Magam Bungli Hta Tinang A Aten Hpe Grau Nna Akyu Rawng Ai Hku Jailang U
2014 magam shaning laman, Yehowa Sakse ni gaw Hkaw tsun Magam bungli hta ahkying 1,945,487,604 hpe jailang wa ai. Dai gaw Yehowa a Magam bungli hta amu law taw na matu anhte myit daw dan da ai hpe madun ai. (Shk. 110 :3; 1 Kor. 15:58) “Ahkying ladaw gying” mat wa sai re ai majaw, anhte a magam bungli hpe masha ni grau chye wa hkra anhte a aten ni hpe grau jailang mai na kun?—1 Kor. 7:29.
Magam bungli hta anhte a aten hpe akyu rawng ai hku jailang lu na matu, ra rawng ai hku galai shai chye ra ai. Ga shadawn, magam bungli hta hkying hkum langai shing nrai langai jan, na yang pyi masha langai hpe mung n lu hkaw tsun yang, masha law law hpe lu hkaw tsun na matu, anhte a aten hpe galai shai mai na kun? Shara langai hte langai, masa gaw bung na nre. Raitim, anhte a aten gaw ‘nbung hpe htwi’ ai zawn n byin ai sha, akyu rawng ai hku jailang na matu, lawu na lam matsun ni gaw karum ya na re.—1 Kor. 9:26.
Nta Langai Hpang Langai Sakse Hkam Ai Lam: Nta langai hpang langai hkaw tsun ai bungli hpe jahpawt daw hta anhte galaw wa ai gaw, shaning law law na wa sai. Raitim, masha law law gaw shani aten hta bungli galaw ai rai nna, bungli kaw na bai wa ai aten, shana daw hkring sa ai aten ni hta, nta langai hpang langai hkaw tsun na matu nang shakut mai na kun? Shani aten hta, lam ntsa hte hpaga lawk ni kaw sakse hkam ai gaw, grau akyu lu chye ai.
Shawa Hpawng Man Sakse Hkam Ai Lam: Hpung a lawk kata na, masha law ai shara hta saboi hte laika mara leng ni hpe lang nna sakse mai hkam ai. (July 2013 Anhte A Mungdan Magam (BU) lm. 5 kaw yu u.) Saboi hte laika mara leng ni jailang nna shawa hpawng man sakse hkam ai shara hta masha hkawm sa hkawm wa nau nnga wa sai nga yang, masha law ai shara de htawt na matu Hpung Magam Komiti gaw daw dan mai ai.
Bai Kawan Ai Lam Hte Chyum Ga Sharin Lamang: Magam bungli a kaga lam ni hta akyu n lu ai hku byin taw nga yang, bai kawan ai lam hte, chyum ga sharin lamang galaw mai na kun? Ga shadawn, kru ya shani jahpawt daw hta, nta langai hpang langai hkaw tsun sa ai nga yang, na a chyum ga sharin lamang hpe shani shing nrai shana daw de mai galaw na kun? Magam bungli hta grau na akyu nga wa hkra, dai lawk kaw sha nga ai, bai kawan ai lamang hpe sa mai na kun?
Magam bungli hta shang lawm ai aten hpe jahpan bang mai tim, anhte a magam bungli hta awng dang lam lu yang gaw grau nna ngwi pyaw na re. Masat da ai aten hta magam bungli a lamang langai ngai gaw akyu n lu yang, kaga langai hpe galaw na matu mai shakut ai. Magam bungli hta tinang a aten hpe grau nna akyu rawng ai hku jailang lu hkra lam matsun ya na matu, “man Madu” Yehowa kaw akyu hpyi u.—Mah. 9:38.