:9-11, 15-18.

¹⁶ Hpunau nauna ni tsun ai hpe anhte madat ya ai shaloi, myit tau ya nna tsawra myit madun ai lam gara hku madun mai na kun? Kalang lang, anhte chye na ya ai lam hpe hpaji rawng nna tsawra myit lawm ai ga si ni hte madun mai ai. Ndai hku tsun mai ai: “Nang dai zawn hkrum wa ai majaw myit n pyaw ai yaw. Ma ni kadai mung dai zawn n hkrum ging ai.” Myit daw nga ai manang tsun nga ai gaw hpa re ai hpe chye na matu ga san langai (sh) lahkawng hpe san mai ai. Ndai hku mai san ai: “Nang tsun dan ai lam hpe ngai atsawm chye na mayu ai.” (sh) “Nang tsun ai lam hpe ngai chye na ai gaw . . . Ngai chye na ai gaw jaw ai kun?” Dai zawn nang san na nga yang, nang gaw teng sha madat ya mayu nna, chye na ya na matu shakut nga ai hpe myit daw nga ai wa chye na re.​—⁠1 Ko 13:4, 7.

17. Anhte hpa majaw myit galu ra nna ga bai tsun na matu n mai tin ai kun?

¹⁷ Raitim, “ga tsun na matu hkum tin” ngu ai lam hpe hkan sa ra ai. Hpaji jaw ga shang tsun ai (sh) shi a myit mang lam hpe sharai ya ai lam ni hkum galaw. Myit galu u. Hpang jahtum hta, Elia gaw shi kade daram hkamsha ai lam Yehowa hpe tsun dan ai shaloi, grai myit daw nga nna grai yawn ai lam tsun dan wa ai. Yehowa gaw Elia hpe n-gun jaw ngut ai hpang hta pyi, Elia gaw mi na ga hpe sha kahtap nna bai tsun wa ai. (1 Hk 19:9, 10, 13, 14) Hpa sharin la lu ai kun? Kalang lang, myit daw nga ai ni gaw shanhte a hkamsha lam hpe kalang sha n-ga tsun dan chye ai. Yehowa zawn, anhte mung myit galu let madat ya mayu ga ai. Manghkang hpe gara hku hparan mai na lam n tsun ai sha, myit tau ya nna tsawra matsan dum myit hpe madun ga ai.​—⁠1 Pe 3:8.

18. Myit daw nga ai ni hpe shalan shabran ya ai shaloi akyu hpyi ga ni hte gara hku sakse madun mai na kun?

¹⁸ Myit daw nga ai wa hte rau akroi anoi akyu hpyi u. Grai myit daw nga ai ni gaw akyu n lu hpyi ai daram du hkra hkamsha chye ai. Yehowa hpang de sit sa na matu n ging dan ai ngu hkamsha chye ai. Dai zawn hkamsha nga ai wa hpe shalan shabran ya ai shaloi, shi a amying shalawm nna shi hte arau akyu hpyi mai ai. Shi hpe tinang hte hpunau nauna ni kade daram tsawra ai lam Yehowa hpe tsun dan mai ai. Yehowa a matu manu dan ai sagu, myit simsa nna shalan shabran lam lu na matu, Yehowa kaw akyu hpyi mai ai. Dai zawn akyu hpyi ga ni gaw grai shalan shabran ya lu ai.​—⁠Yak 5:16, 17.

19. Shalan shabran ya na matu hkyen lajang ai shaloi hpa gaw anhte hpe karum ya lu na kun?

¹⁹ Shalan shabran lam hte shamai shatsai ya lu ai ga si ni hpe lata u. Garai n tsun shi yang shawng myit da u. N myit yu ai sha tsun na nga yang, hkra machyi chye ai. Tsawra myit lawm ai ga si ni gaw ana hpe shamai ya lu ai. (Gsh 12:18) Shalan shabran ya lu ai, shamai shatsai ya lu ai, tsawra myit lawm ai ga si ni hpe tsun lu na matu Yehowa hpang akyu hpyi u. Raitim, Yehowa a ga si ni lawm ai Chyum Laika gaw grau nna karum shingtau lam lu shangun ai hpe dum u.​—⁠Heb 4:12.

20. Hpunau nauna nkau gaw roi rip hkrum wa ai majaw shanhte hkum shanhte gara hku shadu nga ai kun? Shanhte hpe hpa chye shangun mayu ai kun?

²⁰ Roi rip hkrum wa ai hpunau nauna nkau gaw, tinang gaw awu asin rai mat sai, manu n dan sai, tsawra ai lam n lu ging sai ngu hkamsha ma ai. Dai gaw shut ai lam re. Shanhte gaw Yehowa a matu manu dan ai hpe dum lu hkra Chyum Laika hpe akyu jashawn u. (“Chyum Daw Ni Hte Shalan Shabran Ya U” ngu ai lawk hpe yu u.) Myihtoi Daniela myit daw nna, gawng kya nga ai shaloi, lamu kasa langai gaw tsawra matsan dum let n-gun jaw wa ai hpe myit dum u. Shi gaw grai manu dan nna tsawra hkam ai wa re ai hpe Yehowa chye shangun mayu ai. (Dan 10:2, 11, 19) Dai zawn sha, myit daw nga ai hpunau nauna ni mung Yehowa a matu manu dan ai.

21. Myit malai n lu ai ni hpa galaw kau hkrum na kun? Ndai laman hta anhte hpa galaw na matu dawdan da ging ai kun?

²¹ Kaga ni hpe shalan shabran ya ai shaloi, Yehowa shanhte hpe tsawra ai lam chye shangun u. Yehowa gaw tara rap ra ai Karai re ai hpe mung anhte n malap ging ai. Roi rip ai lam yawng gaw ip da mai na n re. Yehowa gaw yawng mayawng hpe mu nna, myit malai n lu ai roi rip ai ni yawng hpe ari jaw na re. (Bhk 14:17) Ya aten hta anhte ni hku nna, roi rip hkrum ai ni hpe tsawra myit madun lu na lam yawng hpe galaw mat wa ga. Kade n na yang, Yehowa gaw Satan hte Satan mungkan a majaw roi rip hkrum wa ai ni hpe tsep kawp shamai shatsai ya mat na re. Dai hpe chye lu ai gaw shalan shabran lam lu shangun ai. Dai shaloi, hkra machyi ai lam ni gaw, myit hta, salum hta tsep kawp nga sana n re.​—⁠Esa 65:17.