Laika Mara Leng Hte Sakse Hkam Ai Lam

Ding man ai myit nga ai ni hpe teng man ai tara chye wa hkra saboi, laika mara leng hte sakse hkam ai lam gaw grai akyu nga ai. (Yaw. 6:44) Dai majaw, myitsu salang ni gaw tinang a lawk kata na masha law ai shara hta shawa hpawng man sakse hkam ai lamang hpe galaw na matu dawdan mai ai. Laika mara leng ni gaw shara langai hpang langai hpai sa mai ai majaw, ahkaw ahkang nga ai ni kaw, ahkang nhpyi ra ai. Ndai lamang hta shang lawm na matu kadai ni atsam nga a ta? Shang lawm na ni gaw, atsawm chye myit ai, tinang hkum tinang atsawm chye shachyen ai, atsawm ga shaga chye ai hkaw tsun masha byin ra ai. Hkaw tsun masha ni ndai lam hta grau awng dang na matu, galaw ra ai lam ni hte koi ra na lam ni hpe lawu hta madun da ai.

Galaw ra na lam ni:

Laiwa laisa ni hpe hku hkau ai hte, karum ya mayu ai myit rawng u. Hkaw tsun masha nkau mi gaw, alum ala hte hku hkau ai hku shachyen shaga ma ai. Langai ngai sa wa yang, shi hpe “nang ra ai laika buk langai ngai hpe mai la ai” ngu nna mai tsun ai.
Laika leng a hpang de kachyi mi sit nna tsap u. Hkaw tsun masha nkau mi gaw, leng a hpang de, kachyi mi sit nna tsap ai shaloi awng dang ai lam lu wa ai. Shara nkau hta gaw dai hku tsap jang, leng makau sa na matu masha ni htingnut mat ai hpe mu lu ai. Dai hku byin yang, leng hte tsan tsan tsap nna langai ngai sa ai du hkra la u. Langai ngai sa wa yang she, leng makau de sa nna, shi hte ga shaga u. Ndai hku mai san ai: “ndai ga san hpe moi de myit ga ai i?”
Mai byin ai daram, Chyum Laika hpe lang u.
Chyum Laika Teng Sha Sharin Ya Ai Gaw Hpa Rai Ta? ngu ai laika buk zawn, Chyum ga sharin laika buk ni hpe la ai nga yang, Chyum Laika hkaja ai lamang hpe sang lang dan u. Chyum Laika Hpe Hpa Majaw Hkaja Ra Ai Kun? ngu ai video hpe tablet shing nrai phone hte madun u.
Mai byin ai daram, myit lawm ai wa hte seng ai lam ni hpe matsing da u. Shi gaw na a hpung lawk kaw na nrai yang, Hkan Sa U (S-43) laika hta ka matsing nna, amu madu hpe jaw u.